Փաստ ինֆո

Մարաշի զինված խմբի գործի քննությունը ՀՀ ԱԱԾ քննչական վարչությանը հանձնարարած ՀՀ գլխավոր դատախազի տեղակալ Արմեն Հարությունյանը այդ ժամանակ եղել է ՀՀ գլխավոր դատախազի պաշտոնակատար: Այս մասին ՀՀ գլխավոր դատախազության պատասխանը հրապարակվեց գործով այսօրվա դատական նիստում:

Ավելի վաղ փաստաբան Սիրուշ Աղվանյանը միջնորդել էր դադարեցնել իր պաշտպանյալներ Արթուր Վարդանյանի և Անտոն Թոթոնջյանի քրեական հետապնդումը: Ըստ պաշտպանի, գործի քննությունը հանձնարարվել է ՀՀ ԱԱԾ քննչական վարչությանը օրենքի խախտմամբ, այն է՝ համապատասխան գրությունը ստորագրվել է Գլխավոր դատախազի տեղակալի կողմից, ով ըստ իրենց հարցմանը Գլխավոր դատախազության պատասխանի, այդ ժամանակահատվածում չի եղել Գլխավոր դատախազի պաշտոնակատար:

Այսօրվա դատական նիստում շարունակվեց գործի գրավոր ապացույցների հետազոտումը: Ի թիվս դրանց՝ հրապարակվեց Մարաշի տնից առգրավված իրերի զննության արձանագրությունը:

Առգրավված նյութերի թվում էին, մասնավորապես, Գյումրիի ու Երևանի քարտեզները՝ նշումներով, Սահմանադրական դատարանի գծագիրը: Որոշ օբյեկտների, օրինակ՝ Սահմանադրական դատարան, հեռուստաաշտարակ, Զվարթնոց օդանավակայան, դիմաց պլյուս նշան էր դրված, իսկ որոշների, օրինակ, կառավարության շենք, Հանրապետության հրապարակ, դիմաց դրված էր շրջանակ՝ առանց նշման:

Առգրավված իրերի թվում էին նաև «Հայոց վահան» կազմակերպության երդման տեքստը, կազմակերպության կանոնադրությունը: Կային նշումներ խմբի անդամների ծածկանունների, տրամադրության տակ եղած զենքերի, խմբի ծախսերի մասին:

Զննության արձանագրության մեջ ներառված է նաև Արթուր Վարդանյանի ուղերձի տեսագրությունն, որով ըստ նախաքննական մարմնի, նա պետք է հանդես գար բռնությամբ իշխանությունը զավթելուց հետո: Նախաքննական մարմինն առգրավել է Արթուր Վարդանյանի և ևս 9 անձի համատեղ լուսանկարը՝ դիմակներով, ինչպես նաև Արթուր Վարդանյանի լուսանկարը եկեղեցու ֆոնի վրա եկեղեցականի համազգեստով:

Արթուր Վարդանյանը դժգոհություն հայտնեց, որ մեղադրող կողմը ներկայացնում է բոլոր այն տվյալները, որոնք իրեն հետաքրքիր են եղել ներկայացնելու համար՝ զենք, զինամթերք, հանցագործ: Ըստ ամբաստանյալի, մեղադրող կողմը այլ տեղեկություններ տետրերում չի գտել՝ 64 մլրդ դոլարի թալանի, ապրիլյան պատերազմի, Ցեղասպության, ցույցեր կազմակերպելու իրավունքի, Արցախի 5 շրջանները վերադարձնելու և այլնի մասին: Արթուր Վարդանյանը հարց բարձրացրեց նաև ինչպես է նախաքննական մարմինը որոշել, որ որոշակի հեռախոսահամարներ գաղտնի, իսկ մյուսները հիմնական են, եթե ավելի շատ գաղտնի է, ո՞նց է գաղտնի:

Իսկ ամբաստանյալ Արա Պողոսյանը հայտարարեց, որ զննության արձանագրության մեջ նշված է, որ իր աշխատանքային համազգեստը առգրավվել է Մարաշի տնից, մինչդեռ այն առգրավվել է իր տնից:

Արա Պողոսյանը դատարանի ուշադրությունը հրավիրեց նաև այն հանգամանքի վրա, որ իր ու Էդվարդ Ներսիսյանի հեռախոսազրույցները գաղտնալսվել են՝ առանց գաղտնալսման սանկցիա ունենալու:

Դատարանն երկու ամբաստանյալի նախազգուշացում հայտարարեց. Արթուր Վարդանյանին՝ մեղադրողների հասցեին վիրավորանք հնչեցնելու, Վաղինակ Ստեփանյանին՝ զրուցելու համար: Թեև զրույցի պատասխանատությունը ստանձնեց մեկ այլ ամբաստանյալ, այդուհանդերձ, դատարանը գտավ, որ նախազգուշացումն ունի ճիշտ հասցեատեր: Վ.Ստեփանյանը հայտարարեց՝ «հանգիստ խոսում ենք, որտեղ գնանք խոսենք»:

Ի դեպ հետազոտված փաստաթղթերի մեջ էին նաև Վաղինակ Ստեփանյանի վերաբերյալ դրական բնութագրերը: Վ.Ստեփանյանը մասնակցել է Հայաստանի սահմաններին ու Արցախում ինքնապաշտպանական մարտերին, բազմիցս վիրավորվել ու ստացել պարգևներ:

Հաջորդ դատական նիստում գործի նյութերի հետազոտումը կշարունակվի:

Լուսանկարը՝ Ֆոտոլուրի

Աղբյուր` Փաստինֆո