Փաստ ինֆո

Մարաշի զինված խմբի գործով այսօրվա դատական նիստում շարունակվեց Արթուր Վարդանյանի հեռախոսային խոսակցությունների գաղտնալսման ձայնագրությունների հետազոտումը:

Մասնավորապես, ըստ ձայնագրության, Արթուր Վարդանյանի՝ առանձնացված գործով արդեն իսկ դատապարտված Հակոբ Հակոբյանի հետ հեռախոսազրույցում վերջինս ներկայացնում էր զենքի վաճառքի առաջարկներ՝ ՏՏ – 1400, PK- 2000, կարճ – 1800, փուչիկներ – 90: Ապրանքը պահեստից են բերում, նշում էր Հ.Հակոբյանը: Վերջինիս զրուցակիցն էլ ասում էր՝ ութ հատ մագազին, PK գնդացիր, «տրուբից երկու հատ եմ ուզում»:

Ամբաստանյալ Արթուր Վարդանյանի պաշտպան Լևոն Բաղդասարյանը հայտարարեց՝ սերիալային ձայնագրության ապացուցողական իմաստը ո՞րն է: Ըստ նրա, իր պաշտպանյալը հայտարարել է, որ զենքն իրենն է:

Պաշտպանը հայտարարեց, որ Արթուր Վարդանյանը առողջական վիճակի վատթարացման պատճառով ի վիճակի չէ մասնակցել դատական նիստին: Լևոն Բաղդասարանը դատարանին միջնորդություն ներկայացրեց՝ հնարավորություն տալ իր պաշտպանյալին քաղաքացիական հիվանդանոցում համալիր բուժում ստանալ:

Ըստ պաշտպանի, ամբաստանյալի համար պատասխանատու է ոչ միայն քրեակատարողական հիմնարկը, որտեղ նա պահվում է, այլև դատարանը, որտեղ նրա վերաբերյալ գործ է լսվում: Հակառակ դեպքում, մի առավոտ էլ կարող է Արթուր Վարդանյանը հրաժեշտ տա կյանքին, այդ դեպքում յուրաքանչյուրն իր չափով պիտի պատասխան տա, ասաց պաշտպանը:

Լ.Բաղդասարյանը նշեց, որ շուրջ մեկ տարի է, ինչ Արթուր Վարդանյանի առողջությունը վատթարացել է, ավելին՝ նրա կյանքին վտանգ է սպառնում: Առողջությունից գանգատները բազմաթիվ են՝ ջերմության, ճնշման տատանումներ, գիտակցության կորուստ, դեպքեր են լինում, որ նա արթնանում է շնչահեղձությունից, աչքերի մեջ դեղնածությունն ավելացել է: Բժիշկները նրա մոտ ախտորոշել են բրոնխիտ ու տոնզիլիտ, առկա է առողջական վիճակի բացասական դինամիկա:

Դատարանն իր հերթին հավելեց, որ ըստ բժիշկների, ամբաստանյալը դեղորայքային բուժումը ստացել է ամբողջությամբ: Դատարանը միաժամանակ տեղեկացրեց, որ միջնորդությունը կուղարկվի քրեակատարողական հիմնարկ:

Ի դեպ, մինչև դատական նիստի սկսվելը դատարանը Արթուր Վարդանյանի համար շտապօգնություն էր կանչել: Դատարանը՝ բավարարելով պաշտպանի միջնորդությունը, որոշեց դատական նիստը հետաձգել: Արձագանքելով որոշմանը՝ ամբաստանյալ Էդվարդ Ներսիսյանը հայտարարեց՝ կարող ա մի քանի տարի մնանք ստեղ:

Լուսանկարը՝ Ֆոտոլուրի

Աղբյուր` Փաստինֆո