Փաստ ինֆո

Երեկ Սոչիում կայացել է Հայաստանի, Ռուսաստանի և Ադրբեջանի ղեկավարների եռակողմ հանդիպումը, որի արդյունքներով երեք երկրների նախագահները հանդես են եկել հայտարարությամբ։

Հանդիպման արդյունքների վերաբերյալ «Փաստինֆո»-ն զրուցել է քաղտեխնոլոգ Կարեն Քոչարյանի հետ:

- Պարո՛ն Քոչարյան, Սոչիի հանդիպման արդյունքում երեկ հերթական համատեղ հայտարարությունն ընդունվեց: Ի՞նչ կասեք հանդիպման արդյունքների մասին, ինչ-որ բան տվե՞ց այն հայկական կողմին.

-Ոչինչ չտվող հանդիպում էր, որից դեռ կարող է շատ լինել, անիմաստ էր, այլ կերպ ասած՝ ռուսական կողմի պարտությունն էր, Հայաստանն էլ պարտվելու տեղ չունի, հիմա ռուսներն են պարտվում:

- Պարտություն էր ո՞ւմ՝ Արևմուտքի՞ն

-Գեոքաղաքական պարտությունն էր, մնացածը՝ հետո:

- Պարո՛ն Քոչարյան, այս հանդիպումը կարծես ինչ-որ առումով հետընթաց լիներ մեզ համար, քանի որ նախկինում եթե հանդիպման արդյունքում ընդունված հայտարարություններում գոնե խոսվում էր Լեռնային Ղարաբաղի խնդրի մասին, հիմա խոսք չկար սրա մասին.

-Լեռնային Ղարաբաղի մասին Հայաստանը վաղուց արդեն չի ուզում խոսել, եթե մարդը հայտարարում է՝ ինձ միայն պետք է 29.800ք/կմ-ը, դա ի՞նչ է նշանակում, Ղարաբաղից վաղուց է հրաժարվել:

- Պարո՛ն Քոչարյան, իսկ ադրբեջանական կողմին ի՞նչ խնդիր հաջողվեց լուծել այս հանդիպումով, ի՞նչ ստացավ հակառակորդը Սոչիի հանդիպումից

-Չգիտեմ՝ ի՞նչ ստացավ, կարծում եմ, այնպես չի, որ երեք կողմին էլ դուր են  եկել հանդիպման արդյունքները, սովորաբար, հանդիպումից հետո, եթե լավ էր անցնում, միասին ասուլիս էին տալիս, բայց այս անգամ դա էլ չեղավ:

-Ադրբեջանը  պատերազմից հետո անընդհատ հայտարարում է, թե ԼՂ հասկացություն գոյություն չունի, հակամարտությունը  վաղուց լուծված է և քննարկելու ոչինչ չկա, ստացվում է՝  Ադրբեջանին հաջողվեց իր նվազագույն խնդիրը լուծել, քանի որ իսկապես հանդիպման արդյունքում ընդունված  հայտարարության մեջ չխոսվեց ԼՂ խնդրի մասին.

-Հանդիպումը սկսվել է նրանից, որ Ալիևը Սոչի մտնելուն պես ասել է, որ Ղարաբաղի հարցը լուծված է: Ուրեմն ստացվել է, Ռուսաստանը նրան էլ պարտվել է.

- Պարո՛ն Քոչարյան, հանդիպման ընթացքում կողմերն ընդգծել են ռուս խաղաղապահների զորախմբի առանցքային ներդրումն իր տեղակայման գոտում անվտանգության ապահովման գործում, խոսվել է նաև ռուս խաղաղապահների մանդատի երկարաձգման մասին՝ ընդհուպ մինչև 10 տարի, իրատեսական համարում եք սա

-Ո՞ր կողմերն են ասում, միայն Պուտինն է ասում, ուրիշ ոչ մեկը չի  խոսում ռուս խաղաղապահների մասին:

- Նիկոլ Փաշինյանը ևս շեշտել էր խաղաղապահների դերի կարևորության մասին.

-Դե որ Նիկոլ Փաշինյանն է ասել, ուրեմն կարևոր է:

-Պարո՛ն Քոչարյան, եթե ընդհանուր արդյունքներն ամփոփենք, ստացվում է, որ Պրահայում կայացած  հանդիպման արդյունքներն ավելի շեշափելի էին, քան՝ Սոչիինը.

-Իհարկե, հենց սա է Ռուսաստանի պարտությունը, որ Պրահայի արդյունքներն ավելի շոշափելի էին, քան՝ Սոչիինը:

Աղբյուր` Փաստինֆո