Փաստ ինֆո

ՀՀ վճռաբեկ դատարանն այսօր որոշեց առևտրային կաշառք ստանալու մեջ (երկրորդ դրվագով) մեղադրվող փաստաբան Արշավիր Խալափյանի վերաբերյալ առաջին ատյանի դատարանի դատավճիռն ու այն ուժի մեջ թողնելու մասին Վերաքննիչ դատարանի որոշումը բեկանել և այդ մասով գործն ուղարկել Սյունիքի մարզի առաջին ատյանի դատարան՝ նոր քննության: Նրա նկատմամբ կիրառված գրավը թողնվեց անփոփոխ:

Վճռաբեկ դատարանն, այսպիսով, մասնակի բավարարեց Ա.Խալափյանի պաշտպանների՝ ՀՀ փաստաբանների պալատի նախագահ Արա Զոհրաբյանի ու փաստաբան Արմինե Ֆանյանի, բողոքները: Պաշտպանական կողմը միջնորդել էր երկրորդ դրվագով բեկանել դատական երկու ատյանների դատական ակտերը, հանցակազմի բացակայության հիմքով Ա.Խալափյանին արդարացնել, ճանաչել ու հռչակել նրա անմեղությունը ՀՀ քրեական օրենսգրքի 200-րդ հոդվածի 3-րդ մասով առաջադրված մեղադրանքում:

Արա Զոհրաբյանը դատական նիստում նշեց, որ Փաստաբանների պալատում կարգապահական վարույթ է հարուցվել հենց այս դրվագով, եթե նույնիսկ պարզվի, որ խախտում կա, ապա դա հաստատ քրեական պատասխանատվության ենթակա հարց չէ:
Արշավիր Խալափյանն իր հերթին նշեց, որ իր կարծիքով որևէ խախտում իր կողմից թույլ չի տրվել՝ օրենքը չի արգելում իրեն պաշտպանել իր՝ քաղաքացու, սեփականատիրական իրավունքը:

Ինչպես «Փաստինֆո»-ի լրագրողի հետ զրույցում նշեց Արա Զոհրաբյանը, քրեական գործի շրջանակներում պարզվել էր, որ Արշավիր Խալափյանը որպես փաստաբան չէր ներկայացրել որևէ վստահորդի շահերը, իսկ քրեական գործի նյութերով, իբրև, Ա.Խալափյանը հակառակորդ կողմից գումար էր պահանջել, և դա համարվել էր առևտրային կաշառք:

«Մինչդեռ փաստաբանը կարող է այդ առևտրային կաշառքի հատուկ սուբյեկտ լինել մի դեպքում, եթե նա ունի վստահորդ: Այսինքն՝ այդպիսին է տրամաբանությունը՝ փաստաբանն հակառակ իր վստահորդի շահերի, հակառակ կողմից գումար է վերցնում և դավաճանում իր վստահորդի շահերին»,- ասաց Ա.Զոհրաբյանը: Պաշտպանն ընդգծեց, որ այս գործի նյութերով պարզվում է, որ Արշավիր Խալափյանն անձամբ ինքն է եղել վեճի կողմ՝ իրեն սեփականության իրավունքով պատկանող տարածքի բակում ավտոտնակի ապօրինի շինարարության առնչությամբ, և նույնիսկ եթե ինքը գումար է պահանջել, դա նույն տրամաբանությամբ կարող էր լինել որպես հաշտության համաձայնության պայման: «Չէ՞ որ կողմերը դատական վեճի կամ վեճի արդյունքում կարող են հաշտվել նաև գումարի վճարման պայմաններում: Ստացվում է, որ եթե իր գործով հաշտության համաձայնություն կնքի մյուս կողմի հետ, դա կհամարվի առևտրային կաշառք»,- նշեց Ա.Զոհրաբյանը:

Հիշեցնենք, որ Սյունիքի մարզի առաջին ատյանի դատարանը՝ դատավոր Նապոլեոն Օհանյանի նախագահությամբ, ճանաչել և հռչակել է փաստաբան, ամբաստանյալ Արշավիր Խալափյանի անմեղությունը՝ ՀՀ քրեական օրենսգրքի 200-րդ հոդվածի 3-րդ մասով՝ առևտրային կաշառք ստանալը՝ (1-ին դրվագով), և նրան արդարացրել` ապացույցների անբավարարության (հանցագործությանն ամբաստանյալի մասնակցությունն ապացուցված չլինելու) հիմքով:

Իսկ ՀՀ քրեական օրենսգրքի 200-րդ հոդվածի 3-րդ մասով (երկրորդ դրվագով) Արշավիր Խալափյանը մեղավոր է ճանաչվել և դատապարտվել 1 տարվա ազատազրկման:

Աղբյուր` Փաստինֆո