Փաստ ինֆո

Այսօր երեկոյան մի խումբ քաղաքացիներ փակել են նաեւ Երևան-Աշտարակ ավտոճանապարհը։

Նկատենք, որ օրվա ընթացքում տեղի են ունեցել ցանցային տարբեր անհնազանդության ակցիաներ՝ թե հանրապետության, թե մայրաքաղաքի տարբեր հատվածներում։

Արդյունքում՝ երկրորդ պլան մղվեց ապրիլի 24-ին իշխանամերձ շրջանակների կողմից տեղեկատվական դաշտ նետված տեղեկատվական հոսքերը՝ որոնք ակնհայտորեն ուղղված էին շեղել ուշադրությունը՝ Տավուշում տեղի ունեցող իրադարձություններից։

Ցանցային անհնազանդության ակցիաներին իշխանության արձագանքը եղել է բավական կոշտ, սակայն ակնհայտ է, որ թերեւս կարմիր ու սեւ բերետավորների ուժերը չեն բավականացնի թե մարզերում, թե մայրաքաղաքում հնարավոր ակցիաները ճնշելու համար։

Ինչպես արդեն հայտնել ենք՝ ապրիլի 19-ին տեղի է ունեցել Հայաստանի և Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովների 8-րդ հանդիպումը, որի արդյունքում արձանագրություն է ստորագրվել եւ համաձայնեցվել են սահմանագծի առանձին հատվածները, անմիջականորեն Բաղանիս (ՀՀ) – Բաղանիս Այրում (ԱՀ), Ոսկեպար (ՀՀ) – Աշաղը Ասկիպարա (ԱՀ), Կիրանց (ՀՀ) – Խեյրումլի (ԱՀ) և Բերքաբեր (ՀՀ) – Կըզըլ Հաջիլի (ԱՀ) բնակավայրերի միջև՝ Խորհրդային Միության փլուզման պահի դրությամբ գոյություն ունեցող իրավաբանորեն հիմնավորված միջհանրապետական սահմանին համապատասխանեցնելու նպատակով։ 4 գյուղ, որոշ ճանապարհներ ու անգամ գերեզմանատներ ՀՀ իշխանությունները մտադիր են հանձնել Ադրբեջանին, ինչը լուրջ անհանգստություն է առաջացրել Տավուշում, քանի որ այդպիսով կարեւոր ենթակառուցվածքներ կանցնեն ադրբեջանական հսկողության տակ, պաշտպանական առաջնագիծն ամբողջությամբ կփլուզվի։

Արդեն 7 օր է՝ Տավուշում ակցիաներ են, որն այսօր արդեն սկսվել է տարածվել նաեւ մյուս մարզերում։

Աղբյուր` Փաստինֆո