Փաստ ինֆո

Երրորդմասցի Լյովիկի ու նրա ընկերների սպանության գործով իրեղեն ապացույցների հետազոտումը շարունակվում է:

Նախ դատարանն այսօր հետազոտեց դեպքի օրը՝ 2015թ. մարտի 4-ին՝ ժամը 13:50-ի սահմաններում, «Նուբարաշեն» ՔԿՀ-ին հարող տարածքում սպանված Լևոն Ղազարյանի, Դրաստամատ Թադևոսյանի և Մեսրոպ Նազարյանցի կրած հագուստները, բաճկոնները, տաբատները, ստվիտերները, շապիկները, անդրավարտիքը, գուլպաները, կոշիկները:

Հետազոտվեցին նաև դեպքի վայրում հայտնաբերված այլ իրեղեն ապացույցներ՝ բեկորներ, պարկուճներ, այդ թվում նաև՝ տուժողների մարմիններից հանված պարկուճներ, սպորտային պայուսակ, սրբիչ, ավտոմեքենայի բանալի լազերային սկավառակներ, եղունգների, մազի նմուշներ և 3 պոլիէթիլենային շիշ:

Ի դեպ, մինչ դատարանի կողմից կհետազոտվեին այդ շշերը, ամբաստանյալների պաշտպան Լուսինե Սահակյանը միջնորդեց դրանք հետազոտել ստերիլ պայմաններում, այնպիսի սենյակում, որ որևէ անձի ԴՆԹ այդ իրեղեն ապացույցների վրա չմնա:

Պաշտպանը չբացառեց որ իրենց կողմից հնարավոր է միջնորդություն լինի կրկնակի փորձաքննության, և որ ինքը չի ցանկանում որ այդ շշերի վրա այլ անձի գենետիկա հայտնաբերվի:

Տուժողի իրավահաջորդների ներկայացուցիչ Երեմ Սարգսյանը կարծիք հայտնեց, որ եթե դատարանը հնարավորություն ունենա ստերիլ որևէ սենյակ ապահովել, ապա ինքը սկզբունքորեն դեմ չէ, բայց եթե հետագայում էլ փորձաքննություն նշանակվի, ապա հաշվի կառնվի այն անձանց ԴՆԹ նմուշները, ովքեր որ իրականանում առնչվել կամ կարող են առնչություն ունենալ այդ ապացույցի հետ:

Սակայն Լուսինե Սահակյանը գտնում է, որ այդ իրեղեն ապացույցները վաղուց «փչացված» են, այն փաթեթավորված է խանութից գնված տոպրակով, որի վրա ի սկզբանե արդեն ԴՆԹ եղել է, ապա ձեռքից ձեռք անցնելով տոպրակով իրեղեն ապացույցը փաթեթավորվել է:

Ստերիլ պայմաններով սենյակ դատարանը չկարողացավ ապահովել, քանի որ Հայաստանում ընդհանրապես այդպիսի բան չկա, անգամ փորձագիտական կենտրոններում չունեն, ուստի և դատարանը որոշեց, որ այդ շշերը կհետազոտվեն ինչպես որ մյուս ապացույցները, սակայն հաշվի առնելով պաշտպան Երեմ Սարգսյանի առաջարկը՝ յուրաքանչյուր շիշը հետազոտվեց առանձին ձեռնոցով՝ մշակված բժշկական սպիրտով:
Զննված բոլոր ապացույցները, փաթեթավորվեցին և դատարանի կողմից կնքվեցին:

Հաջորդ դատական նիստում փորձագետի մասնակցությամբ կհետազոտվի դեպքի վայրում հայտնաբերված զենք-զինամթերքը:

Ըստ մեղադրանքի՝ 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Աղբյուր` Փաստինֆո