Փաստ ինֆո

Պետք չէ հավատալ Ադրբեջանի և Թուրքիայի ռազմաքաղաքական ղեկավարության բոլոր այն հայտարարություններին, որ փորձելու են Հայաստանի հետ բարիդրացիական հարաբերություններ վարել, եթե նոյեմբերի 10-ին ստորագրած հայտարարությունն ամբողջովին կյանքի կոչվի։ «Փաստինֆո»-ի հետ զրույցի ժամանակ այս մասին ասաց ռազմական փորձագետ Հայկ Նահապետյանը։

Դիտարկմանը, որ ըստ ադրբեջանական լրատվամիջոցների՝ ադրբեջանցիները Կուբաթլուի շրջանում 4-րդ զորամասն են կառուցում, փորձագետը նշեց, որ պետք է ընդունել այդ տարածքների՝ Ադրբեջանի հսկողության տակ անցնելու իրողությունը և այդ տարածքներում իրենց զինուժի տեղակայումն ու ուժերի կենտրոնացումը․ «Նրանք մերթընդմերթ պատճառներ կգտնեն՝ հիմնավորելով, որ այս կամ այն կետը կամ ինչ-որ ենթակետ չի կատարվել, ինչ-որ բանավոր պայմանավորվածություն, որի մասին բարձրաձայնել է Նիկոլ Փաշինյանը չի կատարվում և ըստ այդմ, իրենց գնահատմամբ ունենալով ուժային առավելություն, փորձելու են նաև ուրիշ դիրքրից խոսել»,-ասաց Հայկ Նահապետյանը։

Հարցին՝ հնարավո՞ր է նոր պատերազմի պատրաստվեն, քաղաքագետը նկատեց՝ Հայաստանի դեմ ռազմական ագրեսիան բավականին մեծ ռիսկեր է պարունակում, մասնավորապես այդ դեպքում ագրեսիան կլինի ՀԱՊԿ անդամ երկրի նկատմամբ․ «Այդ դեպքում եթե Հայաստանի իշխանությունները դիմեն ՀԱՊԿ, այդ սադրանքը կարող է շատ ավելի մեծ աշխարհագրություն իր մեջ ներառել։ Չեմ կարծում, որ Ադրբեջանը և Թուրքիան ունեն ղեկավարություն, որը կարճամիտ է։ Այս պատերազմը ցույց տվեց, որ ռազմաքաղաքական ղեկավարությունն իրավիճակը բավական համարժեք է գնահատում և քայլեր է անում։ Բայց կլինեն սադրանքներ, հոգեբանական ազդեցություն սահմանային գյուղերի բնակիչների նկատմամբ։ Ադրբեջանի և Թուրքիայի ամբողջ քաղաքականությունը հոգեբանական ճնշումն է, որպեսզի սահմանամերձ գյուղերը հայաթափվեն»,-նշեց փորձագետը։

Անդրադառնալով հարցին՝ տեսնում է արդյոք բանակի ուժեղացմանն ուղղված քայլեր իշխանությունների կողմից, Հայկ Նահապետյանը նկատեց՝ դա հասկանալու համար պետք է նայել 2021թ․-ի պետական բյուջեն և տեսնել՝ որ հոդվածներով են ծախսերն ավելացել, իսկ որ հոդվածներով՝ պակասել։ Փորձագետի խոսքով դա հուշում է, թե երկրի ղեկավարությունը 2021-ին իրականում ինչ քաղաքականություն է վարում․ «Ըստ այդմ՝ առաջնահերթություն է ոստիկանական ուժերը, ոստիկանությունն ուժեղացնելը, որի վրա 108 մլն դոլա ավել են նախատեսել, 18 մլն դոլար նախատեսել են վարչապետի աշխատակազմի աշխատաքները կազմակերպելու վրա։

Ունենալով հազարավոր հաշմանդամներ՝ 2021-ի կտրվածքով բյուջեում համապատասխան հոդվածով ավելացել է ընդամենը 30 հազար դոլար։ Սա ցույց է տալիս, թե օրվա իշխանությունների համար որոնք են առաջնահերթ ռազմավարական և մարտավարական խնդիրները։

Ըստ այդմ եթե կրճատվում են ռազմական ծախսերը, ակնհայտ է, որ օրվա իշխանությունների համար առաջնահերթություն չէ ՀՀ սահմանների պաշտպանվածության ուժեղացումն ու ամրապնդումը, այլ ամենայն հավանականությամբ նրանք իրենց հույսը դրել են Ադրբեջանի և Թուրքիայի ռազմաքաղաքական ղեկավարության կողմից տրված խոստումներին, որ իրենք այլևս պատերազմական գործողություններ չեն սկսել, ինչպես նաև ՌԴ-ի զինված ուժերի և սահմանապահ զորքերի՝ հայ-ադրբեջանական սահմանում ներկայության վրա»,-ամփոփեց փորձագետը։

Աղբյուր` Փաստինֆո