Փաստ ինֆո

Սոչիում տեղի ունեցած Պուտին, Ալիեւ , Փաշինյան եռակաողմ հանդիպման արդյունքներով ընդունված փաստաթղփի ամենակարեւոր մեսիջը առաջին պարբերությունն էր։ Նման կարծիք ունի ռազմական փորձագետ, պահեստազորի գնդապետ Հայկ Նահապետյանը։

«Փաստինֆո»-ի հետ զրույցում նա շեշտեց, որ այդ պարբերության մեջ հղում կա նախորդիվ ընդունված երեք հայտարարություններին եւ դրանցում նշված պարտավորությունների կատարմանը։

«Ռուսաստանի համար կարեւոր էր եւ նա հասավ նրան, որ Պրահայում ձեռք բերված պայմանավորվածությունները մնացին պատմության գրկում, որով ԵՄ-ն ու ԱՄՆ-ը , նաեւ Թուրքիան ցանկանում էին Ռուսաստանի դուրս մղել գործընթացից։ Սոչիում ընդունված հայտարարությամբ, Հայաստանի ու Ադրբեջանի ղեկավարները որպես հիմք ընդունեցին արդեն հիշատակված եռակաողմ հայտարարությունները։ Առաջին ամենակարեւոր մեսիջը սա էր, որ Ռուաստանի նախագահը մի կողմ դրեց վաշինգտոնյան տարբերակը եւ ասաց, որ քննարկումը գնում է Ռուսաստան, Հայաստան, Ադրբեջան ձեւաչափով»,-ասաց Նահապետյանը՝ նկատելով, որ հիշատակված փաստաթղթերում Ռուսաստանի միջնորդական առաքելությունն ամրագրված է նախագահի ստորագրությամբ։

Մյուս կարեւոր արձանագրումը, Նահապետյանի խոսքով, վերաբերում է Ղարաբաղում ռուս խաղաղապահների ներկայությանը, չնայած նրան, որ Ադրբեջանը դժկամությամբ է ընդունում այդ փաստը եւ Պուտինի հետ երկկողմ հանդիպմանը հայտարարում է, թե ԼՂ խնդիրն այլեւս լուծված է։

«Հայտարարության մեջ ոչ միայն արձանագրվեց խաղաղապահների դերն ու նշանակությունը, այլ երկկողմ ֆիսքսվեց դա, ինչը նշանակում է, որ առկա վտանգները չեզոքացնելու համար ՌԴ-ն ձեւավորել է խաղաղապահ առաքելություն, հետեւաբար կա պրոբլեմ»,-նկատում է Նահապետյանը։

Խոսելով այն մասին, որ հայտարարության մեջ հղում կա նաեւ 1991 թվականի Ալմա-Աթիի հռչակագրին, ռազմական փորձագետը հիշեցնում է՝ ԼՂԻՄ-ն արդեն ինքնորոշվել էր եւ Ադրբեջան վարչական սահմանները ԽՄ ներսում առանց Ղարաբաղի էին։ «Սա Ռուսաստանին եւ Հայաստանին հետագայում մանեւրելու եւ բանակցային ձեւաչափում Արցախի ժողովրդի ինքնորոշման իրավունքը հետապնդելու հնարավորություն է ընձեռում»,-ասաց պահեստապետի գնդապետը՝ արձանագրելով, որ Պուտինը խոսեց չհամաձայնեցված կետերի մասին։

Նահապետյանի խոսքով, դա կարող էր վերաբերվել նաեւ Ալիեւի 5 կետերին, Ալիեւի ու Էրդողանի հայտարարություններին՝ կապված այսպես կոչված միջանցքի հետ, որը, որքան էլ թուրք-ադրբեջանական տանդեմը պնդի, նոյեմբերի 9-ի փաստաթղթում գոյություն չունի։

Հայկ Նահապետյանն ասում է՝ թեեւ փորձագիտական շրջանակներն այլ կարծիքի են, Սոչիի հայտարարությունը կարելի է դրական լույսի ներքո դիտարկել, որովհետեւ ՌԴ ԳՇ քարտեզներով Ադրբեջանի օկուպացրած տարածքները ներառված չեն, թեեւ կա ռիսկ, որ հայկական կողմը կարող է զիջել։

«Այստեղ խնդիրն այն է, թե որքանով է հայկական կողմը կոմպետենտ այդ ամբողջ խնդիրները փաթեթով ներկայացնել։ Այստեղ ես թերահավատ եմ՝ հաշվի առնելով այդ մարդկանց կրթական ցենզը եւ ունակությունները։ Այդ հայտարարությունը ռուսական կողմի հաջողությունն էր, մասնավորապես, որ պրահյան պայմանավորվածությունները մի կողմ դրվեցին եւ, որ խաղաղապահների գործունեության անհրաժեշտությունն արձանագրվեց, ինչից հայկական կողմը՝ Արցախի մեր հայրենակիցներն են շահում»,-եզրափակեց Նահապետյանը։

Աղբյուր` Փաստինֆո