Փաստ ինֆո

Մեր խնդիրն այն է, որ ամբողջ հասարակությունը ոտքի կանգնի և սա դառնա համազգային պայքար, որովհետև սա հայրենիքի խնդիր է, քաղաքական գաղափարախոսությունների պայքար չէ։ Քաղաքական ծրագրերի, առավել ևս քաղաքական անհատների պայքար չէ։ Այստեղ կորցնելու ենք բոլորս՝ մեկ մարդու նման։ «Փաստինֆո»-ի հետ զրույցում ասել ՀՀԿ ԳՄ անդամ Արտակ Զաքարյանը՝ խոսելով Նիկոլ Փաշինյանի նախաձեռնած ապօրինի սահմանազատման դեմ տավուշյան շարժման մասին։

Ա. Զաքարյանը ընդգծեց, որ սահմանազատման ու սահմանագծման անվան տակ իրականացվող գործընթացի հետեւանքով ՀՀ բոլոր քաղաքացիներն են կորցնելու, հետևաբար այս կործանիչ գործընթացի դեմն առնելու համար բոլորը պետք է մասնակից լինեն բոլորը։

«Սա ամենօրյա աշխատանք է, քաղաքական ուժերն իրենց աշխատանքը պետք է անեն, քաղաքացիական ակտիվիստներն՝ իրենցը, լրատվամիջոցներն՝ իրենցը, հասարակությունը, իրավապաշտպանները, սփյուռքը, եկեղեցին , պետական կառույցները, ոչ պետական կառույցները, բոլորը պետք է աշխատեն այս ուղղությամբ։ Այնպես չէ, որ հասարակության մի հատվածը խնդիր ունի, իսկ մի հատվածն էլ հենց այնպես իր համար ապրում է, բոլորն էլ մտահոգ են։ Չմտահոգված քաղաքացի, իմ տպավորությամբ, չունենք,ուղղակի բոլորը պետք է պայքարի մասնակից դառնան»,-վստահեցրեց ՀՀ ԱԺ նախկին պատգամավորը։

Արտակ Զաքարյանի փոխանցմամբ՝ բոլոր ուսումնասիրությունները, սոցհարցումները վկայում են, որ բնակչությունը խորապես մտահոգված է ստեղծված իրավիճակով, մարդկանց հուզող հիմնական հարցը հետեւյալն է՝ ե՞րբ է դրվելու կապիտուլյացիոն այս քաղաքականությանը վերջը, բայց սա պետք է լինի միասնական գործընթացի արդյունքում։

«Սա մարդկանց մեկ խմբից կախված գործընթաց չէ, աշխարհը պետք է տեսնի, որ հայ ժողովուրդը չի հանդուրժում այսպես միակողմանի զիջումները, չի հանդուրժում իր պետության մեջ, իր երկրում անվտանգ ապրելու դեմ ուղված գործողությունները, չի հանդուրժում հարևան պետության կողմից լկտի պահանջները, չի հանդուրժում իր իսկ, այսպես կոչված, իշխանությունների պարտվողական , նահանջողական, խուսափողական, վախկոտ քաղաքականությունը»,- նշել է Ա. Զաքարյանը։

Ավելին, գործիչն արձանագրել է, որ անգամ այս զիջողական քաղաքականությունը չի բացառում պատերազմի հավանականությունը։ «Մենք նաև պետք է կայուն, երկարատև և վստահելի խաղաղության մասին հիմա մտածենք։Եվ այս շարժումը նաև դրան է ուղղված։Տարածքներ տալով՝ խաղաղություն չեն նվաճում։Չկա պատմության մեջ նման օրինակ»,- նշեց Արտակ Զաքարյանը՝ ընդգծելով, որ խոսքն ամենեւին չի գնում շարժման առաջնորդության մասին, այլ՝ աջակցության։

Տավուշի շարժման առաջնագծում Բագրահ Սրբազանն է, փաստացի, եկեղեցին է առաջնորդում, ինչին ի պատասխան Ա. Զաքարյանը փաստեց, որ պահն օրհասական է, եկեղեցին հրապարակային իր մտահոգությունը հայտնել է, եկեղեցին էլ մեր հասարակության անբաժանելի մասն է։

Նույն հասարակությանը մեծապես հետաքրքրում է քաղաքական առաջնորդության հարցը, քանի որ եկեղեցին կարող է առաջնորդել հայապահպանությանն ուղղված շարժումը, բայց ոչ երբեք՝ քաղաքական պատասխանատվություն։ ՀՀԿ-ն այսօր ներկայացված է ՀՀ ԱԺ-ում «Պատիվ ունեմ» խմբակցության կազմում, արդյոք պատրաստ են կիսել քաղաքական առաջնորդության պատասխանատվությունը։ Ի պատասխան Ա. Զաքարյանը նշեց՝ «Լիդերը արհեստական հասկացություն չէ։ Մենք տեսանք, թե արհեստական լիդերները ուր են տանում երկիրը։ Արհեստական, պարտադրված լիդերներ չպետք է լինեն։Մենք վաղուց արդեն մատնանշել ենք, ուղին ՝ գոյություն ունի ԱԺ, հանրային ճնշման տակ Աժ-ն Սահմանադրությամբ իրավասու է իրականացնել կառավարության փոփոխություն։ Եվ դա ճանաչելի կլինի ամբողջ աշխարհի կողմից։ Զանգվածները պետք է լինեն փողոցում»։

Ճիշտ է, ընդդիմությունն այսօր խորհրդարանում չունի մեծամասնություն ու բավարար ձայներ՝ Փաշինյանին անվստահության գործընթաց սկսելու համար, սակայն նա չբացառեց հասարակական լայն զանգվածների հանրային ճնշման ներքո իշխող խմբակցության առանձին պատգամավորների՝ ժողորվդին միանալը՝ իմպիչմենտին։

«Մտահոգված քաղաքացիների բազմությունն այնքան պետք է լինի փողոցում, շարժումն այնքան պետք է թափ հավաքի, որ ԱԺ-ում դա հնարավոր լինի իրականացնել՝ Սահմանադրությամբ նախատեսված ընթացակարգով»,- նշել է Զաքարյանը՝ կարեւորելով իշխանափոխության գործընթացում ժողովրդավարության եւ օրինականության պահպանումը, որ նոր իշխանության դիրքերը բանակցային գործընթացում ուժեղ լինեն։

Աղբյուր` Փաստինֆո