Փաստ ինֆո

Սյունիքի սահմանամերձ գյուղերի ուղղությամբ արձակված անկանոն կրակոցները բնակիչների վրա հոգեբանական ազդեցության համար է արվում եւ դրանք մեծ ազդեցություն են թողնում գյուղերի բնակիչների վրա: «Փաստինֆո»-ի հետ զրույցում նման կարծիք է հայտնել ռազմական փորձագետ Հայկ Նահապետյանը:

Նշենք, որ օրեր առաջ ՄԻՊ Արման Թաթոյանը զեկույց հրապարակեց՝ տեղեկացնելով, որ Սյունիքի սահմանամերձ դարձած մի շարք գյուղերի ուղղությամբ ադրբեջանական զինվորականները կրակոցներ են արձակում փոքր, ինչպես նաև խոշոր տրամաչափի զինատեսակներից` լինելով նաև հարբած վիճակում:

Ռազմական փորձագետ Հայկ Նահապետյանն արձանագրում է՝ սահմանամերձ գյուղերի բնակիչների անվտանգությունը վտանգված է, գյուղացիների վրա Ադրբեջանը փորձում է հոգեբանական ճնշում գործադրել, իսկ այդ մարդիկ, զգալով, որ անվտանգությունն ապահոված չէ, պատրաստ են լինելու թողնել իրենց բնակատեղին.

«Սա արվում է նաև հայաթափելու նպատակով: Ադրբեջանը սա ոչ միայն Հայաստանի սահմանների շուրջ է անելու, այլ նաև նման փորձ է անելու Արցախում»,-ասաց Հայկ Նահապետյանը:

Փորձագետը նկատում է, որ հայկական կողմի արձագանքը հակառակորդի սադրանքներին համարժեք չէ.

«Ադրբեջանցի զինվորականները կարող են ցանկացած սադրանք անել և հետո չպատժվել: Չեմ ուզում գնահատական տալ, որ դա միտումնավոր է արվում, կարծում եմ՝ անկարողության և իրավիճակին համարժեք չտիրապետելու հետևանք է: Սա ես գնահատում եմ մեղմ հարթությամբ, կան նաև խիստ գնահատականներ, որ հայկական կողմը միտումնավոր չի արձագանքում, քանի որ այլ խնդիրներ կան, այնպես ինչպես այս պատերազմի ժամանակ բազում հարցեր կան, որոնց պատասխանները ապագայում պետք է տրվեն: Օրինակ՝ ինչո՞ւ Ադրբեջանը ստացավ ռազմավարական առավելություն՝ թուրքական ԱԹՍ-ներ ունենալով, իսկ մենք համարժեք զինատեսակ չունեցանք: Գաղտնիք չէր, որ փետրվար-մարտ ամսից Թուրքիայի և Ադրբեջանի օրենսդիր մարմինները նոր ռազմատեխնիկական համագործակցության հետ կապված պայմանագիր են հաստատել և այդ պայմանագրի մեջ Բայրաքթար գրոհային ԱԹՍ-ները ևս կային, ինչու՞ Հայաստանը համարժեք զինատեսակներ չգնեց, սա հարցերի հարցն է: Ինչու՞ 2017թ-ի 100 մլն դոլլար վարկով, որը նախատեսված էր 18-ին ՀՕՊ և ռադիոէլեկտրոնային պայքարի միջոցներ պետք է գնվեին, դրանք չգնվեցին, փոխարենը գնվեցին ինքնաթիռներ և այլ միջոցներ, որոնք պատերազմի ժամանակ ցածր էֆեկտիվություն ունեցան: Սա նվազագույն հարցն է, իսկ ընթացիկ հարցեր շատ կան, որոնց պատասխանները պետք է տրվեն»,-ասաց Նահապետյանը:

Փորձագետը հույս հայտնեց, որ իշխանափոխությունից հետո համապատասխան մասնագիտական հանձնաժողովներ կստեղծվեն և պատերազմի հետ կապված հուզող բոլոր հարցերը կստանան պատասխանները:

Արձագանքելով փոխվարչապետ Տիգրան Ավինյանի հայտարարությանը, թե Սյունիքն անվտանգ է, մեր զրուցակիցն ասաց.

«Տիգրան Ավինյանը թող իր ընտանիքին, զավակներին վերցնի, գնա մի շաբաթ Սյունիքի սահմանամերձ գյուղերում բնակվի: Լավ կլինի Փաշինյանի ընտանիքին էլ հրավիրի, և այն ժամանակ կտեսնենք՝ Սյունիքում անվտա՞նգ է, թե՞՝ վտանգավոր ապրելը»:

Աղբյուր` Փաստինֆո