Փաստ ինֆո

Ներկա իշխանության ամենացայտուն հատկանիշներից է պատասխանատվության իսպառ բացակայությունը, այդպիսով իսկ իրենց զբաղեցրած բարձր պաշտոնները, այդ պաշտոնների կարևորությունը զրոյացնելը։ Անպատասխանատու պաշտոնյան աղետ է ոչ միայն սեփական պետության և քաղաքացիների համար, այլև՝ անվստահելի և անլուրջ գործընկեր՝ հարևանների համար։

Նախօրեին՝ Փաշինյան-Պուտին հանդիպման ընթացքում ՀՀ վարչապետի աթոռն զբաղեցնողն իր արևմտյան գծին դեմ՝ գրավոր տեքստ էր կարդում, ակնհայտորեն՝ առանց մտածելու։ Շատերը գիտեն արդեն՝ առաջիկա եվրոպական հանդիպումների ընթացքում տվյալ տեքստը փոփոխվելու է՝ ըստ մասնակից երկրների քաղաքական հայացքների։ Այսինքն, գործ ունենք մարդու հետ, որն անկանխատեսելի է և վստահություն չներշնչող։

Ըստ ամենայնի, այս համատեքստում էլ նրան դիտարկում և նրա հանդեպ վերաբերմունք են դրսևորում պետություններն ու նրանց ղեկավարները։ Եվ քանի որ նա է շարունակում լինել Հայաստանը ներկայացնողը, Հայաստանի անունից դրսում բանակցողը, այդ անվստահությունը մեր պետության վրա է նաև տարածվում․․․

Ի դեպ, անպատասխանատվությունը հատուկ է ոչ միայն Փաշինյանին, այլև իր ողջ թիմին։ Բացառությունները բացառիկ կարող են լինել։

Քանի-քանի անգամ է պատահել, որ Փաշինյանն իր իսկ ասածը հերքի, քանի անգամ է ակնհայտ ոչ ստույգ տեղեկատվության փոխանցող եղել։ Ընդ որում, ոչ միայն ներքին լսարանի, ՀՀ քաղաքացիների նկատմամբ, այլև՝ դրսի աշխարհի։ Դիտարկենք, օրինակ, մեր ռազմագերիների թվից մինչև ՀՀ տարածքի «իքս» հատվածը ազարբայջանի կողմից օկուպացիայի ենթարկելու փաստը։ Ասում ենք «իքս», քանի որ միայն երեկ ԶՈՒ գլխավոր շտաբի պետն այս համատեքստում տվյալներ հայտնեց, ըստ որի ազարբայջանը «օկուպացրել է մեր ինքնիշխան տարածքից մոտ 130 եւ որոշակի ավելի տարածք»։

Երկար ժամանակ այս տվյալը թաքցնող ՀՀ իշխանությունները ԶՈՒ գլխավոր շտաբի պետի բերանով վերջապես բարձրաձայնեցին այս կարևոր տեղեկատվությունը, փաստը։ Փաստ, որի մասին հստակ գիտեինք, մեր և աշխարհի աչքի առաջ էր, սակայն ներկա իշխանությունը ոչ Հայաստանի ինքնիշխան տարածքից օկուպացված հատվածի վերաբերյալ թվային տվյալ էր ասում, ոչ ազարբայջանի նկատմամբ կոնկրետ քայլեր ձեռնարկում՝այս փաստը միջազգային հարթակներում որպես կռվան օգտագործելով և հստակ հայտարարելով, որ հանձինս ազարբայջանի՝ գործ ունենք օկուպանտի հետ։ Սա պատասխանատվության բացակայություն չէ, ի՞նչ է։ Եվ զբաղեցրած բարձր պետական պաշտոնները չգիտակցելու, պաշտոնը որպես անձնական բարեկեցությունն ապահովելու պայման դիտարկելու արդյունք։

Այս համատեքստում են նաև ԱԺ խոսնակ Ալեն Սիմոնյանի, ապա նաև՝ նրա մամլո խոսնակի՝ տեղեկատվությունները՝ հանրությանը։ Օրինակ՝ Ալեն Սիմոնյանն ասում է, թե ունենք 240 զոհ, իսկ մամուլի քարտուղարը շտապում է հայտարարել, թե իր ղեկավարը սխալվել է։

Նման դրվագները բազմաթիվ են եղել և Փաշինյանի, և մյուսների պարագայում։ Մի օր մի բան են ասել, հաջորդ օրը՝ նախորդ օրվա՝ տրամագծորեն հակառակը։ Եվ՝ բացարձակ չգիտակցելով, որ դա պետական պաշտոնյային անհարիր է։ Իսկ վարչապետի աթոռն զբաղեցնողը «դուխ է տվել» իր թիմին, թե՝ միշտ էլ կարող եք սխալվել՝ այդպիսով նրանց գործած ցանկացած հանցանք սխալի տակ անցկացնելով և արդարացնելով։

Ընդհանրապես, թե ինքը՝ Փաշինյանը, թե իր թիմը ազատությունն անարխիայի հետ շփոթելու ակնհայտ մոլորության մեջ են։ Կամ էլ դա նրանց համար միտումնավոր կեցվածք է։

Բնականաբար, այս հատկանիշները մի կողմից քպականներին միավորող են եղել, մյուս կողմից էլ՝ վարակիչ։ Ասենք, այն ինչ մերժելով մերժում էր ընդդիմադիր Փաշինյանը, իշխանության աթոռին բազմելով՝ ճիշտ հակառակն է արել։ Անթիվ օրինակներ կարելի է բերել, բայց միայն մեկը, կարծում ենք, բավական կլինի։ Նախկինում առկա ծառայողական ավտոմեքենաների մեծաքանակության համար պետությունը «պադավատապետություն» համարող և վարչապետության վաղ շրջանում հեծանիվով գործի գնացող Փաշինյանն այսօր բազմակի անգամ է ավելացրել պետական պաշտոնյաներին սպասարկող մեքենաների պարկը, իսկ ցուցադրական հեծանիվին փոխարինելու է եկել այս իշխանությունների համար օդային տաքսու դեր կատարող ցուցադրական ուղղաթիռը։

Պետության գահավիժման գնով՝ ի՜նչ թռիչքներ են կատարում թավշյա իշխանության իշխանիկները․․․

Աղբյուր` Փաստինֆո