Փաստ ինֆո

Եթե ընդունենք, որ սյուները շարելով հնարավոր է դելեգիտիմիզացնել Ադրբեջանի կողմից սանձազերծվելիք պատերազմը, կարելի է ասել, որ դա մոլորություն է։ Մինչ օրս Ադրբեջանի կողմից սանձազերծված պատերազմ եղել է ոչ լեգիտիմ, բռնության տիրույթում՝ հակասելով ինչպես միջազգային իրավունքի նորմերին, այնպես էլ բանականության սահմաններին։ «ՓաստԻնֆոյի» եթերում ասել է ԵՊՀ Սահմանադրական իրավունքի ամբիոնի վարիչ Վարդան Այվազյանը։

Բանախոսի դիտարկմամբ, վարչապետը չպետք է մոռանա իր հայտարարությունը, որով լեգիտիրմացրեց 44-օրյա պատերազմը, երբ հայտարարեց, որ Արցախը Հայաստան է և վերջ։ Հենց դա լեգիտիմացրեց Ադրբեջանի կողմից սանձազերծվող պատերազմը, քանի որ մինչ այդ Արցախի հարցը դրվում էր ազգերի ինքնորոշման տիրույթում, գրեթե անխոցելի էր և համաշխարհային հանրությունը, որպես այդպիսին, ճանաչում էր արցախցիների ինքնորոշման իրավունքը։ Բայց վարչապետի հայտարարությունից հետո այդ խնդիրը տեղափոխվեց տարածքային ամբողջականության տիրույթ։

Ըստ փորձագետի, ինչ վերաբերում է տեղադրված սյուներին, եթե գերտերությունները և միջազգային հանրությունը Ադրբեջանին թույլ տան պատերազմ սանձազերծելու, ապա նման պատճառներ հարյուրներով կարելի է ներկայացնել։ Այսինքն, սա մոլորություն է և խաբկանք, և որևէ իրողության հետ աղերս չունի։

Սահմանազատման և սահմանագծման առնչությամբ բանախոսը նշում է, որ ՀՀ Սահմանադրությունը հստակ ամրագրում է, որ ՀՀ տարածքի ցանկացած փոփոխություն լուծվում է հանրաքվեի միջոցով, ուստի ՀՀ տարածքը ոչ թե Ն․ Փաշինյանի, այլ հայ ժողովրդի սեփականությունն է։ Այս պարագայում, եթե պետք է Ադրբեջանի հետ սահամանագծման և սահմանազատման աշխատանքներ իրականացվեր, ապա պետք է կնքվեր միջպետական համաձայնագիր, խորհրդարաններով վավերացման գործընթաց անցներ և այլն։ Սակայն, եթե չեն անցել այս գործընթացներով, ապա առավելապես պարունակում են իշխանության յուրացման տարրեր։ Իսկ նմանատիպ որակումներ, իրավական գնահատականները և գործընթացները կարելի է իրականացնել միայն իշխանափոխությունից հետո։

Անդրադառնալով Ալմաթիի հռչակագրին, բանախոսը նշեց, որ հռչակագրերը, որպես այդպիսին, պետությունների համար պարտադիր իրավական ուժ չունեն։ Ալմաթիի հռչակագիրը չնչին և ոչ կարևոր նշանակություն է ունեցել։ Արցախը երբևէ չի եղել Մուսավաթական Ադրբեջանի կազմում, որի իրավահաջորդ է համարվում ներկայիս Ադրբեջանը։ Սակայն այսօր իրավունքի ուժը փոխարինված է ուժի իրավունքով։

«Հաշված օրերի ընթացքում իշխանությունները կարողանում են կայծակնային արագությամբ կողոմնորոշվել սյուների դիրքերի վերաբերյալ և տեղադրել դրանք։ Դա փաստում է այն մասին, որ այդ սյուների տեղն ու դիրքը երկար ժամանակահատված առաջ Ադրբեջանական իշխանությունների հետ ձեռք բերված պայմանավորվածությունների արդյունք է»,- ասել է Վ․ Այվազյանը։

Մանրամանսերը՝ տեսանյութում։

Աղբյուր` Փաստինֆո