Փաստ ինֆո

«Կամ աթոռը Նիկոլ Փաշինյանի համար ամեն ինչ է, մնացած ամեն ինչը՝ ոչինչ, կամ, չի բացառվում, որ այս մարդն ունի ստանձնած գաղտնի պարտավորություններ, որոնք նա պետք է մինչև վերջ կատարի, որից հետո միայն կթողնի պաշտոնը: Չասենք, թե ում առաջ նա կարող էր ստանձնել այդ պարտավորությունները, համենայն դեպս, ակնհայտ է, որ ոչ Հայաստանի Հանրապետության կամ հայ ժողովրդի,- «Փաստինֆո»-ի հետ զրույցում ասել է ռազմական փորձագետ Հայկ Նահապետյանը՝ վերլուծելով փաշինյանական առեղծվածը, թե ինչու խայտառակ կապիտուլյացիայի ակտ ստորագրած և երկիրն ու բանակը պարտության հասցրած ղեկավարը վայր չէ դնում լիազորությունները։

Նրա խոսքերով՝ «Նիկոլ Փաշինյանի վարքը հուշում է այն մասին, որ նա ունի այլ երկրների և դրանց համապատասխան ծառայությունների առաջ ստանձնած հստակ պայմանավորվածություններ և, չի բացառվում, որ այդ երկրները կարող են լինեն Թուրքիան և Ադրբեջանը: Հետևաբար, այդ պարտավորությունների չկատարումն իր համար, հավանաբար, ավելի ծանր հետևանքներ կարող է ունենալ, քան սեփական ժողովրդի առջև, որպես երկրի վարչապետ, իր պարտականությունների չկատարումն է»:

Բանախոսը չի բացառում, որ, ըստ լայն շրջանառության մեջ մտած վարկածի, Նիկոլ Փաշինյանը պատրաստ է եղել թշնամու վերահսկողության տակ թողնել Արցախի Հանրապետության տարածքն՝ ամբողջությամբ: Սակայն չկարողանալով, իրականացնել իր առջև դրված այս խնդիրը՝ վարչապետի աթոռը զբաղեցնող անձը հիմա, խոստացածի փոխարեն, տարածքային փոխզիջումներ է իրականացնում Հայաստանի Հանրապետության հարավային սահմաններում՝ փորձելով թշնամուն հանձնել վաղուց երազած՝ Սյունիքի մի հատվածը. «Երբ խոսում ենք այն մասին, որ վարչապետը պատրաստ է եղել հանձնել Արցախը, ապա այս ձևակերպումն, իհարկե, զավեշտ է հիշեցնում, որովհետև, ամեն դեպքում, մենք խոսում ենք այն մասին, որ դա ցանկանում է անել երկրի վարչապետը:

Ցավոք, սակայն, այս զավեշտ մեջ կա առողջ բանականության հատիկ և դա այն է, որ պատերազմից առաջ, պատերազմի առաջին օրերին և պատերազմի ընթացքում Հայաստանի ռազմական ղեկավարությունը Փաշինյան Նիկոլին մի քանի անգամ ցույց է տվել, ապացուցել և հորդորել է, որ պատերազմը ժամ առաջ պետք է կանգնեցվի: Ավելին, նման առաջարկ հնչել է նաև Ռուսաստանի Դաշնության ղեկավարի կողմից: Ինչո՞ւ, ուրեմն, պատերազմը ժամանակին չկանգնեց… Երբ պարտվող կողմը մասնագիտական մոտեցմամբ գնահատելով իրավիճակը, հասկանում է, որ պատերազմը շարունակելու պարագայում կորուստները շատ ավելին են լինելու, պարտավոր է ժամ առաջ կանգնեցնել այն: Այստեղից տրամաբանական հետևություն անելով, կարող ենք վստահորեն հաստատել՝ այո, Փաշինյան Նիկոլը պատրաստ էր հանձնել ամբողջ Արցախը: Իսկ ինչո՞ւ դա նրան, այնուամենայնիվ, չհաջողվեց, որովհետև Ռուսաստանի Դաշնության ղեկավարի միջամտությամբ կասեցվեց Ստեփանակերտի միանշանակ անկումը: Ստացվում է, որ Նիկոլ Փաշինյանի պլանները՝ հանձնել ողջ Արցախը, կասեցրել է Վլադիմիր Պուտինը: Սա իր հերթին նշանակում է, որ Արցախի ամբողջական հանձնմամբ, այդ թվում նաև Լաչինի ուղղությամբ թշնամու առաջխաղացման պարագայում, ողջ արցախահայությունը, մի քանի տասնյակ հազար մարդ, չհաշված զորքն ամբողջությամբ, հայտնվելու էին լիակատար շրջափակման մեջ: Ահա ինչին էր ձգտում Հայաստանի Հանրապետության վարչապետը, որի հետևությունները, երևի թողնենք ընթերցողների դատին»:

Անդրադառնալով Սյունիքի թեմային, ռազմական փորձագետը նշում է՝ այս մարզը Հայաստանի Հանրապետության՝ միջազգայնորեն ճանաչված տարածք է, հետևաբար, այդ տարածքի նկատմամբ ցանկացած երկրի կողմից դրսևորվող ռազմական ագրեսիայի պարագայում, Հայաստանի Հանրապետության ղեկավարները պարտավոր են դիմել պետության ռազմավարական դաշնակցին, տվյալ պարագայում՝ Ռուսաստանի Դաշնությանը. «Ես ավելի քան համոզված եմ, որ, եթե առաջիկայում Ադրբեջանը ռազմական ոտնձգություններ, այսինքն, տարածքային բռնակցում իրականացնի Սյունիքի նկատմամբ, ապա Փաշինյան Նիկոլը կամ չի դիմելու իր ռազմավարական դաշնակցին, կամ դա անելու է չափազանց ուշացած, երբ արդեն որևէ էական փոփոխություն ստեղծված իրավիճակում ՝ Ռուսաստանի Դաշնությունն ուղղակի անել չի կարողանալու: Սրա նախադեպն արդեն կա՝ մենք տեսանք, որ վերջին պատերազմի ընթացքում, այս իշխանությունն այդպես էլ չդիմեց Ռուսաստանի Դաշնությանը՝ վեր հանելու համար Արցախի նկատմամբ իրականացվող ահաբեկչական գործողություների խնդիրը, համապատասխանաբար, ռազմավարական դաշնակցի հետ միասին հակաահաբեկչական գործողություններ իրականացնելու համար:

Այսինքն, համակցելով փաստերի այս ողջ բազան, պետք է հաստատենք՝ այո, կա վտանգ, որ, եթե Ադրբեջանը փորձի ուժ կիրառելով բռնակցել Սյունիքը, ապա Հայաստանի իշխանությունները որևէ ձևով չեն խոչընդոտելու այդ պրոցեսը: Հետևաբար, պատասխանելով ձեր հարցին՝ արդյո՞ք Հայաստանում վարչապետի աթոռը զբաղեցնող անձը կարո՞ղ է փակ, գաղտնի գործարքի գնալ թշնամու հետ՝ հանձնելու նաև Սյունիքը, կամ դրա որևէ հատված, ես կասեմ՝ այո, նման վտանգի առկայությունն այս իշխանության օրոր ավելի քան արդիական է Սյունիքի պարագայում», - եզրափակելով «Փաստինֆո» – ի հետ զրույցն, ասում է ռազմական փորձագետ Հայկ Նահապետյանը:

Հեղինակ՝ Նվարդ Մանվելյան

Աղբյուր` Փաստինֆո