Փաստ ինֆո

Միջազգային կառույցների գնահատականով կորոնավիրուսի պատճառով աշխարհում կանխատեսվում է լավագույն դեպքում ՀՆԱ-ի 2 տոկոս նվազում, իսկ վատագույն դեպքում 8 տոկոս: Հայաստանում որոշ տնտեսագետներ կարծում են ՀՆԱ-ի նվազումը կարող է լինել մինչև 11 տոկոս:

«Փաստինֆո»-ի հետ զրույցում Հայաստանի գործատուների միության նախագահ Գագիկ Մակարյանն ասաց իր հաշվարկներով հնարավոր Հայաստանում ՀՆԱ-_ի 5 տոկոս անկում լինի: Նկատենք, որ մեր ՀՆԱ-ի զգալի մասն են կազմում ծառայությունները, սպասարկման ոլորտը, տուրիզմը, որոնք ամենաթիրախային ոլորտները դարձան կորոնավիրուսի համաճարակի ընթացքում: Հետևաբար կորոնավիրուսից հետո դասեր պետք է քաղել, թե հատկապես որ ուղղություններն է անհրաժեշտ զարգացնել: Գագիկ Մակարյանը գտնում է առաջին շեշտադրումը պետք է դրվի ներմուծումը տեղական արտադրություններով փոխարինելու վրա, ինչի շնորհիվ որոշ ընկերություններ կգնան վերապրոֆիլացման ճանապարհով. «Աշխարհում շատ են դեպքերը, երբ կառավարության հանձնարարականով մի շարք ընկերություններ, որոնք ուրիշ բան էին արտադրում, այժմ զբաղվում են օրինակ շնչառական սարքեր, դիմակների կամ քիմիական նյութերի արտադրությամբ: Այսինքն պետք է վերապրոֆիլացում լինի և պետությունն ինքն էլ օգնի: Մենք նույնպես ունենք տարբեր փոքր քիմիական արտադրություններ: Խնդիր պետք է դրվի, թե ինչ արտադրանք թողարկել: Օրինակ այսօր կարող ենք ախտահանիչ նյութերը ոչ թե դրսից բերել, այլ ինքներս ունենանք: Բայց այս ամենը հիմա պետք է արվի, որպեսզի այդ արտադրանքն այս տարի օգտագործենք: Եթե համաճարակը պետք է ավարտվի և նոր հաջորդ տարի սկսենք արտադրել ու չիմանանք ում ենք ծախելու, ճիշտ չէ դա»,-ասաց Գագիկ Մակարյանը:

Ըստ նրա երկրորդ ուղղությունը դա տեղական հագուստին խթանելն է: Տնտեսագետի խոսքով ունենք բավականին լավ տեքստիլ գործարաններ և չպետք է թողնենք, որ այդ գործարանները տուժեն: Հակառակը նրանց արտադրանքը պետք է ուղղենք դեպի ներքին շուկա. «Կարևոր է նաև գյուղատնտեսությունը, որ ինքնաբավ պարենային անվտանգություն ապահովենք Հայաստանին: Հայաստանը նաև կարող է միանալ Համաշխարհային պարենի անվտանգության ծրագրին և այլ երկրներին մատակարարել: Կորոնավիրուսի պատճառով շատ երկրներում նույնպես բազմաթիվ ծրագրեր հետ են ընկել, գյուղատնտեսությունը հետ է ընկել, կարող է սննդի դեֆիցիտ լինի և այս տեսանկյունից Հայաստանը կարող է մատակարարող լինել»,-նշեց Գագիկ Մակարյանը:

Վերջինս ընդգծեց` հետկորոնավիրուսային շրջանում հարկավոր է մի շարք օրենքներում փոփոխություններ իրականացնել, որպեսզի գործարար միջավայրն ավելի պարզեցվի և բարելավվի. «Հաշվի առնենք, որ հիմա բիզնեսների մեծ մասը հիվանդ է, հետևաբար այս պայմաններում պետք է որոշ օրենքների պահանջներ թուլացնել, պարզեցնել, լավացնել: Ընդ որում մենք առաջարկել ենք վերանայել «Սնանկության մասին» օրենքը, որովհետև շատ ընկերություններ կարող են սնանկության մեջ հայտնվել կամ ինքնասնանկ ճանաչվել: Բացի այդ պետք է բարելավվի նաև «Գնումների մասին» օրենքը: Պետությունը պետական գնումների միջոցով կարող է ակտիվ մասնակցել վերականգնման պրոցեսներին»,-հավելեց Գագիկ Մակարյանը:

Հեղինակ՝ Հասմիկ Կոշկարյան

Աղբյուր` Փաստինֆո