Փաստ ինֆո

Տեսա 2-3 դիմակավորված անձ՝ մտածեցի կինո են նկարում: Այդ մասին այսօր դատարանում հայտարարեց երրորդմասցի Լյովիկի ու նրա ընկերների սպանության գործով վկա Ալբերտ Չիլինիգարյանը, ով 2015թ. մարտի 4-ին գտնվել է «Նուբարաշեն» ՔԿՀ-ից ոչ շառ հեռու:

Այսօր՝ Էրեբունի և Նուբարաշեն վարչական շրջանների ընդհանուր իրավասության դատարանում շարունակվեց վկաների հարցաքննությունը: Հարցաքննվեցին դատակոչված 3 վկա, վերջիններիս նախաքննական և դատաքննական ցուցմունքներում առկա հակասություններով պայմանավորված՝ հրապարկվեց նաև նրանց նախաքննական ցուցմունքները:
Վկաներից երեքն էլ ամբաստանյալներին չէին ճանաչում:

Վկա Ալբերտ Չիլինիգարյանը, նշեց, որ դեպքի օրը գտնվել է «Նուբարաշեն» ՔԿՀ-ից ոչ շատ հեռու՝ գործընկերների հետ իրականացրել են վթարավերականգնողական աշխատանքներ, խողովակ են փոխել և այդ ժամանակ տեսել է 2-3 դիմակավորված անձանց՝ «մտածեցի կինո են նկարում…»:

Վկան հայտարարեց նաև, որ ինքը տարիքով մարդ է և քանի որ դեպքից բավական ժամանակ է անցել, որոշ դրվագներ չի հիշում և դատարանին խնդրեց հիմք ընդունել իր նախաքննական ցուցմունքը:

Իսկ մինչև մեղադրող դատախազ Էդգար Արսենյանը կանցներ վկայի նախաքննական ցուցմունքի հրապարակմանը՝ վկան հայտարարեց, որ նախաքննական ցուցմունքը գրել է իր կամքով և իր ձեռքով, ապա համոզվելու համար, որ իր գրածն է հրապարակվելու, խնդրեց իրեն ցույց տալ:

Ցուցմունքը, որը գրել էր վկան իր ձեռքով, հակասություններ էր պարունակում. նախաքննության փուլում վկան հայտնել էր, որ կալանավայրի կողմից լսեր էր կրակոցներ և մտածել՝ ինչ-որ վարժանքներ են, ապա տեսել էր 2-3 անձի, նրանցից դիմացից քայլողը եղել էր դիմակավորված, մյուսները՝ ոչ, սակայն նրանց նկարագրել չի կարողացել, քանի որ «ակնթարթներ է տեսել»:

Վկան պնդեց իր նախաքննական ցուցմունքը՝ հավելելով, որ «100 տոկոսով ճիշտ է»:

Հաջորդիվ հարցաքննվեց տաքսիստ Դմիտրի Սաբչենկոն, վկան հայտնեց, որ Մասիվի շուկայի դիմացի կանգառում կանգնած հաճախորդի է սպասելիս եղել, 3 երիտասարդ մոտեցել են խնդրել, որ իրենց Ավան տանի, ինքն էլ տարել է: Տաքսիստի ծառայություններից օգտվելուց հետո երիտասարդները նրան վճարել են 2000 դրամ:
Վկան, հարցերին պատասխանելով, նշեց որ ճանապարհին երիտասարդները չեն խոսել:

Այս դեպքում էլ հրապարակված նախաքննական ցուցմունքից պարզ դարձավ, որ մեքենայում գտնվելու ընթացքում երիտասարդներն ասել են. «իրենց ավտոյի անիվը նստել է, մեր ախպոր ավտոյով կգնանք Ավան» (ախպոր մեքենա ասելով նկատի են ունեցել տաքսիստին), ապա ծխախոտ են ուզել վարորդից, և ճանապարհին մի տեղ էլ կանգնել են, մեքենայի ետևում նստած 2 երիտասարդները գնացել են ջուր խմելու և այդ ժամանակ տաքսիստը նկատել է, որ տղաներից մեկի ջինսե տաբատի ծնկի մասը պատռված է:

Վկա Ալեքսանդր Միրզոյանն էլ դեպքի ժամանակահատվածում աշխատել է «Նուբարաշեն» ՔԿՀ-ից ոչ շատ հեռու գտնվող ավտովերանորոգման կետում: Վկան հայտնեց, որ երիտասարդներ են մոտեցել և խնդրել, որ հիվանդանոց տեղափոխեն: Միրզոյանի կոլեգան, ով գործով վկա Վահագն Մնացականյանն է, նրանց տեղափոխել է, իսկ երբ վերադարձել է, ոստիկանները եկել են իրենց ավտովերանորոգման կետ և Վահագնը նրանց հետ գնացել է, ապա նաև իրեն են տարել ոստիկանություն, որից հետո էլ ԱԱԾ-ում հարցաքննվել է:

Հրապարակված նախաքննական ցուցմունքից պարզ դարձավ, որ 3 երիտասարդներից մեկը մոտեցել է ու Վահագնին խնդրել, որ հիվանդանոց հասցնի, Վահագնի հարցին ի պատասխան՝ թե ինչ է պատահել, երիտասարդն ասել է՝ «ի՞նչ կլինի, տար հիվանդանոց, ախպե՛ր, Աստված էլ ձեզ կօգնի»:

Վկայի գործընկեր Վահագնը նրանց տարել է ուր ցանկացել են, այդ ընթացքում վկան մի քանի անգամ զանգել է կոլեգային և հարցրել, թե ուր է հասել, առաջին անգամ ընկերը պատասխանել է, թե դեռ տղաներին չի իջեցրել:

Իսկ մյուս զանգերը վկան կատարել է արդեն ոստիկանության աշխատակիցների ներկայությամբ, մի դեպքում Վահագն ասել է, որ Մասիվում է, իսկ մյուս դեպքում հայտնել է, որ իջեցրել է երիտասարդներին և հետ է վերադառնում:

Նկարագրելով այդ երիտասարդներից մեկին՝ վկան հայտնել է, որ նա մինչև 30 տարեկան է, միջին կազմվածքով՝ ո՛չ նիհար, ո՛չ գեր, գլխին էլ գլխարկ է եղել, մյուսներին վկան չէր նկարագրել, նախաքննական մարմնին հայտնելով, որ նրանք ավելի հեռու են կանգած եղել՝ նրանց արտաքինին ուշադրություն չի դարձել, սակայն նրանց վրա աչքի ընկնող ոչ մի բան չի նկատել:

Վկան նաև նշել է, որ իր գործընկերոջ հետ զրուցող տղան չի ներկայացել, իսկ մյուսները չեն խոսել, նրանց ձեռքին որևէ իր առարկա չի տեսել, բջջային հեռախոսով ևս չեն խոսել:

Հաջորդ՝ հունիսի 21-ին կայանալիք նիստում ևս կշարունակվի վկաների հարցաքննությունը:

Աղբյուր` Փաստինֆո