Փաստ ինֆո

Երրորդմասցի Լյովիկի ու նրա ընկերների սպանության գործով այսօր դատարանը հետազոտեց գործում առկա գրավոր ապացույցները:

Էրեբունի և Նուբարաշեն վարչական շրջանների ընդհանուր իրավասության դատարանում` նախագահությամբ Արտուշ Գաբրիելյանի, այսօր նախատեսվում էր հրապարակել տուժողների իրավահաջորդների նախաքննական ցուցմունքները, քանի որ վերջիններս դեռևս ամիսներ առաջ հրաժարվում էին դատարան ներկայանալ և ցուցմունք տալ:

Սակայն մեղադրող դատախազ Արամ Արամյանն  առաջարկեց ևս մեկ անգամ ծանուցել տուժողների իրավահաջորդներին` դատարան ներկայանալու և հարցաքննվելու համար, իսկ մինչ այդ փոխել ապացույցների հետազոտման հաջորդականությունը և հետազոտել գործում առկա գրավոր ապացույցները:

Կողմերը չառարկեցին, դատարան անցավ գրավոր ապացույցների հետազոտմանը:

Մասնավորապես, հետազոտվեցին նախաքննական մարմնի կողմից նշանակված մի շարք փորձաքննությունների՝ այդ թվում դատաձգաբանական, մատնադրոշմային, դատագենետիկ, դատաբժշկական, դատահոգեբուժական, դատաձեռագրաբանական, դատաապրանքագիտական, դիակի դատաբժշկական փորձաքննությունների եզրակացությունները:

Այսպես, սպանված Լևոն Ղազարյանի, Դրաստամատ Թադևոսյանի և Մեսրոպ Նազարյանցի դիակների դատաբժշկական փորձաքննությունների համաձայն, վերջիններս ստացել էին մի քանի հրազենային վիրավորումներ մարմնի տարբեր մասերում՝ կրծքավանդակի, գլխի, ստորին վերջույթների, ձեռքերի շրջաններում:

Գլխի շրջանում հրազենային վնասվածք ստացել էր Մեսրոպ Նազարյանցը:

Ըստ այդ փորձաքննությունների եզրակացությունների՝  նրանց բոլորի վնասվածքները պատճառվել էր կենդանության օրոք, մահվանից կարճ ժամանակ առաջ, իսկ դատաքիմիական փորձաքննությամբ՝ նրանց արյան մեջ սպիրտներ,  թմրանյութեր, հոգեմետ նյութեր չէին հայտնաբերվել:

Նշենք, որ երբ դատարանը հրապարակում էր ապացույցները՝ ամբաստանյալների պաշտպան Լուսինե Սահակյանը հայտարարեց, որ դատարանը հրապարակում է արդեն իսկ նախկինում  հետազոտված նյութերը, սակայն դատարանի կողմից պաշտպանին պարզաբանվեց, որ հրապարակվող ապացույցները չեն կրկնվում։ Դահլիճում ներկա տուժողների հարազատներից մեկը ևս պնդեց, որ նույնը չի հրապարակվում: Այստեղ էլ պաշտպանի և տուժողի հարազատի միջև լեզվակռիվ առաջացավ, բանը հասավ նրան, որ տուժողի հարազատը պաշտպանին ծամոն ծամելու համար դիտողություն արեց, որին հակադարձեց պաշտպանը:

Ըստ մեղադրանքի՝ 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նշենք նաև, որ բոլոր երեք ամբաստանյալները՝ «Գաստիկ» մականունով  Վահան Հակոբյանը, «Տլե»-ն՝ Սարգիս Հախանումյանը, ու «Ծգլ»-ը՝ Սարգիս Գրիգորյանը, առաջադրված մեղադրանքում իրենց մեղավոր չեն ճանաչում:

Աղբյուր` Փաստինֆո