Փաստ ինֆո

2008 թվականի դեկտեմբերին հրդեհ էր բռնկվել «Նոր Նորք» նոտարական տարածքի նոտար Գայանե Ենգիբարյանի աշխատասենյակում, որով հիմք դրվեց մի ամբողջ մեքենայությունների՝ շուրջ 1,5 մլն դոլար արժողության:

Հրդեհի բռնկումը նոտարի աշխատասենյակում սոսկ պատահականություն չէր, այլ կանխամտածված գործողություն, որով նախ քողարկվեց դրան նախորդած մեկ այլ հանցագործություն՝ այդպիսով կանաչ լույս վառելով հրդեհի կազմակերպիչների համար : Խնդիրն այն է, որ նախքան հրդեհվելը նոտար Գայանե Ենգիբարյանի աշխատասենյակից հափշտակվել էր նոտարի կնիքն ու ինքնասոսնձվող պաշտպանիչ պիտակները եւ հրդեհը կազմակերպվել էր Երկրապահ կամավորականների միության Էրեբունու տարածքային բաժանմունքի նախագահ Մանվել Բատիկյանի քավորությամբ, գողության փաստը քողարկելու համար :

Նկատենք, որ գողությունը նույնպես ի սկզբանե մտահղացել էր Մ.Բատիկյանը՝ այդ «պատասխանատու» աշխատանքը վստահելով իր ծանոթ Վարդան Խաչատրյանին : Հատուկ քննչական ծառայության մեզ փոխանցած տեղեկությունների համաձայն՝ Մ.Բատիկյանը 2008թ. դեկտեմբերի 28-ի՝ լույս 29-ի գիշերը Վարդան Խաչատրյանին ավտոմեքենայով տարել, ցույց է տվել «Նոր Նորք» նոտարական տարածքի նոտար Գայանե Ենգիբարյանի աշխատասենյակի պատուհանները ու անգամ տվել աքցան, դանակ՝ տարածք մուտք գործելու համար, 2 լիտր բենզին՝ գողությունից հետո աշխատասենյակը հրդեհելու համար եւ խոստում՝ վճարել 50.000 դրամ:

Վարդան Խաչատրյանն աքցանով կտրել է «Նոր Նորք» նոտարական տարածքի նոտար Գայանե Ենգիբարյանի աշխատասենյակի ճաղավանդակի ճաղերից մեկը, բացել պատուհանի փեղկը եւ մուտք գործել աշխատասենյակ, երկաթյա պահարանից հափշտակել նոտարի թիվ 83145593 համարի ՀՀ զինանշանով կնիքի ռետինե շերտն ու թիվ 2686636-ից մինչև 2686946 հերթական համարների ինքնասոսնձվող պաշտպանիչ պիտակները, ապա հրկիզել աշխատասենյակը:

Նոտարի կնիքն ու պիտակները ձեռք բերելուց հետո Մանվել Բատիկյանն իր ծանոթուհու՝ Նազիկ Խաչատրյանի հետ անցնում են գործի, որը պետք է դրսեւորվեր կեղծ գործարքներ կնքելով: Վերջինս՝ «Գինդ» թերթից առանձնացրել է Երևան քաղաքում վարձով տրվող եւ վաճառվող բնակարանների վերաբերյալ հայտարարություններ, դրանց միջոցով ծանոթացել, ապա վարձակալության պայմանագիր է կնքել Երևան քաղաքի Զաքյան փողոցի 2-րդ շենքի բնակարաններից մեկի սեփականատեր Նինել Միրզոյանի հետ եւ խաբեությամբ վերցրել նրա բնակարանի սեփականության վկայականը։

«Նոտարը» կար՝ կնիքի եւ ինքնասոսնձվող պաշտպանիչ պիտակների տեսքով, բնակարանի սեփականաշնորհման վկայականը կար՝ մնում էր միայն ձեւակերպումը : Մանվել Բատիկյանն ու Նազիկ Խաչատրյանը, օգտագործելով Երևանի Մալաթիա նոտարական տարածքի նոտար Սուրեն Գրիգորյանի կեղծ կնիքն ու նոտար Գայանե Ենգիբարյանի աշխատասենյակից հափշտակված ինքնասոսնձվող պաշտպանիչ պիտակները, 2008թ. դեկտեմբերի 30-ին իրավունք վերապահող կեղծ լիազորագիր են կազմել՝ թե իբր Նինել Միրզոյանը լիազորել է Նազիկ Խաչատրյանին լինել իր ներկայացուցիչը գործարքի համար անհրաժեշտ պետական բոլոր մարմիններում: Արդյունքում շատ կարճ ժամանակ անց Նինել Միրզոյանին պատկանող բնակարանի սեփականատեր է դառնում Նազիկ Խաչատրյանը :

