Փաստ ինֆո

Երևանի Կենտրոն և Նորք-Մարաշ վարչական շրջանների դատարանում է անձնական ազատության և անձեռնմխելիության իրավունքի խախտմամբ պատճառված նյութական և ոչ նյութական (կամ բարոյական) վնասների հատուցման պահանջով հայցադիմումի գործը:

Հայցվոր Արման Տոնոյանը Հայաստանի Հանրապետությունից  պահանջում է 4 մլն ՀՀ դրամի չափով ոչ նյութական վնասի և 350 հազար գումարի չափով փաստաբանի ծախսերի փոխհատուցում:

Գործով առաջին նախնական դատական նիստը տեղի չունեցավ հայցվորի ներկայացուցիչ Տիգրան Սաֆարյանի բացակայության պատճառով:  

Պատասխանողի՝ ՀՀ ֆինանսների նախարարության, ներկայացուցիչ Անի Միքայելյանը դատարանին հայտնեց, որ հայցի վերաբերյալ դիրքորոշում հայտնելու համար պատասխանող կողմին անհրաժեշտ է հայցվոր կողմից որոշ հարցեր ճշգրտել:

«Փաստինֆո»-ի լրագրողի հետ զրույցում Ֆինանսների նախարարության ներկայացուցիչը նշեց, որ Հայաստանի Հանրապետության պայմաններում հիմնականում հայցվորները ոչ նյութական վնասի հատուցման չափը շատ են ուռճացնում: «Լինում են դեպքեր, որ այնպիսի գումարներ են պահանջում, որ ուղղակի Հայաստանի Հանրապետության ներկա աշխատավարձի պայմաններում ընդհանրապես ողջամիտ չի»,- ասաց Անի Միքայելյանը՝ ընդգծելով, որ Քաղաքացիական օրենսգիրքն ուղղակիորեն նշում է հատուցման գումարի ողջամիտ չափի վերաբերյալ:

Կոնկրետ այս հայցապահանջի վերաբերյալ պատասխանողի ներկայացուցիչն ևս գտնում է, որ ընդհանրապես հատուցման գումարի չափը ողջամիտ չէ: Բացի այդ, այս գործով հայցվորը, ով ապացուցման բեռն է կրում, չի ապացուցել, որ գոյություն ունի արդարացման դատավճիռ: «Գտնում եմ, որ ներկայացված ապացույցների շրջանակում հայցը ենթակա չէ բավարարման»,- ասաց պատասխանողի ներկայացուցիչը՝ հավելելով, որ եղել են բավարարման ենթակա դեպքեր, եթե, իհարկե, կողմը կարողացել է ապացուցել, որ իրոք կրել է վնաս ապօրինի դատապարտման հետևանքով: «Սակայն այս դեպքում մենք ապօրինի դատապարտման դեպք չունենք: Ես գտնում եմ, որ մինչև այդ փաստը հաստատվելը նման հանգամանքներում դժվար թե հայցը բավարարվի»:

Արդյոք Հայաստանում կայանո՞ւմ է բարոյական վնասի հատուցման ինստիտուտը մեր հարցին ի պատասխան Ա.Միքայելյանը նշեց. «Մենք այդքան շատ պրակտիկա չունենք, հիմնականում հայցվորները վկայակոչում են Մարդու իրավունքների եվրոպական դատարանի նախադեպային որոշումներ: Իսկ ՄԻԵԴ-ում փոխհատւցման չափերը նույնիսկ մեկ-երկու օրվա համար կարող է հասնել մինչև 2000, 8000 եվրոյի, բայց Հայաստանի Հանրապետության պայմաններում այդ չափերն, իհարկե, ողջամիտ չեն»,- ասաց ՀՀ ֆիննախի ներկայացուցիչը:

Անի Միքայելյանը գտնում է, որ քանի որ ինստիտուտը նոր է, որոշ ժամանակ է պետք, որպեսզի մարդկանց իրավագիտակցության մեջ կայանա: «Արդեն դատական պրակտիկա կունենանք, որի հիման վրա արդեն կկարողանանք ողջամիտ չափ սահմանել: Ներկա պայմաններում, ինձ թվում է, դեռևս կայացած չէ, ամեն դեպքում կայացման փուլում ենք»,- ասաց Ֆինանսների նախարարությունը ներկայացնող իրավաբանը՝ ընդգծելով, որ իրականում այն լավ ինստիտուտ է, ամեն դեպքում որպես ժողովրդավարական, իրավական պետություն, այդ ինստիտուտն ունենալը շատ կարևոր է:

Աղբյուր` Փաստինֆո