Փաստ ինֆո

ՀՀ Սյունիքի մարզի ընդհանուր իրավասության դատարանը՝ դատավոր Արսեն Սարդարյանի նախագահությամբ, երկրորդ դատաքննության արդյունքում այսօր արդարացրել է, ճանաչել ու հռչակել է փաստաբան Արշավիր Խալափյանի անմեղությունը ՀՀ քրեական օրենսգրքի 200-րդ հոդվածի 3-րդ մասով՝ առևտրային կաշառք, առաջադրված մեղադրանքում: Այս մասին «Փաստինֆո»-ի լրագրողին հայտնեց փաստաբան Արմինե Ֆանյանը՝ հավելելով, որ փաստաբանն արդարացվել է հանցակազմի բացակայության հիմքով: Գործընկերոջ պաշտպանությունն իրականացնում էին ՀՀ փաստաբանների պալատի նախագահ Արա Զոհրաբյանը՝ փաստաբան Արմինե Ֆանյանի հետ համատեղ:

Հիշեցնենք, որ առաջին դատաքննության արդյունքում Սյունիքի մարզի առաջին ատյանի դատարանը՝ դատավոր Նապոլեոն Օհանյանի նախագահությամբ, ճանաչել և հռչակել էր փաստաբան Արշավիր Խալափյանի անմեղությունը՝ ՀՀ քրեական օրենսգրքի 200-րդ հոդվածի 3-րդ մասով՝ առևտրային կաշառք ստանալը՝ (1-ին դրվագով), և նրան արդարացրել` ապացույցների անբավարարության (հանցագործությանն ամբաստանյալի մասնակցությունն ապացուցված չլինելու) հիմքով:

Իսկ ՀՀ քրեական օրենսգրքի 200-րդ հոդվածի 3-րդ մասով (երկրորդ դրվագով) Արշավիր Խալափյանը մեղավոր է ճանաչվել և դատապարտվել 1 տարվա ազատազրկման:

ՀՀ վճռաբեկ դատարանը մեղադրանքի հիշյալ երկրորդ դրվագով առաջին ատյանի դատարանի մեղադրական դատավճիռն ու այն ուժի մեջ թողնելու մասին Վերաքննիչ դատարանի որոշումը բեկանել էր և այդ մասով գործն ուղարկել Սյունիքի մարզի առաջին ատյանի դատարան՝ նոր քննության:

Վճռաբեկ դատարանն, այդպիսով, մասնակի բավարարել էր Ա.Խալափյանի պաշտպանների՝ ՀՀ փաստաբանների պալատի նախագահ Արա Զոհրաբյանի ու փաստաբան Արմինե Ֆանյանի, բողոքները: Պաշտպանական կողմը միջնորդել էր երկրորդ դրվագով բեկանել դատական երկու ատյանների դատական ակտերը, հանցակազմի բացակայության հիմքով Ա.Խալափյանին արդարացնել, ճանաչել ու հռչակել նրա անմեղությունը ՀՀ քրեական օրենսգրքի 200-րդ հոդվածի 3-րդ մասով առաջադրված մեղադրանքում:

Աղբյուր` Փաստինֆո