Փաստ ինֆո

Մարաշի զինված խմբի գործով այսօրվա դատական նիստում պաշտպանական կողմը միջնորդեց թվով ութ ամբաստանյալի խափանման միջոց կալանավորումը վերացնել կամ անազատության հետ չկապված այլ խափանման միջոց ընտրել կամ գրավ կիրառել:

Մասնավորապես, նման միջնորդություններով հանդես եկան ամբաստանյալներ Արթուր Վարդանյանի, Էդվարդ Ներսիսյանի, Վլադիմիր Առաքելյանի, Վահան Շիրխանյանի, Խաչիկ Ավետիսյանի, Գևորգ Ջնդոյանի, Արա Պողոսյանի ու Հարություն Սարիբեկյանի պաշտպանները:

Պաշտպանների մի մասը իրենց միջնորդությունների հիմքում դրեցին իրենց պաշտպանյալների՝ Վահան Շիրխանյանի, Էդվարդ Ներսիսյանի, Արա Պողոսյանի առողջական վատթար վիճակը: Պաշտպանները նշեցին նաև, որ երկրում իրավիճակ է փոխվել: Նման պայմաններում, նշեց Գառնիկ Մարգարյանի պաշտպան Հովիկ Արսենյանը, մեղադրանքը պետք է հիմնովին վերաորակված լիներ, չի կարող լինել իշխանության զավթում, երբ նախկին իշխանությունն արդեն գոյություն չունի: Ըստ պաշտպանի, այս գործը հարուցելու նպատակն ոչ թե անձանց պատասխանատվության ենթարկելն է, այլ հասարակությունը վախի մեջ պահելը:

Իսկ ամբաստանյալ Արթուր Վարդանյանը հայտարարեց, որ այստեղ հանցագործ չկա, կալանքը պահպանելով «մահապատժի եք ենթարկում մարդկանց, սպանում նրանց, շարունակում եք վրեժխնդիր լինել նախորդ իշխանության համար»:

Նշվեց նաև, որ գործով ազատության մեջ գտնվող ութ ամբաստանյալի պարագայում թաքնվելու կամ քննությանը խոչընդոտելու որևէ խնդիր չի առաջացել: Ոչ ոք չի փախչի, որպեսզի ստանան իրենց արդարացումը, ասաց պաշտպանական կողմը:

Վահան Շիրխանյանի պաշտպան Հայկ Ալումյանը միջնորդությունից բացի նաև ներկայացրեց «Գերագույն խորհուրդ» պատգամավորական ակումբի միջնորդագիրը, որով ակումբի անդամները երաշխավորում են Վ.Շիրխանյանի ազատ արձակվելու դեպքում նրա օրինական վարքագիծը ու պատրաստակամություն են հայտնում ստանձնել երաշխավորի պարտականությունները:

Մեղադրանքի կողմը բոլոր միջնորդությունների առնչությամբ նույնաբովանդակ դիրքորոշում էր հայտնում՝ կալանավորման հիմքերը շարունակվում են պահպանվել, միջնորդությունն անհիմն է:

Դատարանը հեռացավ խորհրդակցական սենյակ՝ որոշումներ կայացնելու:

Աղբյուր` Փաստինֆո