Այս եղանակով նշված զույգս տիրացել է երկու բնակարանի, իսկ երրորդ փորձը տապալվել է սեփականատիրոջ զգոնության շնորհիվ եւ Ն.Խաչատրյանի մտահղացումը հօդս է ցնդել, երբ թվում էր, թե ամեն ինչ արդեն ավարտվել է, քանզի մնում էր միայն նոր վկայականը ստանալ, սակայն սեփականատերն անմիջապես դիմում է կադաստր, որն էլ անմիջապես դադարեցնում է գործընթացը:

Սակայն հնարամիտները դադարել չէին պատրաստվում : Ծրագրած հանցագործությունը ձախողվելուց հետո՝ 2009թ. օգոստոսի սկզբին, Մանվել Բատիկյանի ծանոթ Հակոբ Անդրեասյանը նրան տեղեկացնում է մեկ այլ «զոհի» մասին՝ առաջարկելով հարձակվել Ջրվեժ գյուղում միայնակ բնակվող, թանկարժեք հնաոճ իրերի առքուվաճառքով զբաղվող մի մեծահասակ տղամարդու վրա: Համաձայնությունը ձեռք է բերվում եւ համատեղ որոշմամբ գործին ներգրավվում է նաեւ երրորդ անձը՝ Արթուր Ներսիսյանը։ Ավազակային հարձակման մասնակցելու դեպքում Հակոբ Անդրեասյանը խոստացել էր չեղյալ համարել նրա՝ 640 հազար դրամի հասնող պարտքը։

Ըստ դերաբաշխման՝ 2009թ. օգոստոսի 6-ի՝ լույս 7-ի գիշերը, ուղիղ կեսգիշերին, Մանվել Բատիկյանի «Լեքսուս» մակնիշի, 16 ՍԼ 115 պետհամարանիշի ավտոմեքենայով գնացել են Կոտայքի մարզի Ջրվեժ գյուղ, որտեղ մեքենայի մեջ սպասել են մինչև ժամը 5։30-ը, ապա ոտքով գնացել նշված գյուղի 4-րդ փողոցի 10ա հասցեում գտնվող հնահավաք Մանվել Մարգարյանի տան մոտ Արթուր Ներսիսյանը դարպասի վրայով անցել է հիշյալ տան բակ, բացել դարպասը, որից հետո Հակոբ Անդրեասյանն ու Մանվել Բատիկյանը նույնպես մտել են բակ, և երեքով դիմակավորված, զինված 9մմ տրամաչափի «Մակարով» տեսակի ատրճանակով, էլեկտրահարման սարքով ու ձեռնաշղթայով ու սպասել են մինչև Մանվել Մարգարյանի տնից դուրս գալը։

Առավոտյան՝ ժամը 10։30-ի սահմաններում, երբ Մանվել Մարգարյանը դուրս է եկել տնից ու մտել խորդանոց, Մանվել Բատիկյանը, Հակոբ Անդրեասյանն ու Արթուր Ներսիսյանը հարձակվել են նրա վրա: Չեն զլացել նաեւ ատրճանակի խզակոթով հարվածներ հասցնել Մանվել Մարգարյանի գլխին, դեմքին, ապա՝ կպչուն ժապավենով կապել: Հնահավաքի տնից հանցագործները հափշտակել են ավելի քան 6 մլն դրամի գույք, ինչպես նաև 550.000 դրամ արժողության 1954թ. գործարանային արտադրության «ՕՊ ՍԿՍ» տեսակի 7,62մմ տրամաչափի, «իկ 6801» համարի որսորդական ինքնալից կարաբին օպտիկական նշանառության հարմարանքով, գործարանային արտադրության «ՄՌ-251» մոդելի «99 Ծ1635» համարի երկփողանի որսորդական կոմբինացված հրացան՝ իր բաղկացուցիչ մասերը կազմող երեքական երկփողանիներով, և ռազմամթերք հանդիսացող 17 հատ տարբեր տրամաչափի և նմուշի՝ գործարանային արտադրության որսորդական փամփուշտներ:

Այսքանով այս մի հանցավոր խմբի գործունեությունը դադարում է եւ բոլոր մասնակիցներն էլ կալանավորված են, սակայն այլ խմբեր շարունակում են իրենց գործունեությունը, ինչն առավել ագրեսիվ երանգներ է սկսել ստանալ:

Աղբյուր` Փաստինֆո