Փաստ ինֆո

Մարաշի զինված խմբի գործով այսօրվա դատական նիստում փաստաբան Սիրուշ Աղվանյանը միջնորդեց դադարեցնել իր պաշտպանյալներ Արթուր Վարդանյանի և Անտոն Թոթոնջյանի քրեական հետապնդումը: Ըստ պաշտպանի, գործի քննությունը հանձնարարվել է ՀՀ ԱԱԾ քննչական վարչությանը օրենքի խախտմամբ:

Մասնավորապես, Ս.Աղվանյանը նշեց, որ այդ մասին գրությունը ստորագրվել է Գլխավոր դատախազի տեղակալն, ով ըստ իրենց հարցմանը Գլխավոր դատախազության պատասխանի, այդ ժամանակահատվածում չի եղել Գլխավոր դատախազի պաշտոնակատար: Ուստի փաստաբանը միջնորդեց նաև խախտման հետ կապված դիմել Գլխավոր դատախազին քրեական գործ հարուցելու համար:

Գործով ամբաստանյալ, ՀՀ նախկին փոխվարչապետ և Պաշտպանության նախկին փոխնախարար Վահան Շիրխանյանի պաշտպան Հայկ Ալումյանը նշեց, որ Ս.Աղվանյանի միջնորդությունը հիմնավոր է և որ միջնորդությունը վերաբերվում է ոչ միայն գործընկերուհու պաշտպանյալներին, այլ ամբողջ գործին, քանի որ դրա քննությունն ԱԱԾ-ի քննչական վարչությանը հանձնարարելը տեղի է ունեցել օրենքի խախտմամբ:

Դատարանը պաշտպանին խնդրեց տրամադրել փաստաբանական հարցման իրենց գրությունը, դատարանն էլ իր հերթին կդիմի ՀՀ դատախազությանը՝ պարզելու նշված ժամանակահատվում Գլխավոր դատախազի տեղակալն եղել է Գլխավոր դատախազի պաշտոնակատար, թե ոչ: Միջնորդության քննարկումը հետաձգվեց և կշարունակվի հաջորդ դատական նիստում:

Այսօրվա դատական նիստում նորից հառնեց ամբաստանյալ Վաղինակ Ստեփանյանի պաշտպանական իրավունքին առնչվող հարցը: Ըստ Հանրային պաշտպանի գրասենյակից ստացված գրության, ամբաստանյալի նախկին պաշտպան Լյուդվիգ Ավետիսյանը ծանրաբեռնված է այլ գործերով, այդ պատճառով ՀՊԳ ղեկավարի որոշմամբ նա փոխարինվել է այլ հանրային պաշտպանով՝ ամբաստանյալի պաշտպան է նշանակվել Անժելիկա Հակոբյանը, ով ներգրավված է գործով նաև որպես այլ ամբաստանյալի պաշտպան:

Անժելիկա Հակոբյանը հիշեցրեց դատարանին, որ ամբաստանյալը հրաժարվել է իր ծառայություններից, ինքն էլ նրա մասով գործի վարույթը հանձնել է Հանրային պաշտպանի գրասենյակ և իր տրամադրության տակ չունի ՀՊԳ համապատասխան որոշումը:

Պաշտպան Հայկ Ալումյանը հայտարարեց, որ պաշտպանական իրավունքը պատրանքային իրավունք չէ, չի կարելի համարել, որ փաստաբանն անձի պաշտպանություն է իրականացնում, եթե ոչ մի անգամ նա առանձնատեսակցություն չի ունեցել իր պաշտպանյալի հետ, մարտավարություն չի մշակել նրա հետ: Պետությունը պատասխանատու է պաշտպանության որակի համար, ասաց Հայկ Ալումյանը:

Ամբաստանյալն իր հերթին նորից պնդեց, որ հրաժարվում է Անժելիկա Հակոբյանի ծառայություններից, տղամարդ հանրային պաշտպան է ուզում: Ու թեև դատարանը նրան պարզաբանեց, որ հանրային պաշտպանին նշանակում է կառույցի ղեկավարը և եթե ամբաստանյալը հրաժարվում է հանրային պաշտպանից, ապա հրաժարվում է հանրային պաշտպանությունից ընդհանրապես, ամբաստանյալը մնաց իր դիրքորոշմանը:

Դատարանը որոշեց դիմել Հանրային պաշտպանի գրասենյակին՝ հարցին լուծում տալու նպատակով, դատական նիստը հետաձգվեց:

Աղբյուր` Փաստինֆո