Փաստ ինֆո

ՀՀ վճռաբեկ դատարանի կողմից բեկանվելուց և նոր քննության համար առաջին ատյանի դատարան ուղարկված՝ փաստաբան Արշավիր Խալափյանի գործի քննությունն ընթացքի մեջ է: Մասնավորապես, ներկայումս դատարանում հետազոտվում են գործի գրավոր ապացույցները:

Ինչպես «Փաստինֆո»-ին հայտնեց Արշավիր Խալափյանի պաշտպան Արմինե Ֆանյանը, նոր դատաքննության ընթացքում մեղադրողը որոշել էր վերաորակել Արշավիր Խալափյանի մեղադրանքը:

Մասնավորապես, դեպի վատթարացում շրջադարձի արգելքի պայմաններում մեղադրողը փորձել է առևտրային կաշառքի մեղադրանքի փոխարեն առաջադրել ավելի խիստ մեղադրանք ՀՀ քրեական օրենսգրքի 182-րդ հոդվածի 2-րդ մասի 3.1 կետով՝ խոշոր չափերով շորթում: Փորձը պաշտպանական կողմի ջանքերով դատարանում տապալվել է՝ Արշավիր Խալափյանի պաշտպանությունն իրականացնում են ՀՀ փաստաբանների պալատի նախագահ Արա Զոհրաբյանը և հանրային պաշտպան Արմինե Ֆանյանը:

Հիշեցնենք, որ առաջին դատաքննության արդյունքում Սյունիքի մարզի առաջին ատյանի դատարանը՝ դատավոր Նապոլեոն Օհանյանի նախագահությամբ, ճանաչել և հռչակել է փաստաբան, ամբաստանյալ Արշավիր Խալափյանի անմեղությունը՝ ՀՀ քրեական օրենսգրքի 200-րդ հոդվածի 3-րդ մասով՝ առևտրային կաշառք ստանալը՝ (1-ին դրվագով), և նրան արդարացրել` ապացույցների անբավարարության (հանցագործությանն ամբաստանյալի մասնակցությունն ապացուցված չլինելու) հիմքով:

Իսկ ՀՀ քրեական օրենսգրքի 200-րդ հոդվածի 3-րդ մասով (երկրորդ դրվագով) Արշավիր Խալափյանը մեղավոր է ճանաչվել և դատապարտվել 1 տարվա ազատազրկման:

Վճռաբեկ դատարանն էլ առաջին ատյանի դատարանի դատավճիռն ու այն ուժի մեջ թողնելու մասին Վերաքննիչ դատարանի որոշումը բեկանել էր և այդ մասով գործն ուղարկել Սյունիքի մարզի առաջին ատյանի դատարան՝ նոր քննության:

Վճռաբեկ դատարանն, այսպիսով, մասնակի բավարարել էր Ա.Խալափյանի պաշտպանների բողոքները: Պաշտպանական կողմը միջնորդել էր երկրորդ դրվագով բեկանել դատական երկու ատյանների դատական ակտերը, հանցակազմի բացակայության հիմքով Ա.Խալափյանին արդարացնել, ճանաչել ու հռչակել նրա անմեղությունը ՀՀ քրեական օրենսգրքի 200-րդ հոդվածի 3-րդ մասով առաջադրված մեղադրանքում:

Աղբյուր` Փաստինֆո