Փաստ ինֆո

Տեղի ունեցող գործընթացները թելադրված են Ադրբեջանի իշխանությունների կողմից, - լրագրողների հետ զրույցում ասել է ՀՀ ԶՈՒ ԳՇ պետի նախկին տեղակալ, գեներալ-լեյտենանք Տիրան Խաչատրյանը՝ անդրադառնալով Տավուշում սահմանազատում իրականացնելու ՀՀ իշխանությունների քայլերին։

Զինվորականն արձանագրել է, որ Տավուշի հանձնվող տեղամասում պաշտպանական հիմքերը քանդվում են, իսկ զիջողական գծից որեւէ դրական սպասում ունենալ հնարավոր չէ։

«Պաշտպանության հիմքերը քանդվում են։ Այսինքն՝ եթե հատուկ օպերացիա պետք է մշակվեր, որպեսզի կայուն շարասյունավորված պաշտպանության մեջ առաջանա Ճեղքվածք, մենք առանց որևէ բանի առաջացնում ենք », - պարզաբանել է Տ. Խաչատրյանը՝ ներկայացնելով առաջնագծից զորքերը հետ քաշելու վտանգները։ Մեկ այլ խնդիր է նաեւ այդտեղ ԱԱԾ սահմանապահների տեղակայումը։ Գեներալ-լեյտենանտի փոխանցմամբ՝ Ադրբեջանի զինված ուժերն ու սահմանապահ զորքերը 2000-ականների սկիզբից գրեթե չեն տարբերվում։Նույնիսկ շատ ավելի լավ են զիված սահմանապահները՝ սպառազինության իմաստով ի տարբերություն զինված ուժերի։

«Իսկ մեր սահմանապահ զորքերը... շատ փակագծեր չբացեմ», - ասաց Տիրան Խաչատրյանը՝նկատելով, որ պետական սահմանի պահպանության հարցում ուժերի հարաբերակցությունը մեզ համար շատ վատ է։
Լրագրողի դիտարկմանը, որ իշխանություններն ասում են, թե հայկական տարածք չեն տալիս, այլ ադրբեջանական են, որոնք պետք է վերադարձվեն՝ Տ. Խաչատրյանը հակադարձեց. «նույն պնդումով վաղը կարող է Երեւանը հանձնեն ու ասեն՝ ոչ մի հայկական տարածք չենք տալիս, իրենցն է, Ալիևի երեկվա հայտարարությունը՝ Վարդենիսի 10 գյուղերի հետ կապված, դրա փայլուն ապացույցն է»։

Արդյոք գեներալը մտադիր է միանալ Տավուշի շարժմանը հարցին արձագանքելով՝ Տ.Խաչատրյանը նշել է. «գործողություններ անելու համար սկզբնաղբյուրը պետք է տեսնենք, որտեղի կատարվում է այդ ամեն ինչը։ Հիմա ինչ-որ երևույթ գործընթացի մեջ է, մենք պոչից ենք բռնել, մինչեռ երևույթը պետք է հիմքից կտրել, որպեսզի չճյուղարվի»։
Այսօր, ըստ նրա, ցավոք, համախմբում չկա, ամեն մեկը նախաձեռնում է ինչ-որ բան՝ փոշիացնելով հնարավորությունները։ Եւ վստահեցրեց, որ պատրաստակամ է կանգնել կամայական ուժի կողքին։

Աղբյուր` Փաստինֆո