Փաստ ինֆո

«Ինչի՞ց է Անդրանիկ Քոչարյանը որոշել, որ մարդիկ ուզում են հավաքվել և պետական պահպանության տակ գտնվող շենքեր ու կառույցներ գրավել: Ի՞նչ հիմքեր ունի ինքը, նման բան մտածելու և այդ մասին բարձրաձայնելու համար: Ենթադրենք, թե ինչ – որ մի անհատ նման հայտարարություն է արել, բայց Անդրանիկ Քոչարյանը խոսում է մարդկանց անունից, նա հոգնակի թվով է խոսում, հետևաբար, նման հայտարարություններ անելու համար, նա հստակ հիմքեր պետք է ունենա, որո՞նք են այդ հիմքերը», - «Փաստինֆո»-ի հետ զրույցում ասել է քաղաքական վերլուծաբան Հայկ Նահապետյանը՝ մեկնաբանելով ԱԺ իմքայլական պատգամավոր Անդրանիկ Քոչարյանի հայտարարությանը, որ, եթե հանկարծ, մարդիկ որոշեն հարձակում գործել պետական պահպանության տակ գտնվող կառույցների նկատմամբ, ապա այդ կառույցներից կարող են կրակ բացել մարդկանց վրա:

Քաղաքական վերլուծաբան Հայկ Նահապետյանը նկատել է՝ Անդրանիկ Քոչարյանը հիշողությունը թարմացնելու կարիք է զգում. «Երբ 2018 թվականի ապրիլի 14-ին Փաշինյան Նիկոլը, մի խումբ անձանց հետ միասին, գրավեց պետական պահպանության տակ գտնվող և հատուկ նշանակության օբյեկտ հանդիսացող Ռադիոտունը ու կառույցի ղեկավարությունից ուղիղի եթեր պահանջեց, ոչ ոք նրանց վրա կրակ չբացեց, թեև Հանրային ռադիոյի պահպանությունն իրականացնող ոստիկաններն, իրենց ընձեռնված իրավասության շրջանակներում, կարող էին շենքը գրավելու ընթացքում զենք կիրառել, ինչը, սակայն, չարվեց: Հետևաբար, եթե համադրենք եղած փաստենք, ապա պետք է նշենք, որ շենքեր գրավելու պրակտիկան, որպես կանոն, իրենց թիմի ներսում է պլանավորվում և իրականացվում»,- նշել է Հայկ Նահապետյանը:

Անդրադառնալով թեմայի վերաբերյալ Ռուբեն Ռուբինյանի հայտնած վերջին նկատառմանը, թե իրենք Ռադիոտան շենքը չեն գրավել, այլ մտել և դուրս են եկել՝ Հայկ Նահապետյանը հակադարձվում է՝ ինչ – որ տեղ մտնել – դուրս գալու համար դռներ չեն կոտրում, ինչը տեղի ունեցավ 2018 թվականի ապրիլի 14-ին՝ Հանրային Ռադիո ներխուժելու ընթացքում և, որի տեսագրությունները, մինչ օրս պահպանվում են համացանցում: Հետևաբար, զուտ հիշողությունները թարմացնելու համար, անհրաժեշտ է մեկ անգամ ևս վերանայել դրանք, ասում է վերլուծաբանը:

Խոսելով այն մասին, որ ՀՀ-ում վարչապետի աթոռը զբաղեցնող անձը Կառավարության մի մասնաշենքից մյուսը տեղափոխվելու համար օգտվում է դիպուկահարների ծառայությունից, որոնք այսօր ևս՝ Կառավարության 3-րդ մասնաշենք վերջինիս այցելության ընթացքում հսկողություն էին իրականացնում, քաղաքական վերլուծաբանը նկատում է՝ մի վախը երկու մահ է իմաստությունը Նիկոլ Փաշինյանի համար է ասվել . «Եթե Փաշինյանը դեռ այստեղ- այնտեղ խոսում է, թե ինքը ժողովրդի մեծ վստահությունը վայելող վարչապետ է, թող մի քանի րոպե իր ընտանիքի անդամների հետ միասին, առանց թիկնապահների բանակի ուղեկցությամբ, փորձի շրջել քաղաքով և կտեսնի, թե ինչ կկատարվի այդ ժամանակ իր և իր ընտանիքի անդամների հետ: Ինչ վերաբերում է դիպուկահարների առկայությանն ու Անդրանիկ Քոչարյանի՝ երեկ տված հարցազրույցի ընթացքում հայտնած մտքերի միջև կապին, ապա ես այն համոզմանն եմ, որ այս իշխանությունն, իսկապես, ընդունակ է կրակել ժողովրդի վրա»,- ասել է քաղաքական վերլուծաբան Հայկ Նահապետյանը:

Հեղինակ՝ Նվարդ Մանվելյան

Աղբյուր` Փաստինֆո