Փաստ ինֆո

Հայաստանում մի քանի ոլորտներ այժմ աշխուժացած վիճակում են գտնվում, ինչն էական տնտեսական ազդեցություն է թողնում։ «Փաստինֆո»-ի հետ զրույցում այս պասին ասաց Հայաստանի գործատուների միության նախագահ, տնտեսագետ Գագիկ Մակարյանը։

Անդրադառնալով համավարակի հետևանքով փակված աշխատատեղերի վերականգնմանը՝ Գագիկ Մակարյանը նշեց, որ մի շարք ոլորտների աշխուժացման արդյունքում են ստեղծվում աշխատատեղերը։ Մասնավորապես՝ դրա լավագույն օրինակներից է պետական գնումների իրականացումը ենթակառուցվածքների ոլորտում, այդ թվում ճանապարհաշինության. «Օրինակ Տավուշի տների վերականգնումը, ճանապարհների, կամուրջների կառուցումը, մանկապարտեզների, դպրոցների վերականգնումը։ Սա վերանորոգումների և շինարարության սեզոն է, նաև՝ պետական գնումների ծավալներն են ավելացել, դրանք էլ են առաջացրել աշխատատեղեր։ Բացի այդ շինարարությունն ակտիվացել է, որովհետև ասում են՝ եկամտահարկի վերադարձելիության հարցը հիփոթեքի շրջանում կարող է հաջորդ տարվանից վերանալ, դրա համար այս տարի շատերը փորձում են շինարարության հիմքերը դնել, իրենց ապագա բնակիչներին հիփոթեք տրամադրել բանկերի միջոցով, որպեսզի նրանք մտնեն ծրագրի մեջ։ Դրա համար շինարարական որոշակի բում է տեղի ունենում, ինչի շնորհիվ էլ աշխատատեղերն ավելանում են»,նշեց Գագիկ Մակարյանը։

Վերջինս նկատեց՝ չնայած սրճարաններում արտասահմանցիների հոսքը քիչ է, բայց հանրային սննդի ոլորտի տնտեսվարողները ևս իրենց սրճարաններն իրենց անձնակազմը վերականգնել են, անգամ նոր մարդկանց են ընդունում, քանի որ սրճարանները մարդաշատ են։
Խթանվել է նաև կորոնավիրուսի հետ կապված որոշակի ոլորտներում արտադրությունը, այդ թվում հիգիենայի միջոցների, դիմակների, ալկոգելների արտադրությունը։ Պաշտպանիչ, մաքրող միջոցների նկատմամբ պահանջարկը մեծացել է։

«Բացի այդ որոշակի շինարարական աշխատանքներն իրենց հետ գեներացրել են նաև շինարարական նյութերի արտադրությունը կամ վաճառքը։ Առևտուրը և այդ շղթան ավելի լավ վիճակում է գտնվում։ Բացի դրանից նաև հաշվի առնենք, որ պետական ապարատում էլ կրճատումներ չեն եղել, նույնիսկ ավելանում են։ Համալսարանները, դպրոցներն էլ են սկսել աշխատել։ Այսինքն` այդտեղ էլ աշխատատեղերի պահանջարկն ավելացել է»,-ասաց Գագիկ Մակարյանը՝ հավելելով, որ չնայած այս ամենին ունենք ոլորտներ, որոնք դեռ վատ վիճակում են և խնդիրներ ունեն։ Ըստ նրա՝ կորոնավիրուսի հետևանքները դեռ հաղթահարված չեն և շատ հիմնարկներ գտնվում են ցածր եկամտաբերության մեջ. «Բոլոր դեպքերում իրենք դեռ այդպես փառավոր վիճակում չեն, բացի այդ պետք է հաշվի առնենք, որ ժողովրդի գնողունակությունն ընկել է։ Նոր կրճատումների վտանգը և կորոնավիրուսի նոր դեպքերը ևս ուժի մեջ են։ Այսինքն՝ աշխատատեղեր վերականգնելով դեռ չենք կարող խոսել այն մասին, որ անպայման նույն մասշտաբով վերականգնելու ենք տնտեսությունը։ Տնտեսությունը հետ է ընկած, սոցիալական խնդիրները շատ են։ Գիտենք, որ աղքատությունը շատացել է, գործազրկությունն ավելացել է չնայած այս աշխատատեղերի վերականգնմանը։ Ստվերային աշխատուժի հաշվին նաև շատ բան չերևաց, որովհետև ստվերային աշխատուժը կարող է կրճատվեց, բայց ձևակերպված աշխատուժի կրճատվելը քիչ երևաց։ Բացի այդ այսօր մթերման շրջան է և նաև վերամշակող ճյուղում են աշխատատեղեր ստեղծվում։ Հետևաբար` աշխատողները կարող են ավելանալ նաև այդ պատճառով»,-ասաց Գագիկ Մակարյանը։

Դիտարկմանը, որ վերականգնված 70 հազարն աշխատատեղն իրական թիվ է, այլ ոչ թե ստվերից դուրս եկածների թիվը, տնտեսագետն ասաց. «Իրականում հավատում եմ այդ թվերին։ Հայաստանում հիմա նաև որոշակի ծրագրերի ակտիվացում կա։ Տարբեր գրանտային ծրագրեր, տենդերներ, ինչի արդյունքում ևս աշխատանքի են վերցնում մասնագետների»,-ասաց Գագիկ Մակարյանը։

Վերջինս գտնում է, որ այս ակտիվացումը տեղի է ունեցել նաև սեզոնային բնույթի աշխատանքի շնորհիվ։ Տնտեսագետի կարծիքով հնարավոր է երկու ամիս անց, երբ սեզոնային աշխատանքը վերանա կա՛մ աշխատատեղերի նոր քանակը չի ավելանա, կա՛մ կմնա նույնը։

Աղբյուր` Փաստինֆո