Փաստ ինֆո

«Նախագահ Արմեն Սարգսյանը փորձում է հասկանալ, թե քաղաքական այս ճգնաժամում, ի վերջո, ո՞ւմ օգտին է թեքվելու կշեռքի նժարը, որպեսզի, ըստ այդմ, հարմարվողական որևէ որոշում կայացնի: Արմեն Սարգսյանի համար այս պահին, առաջին տեղում սեփական քաղաքական շահն է, նա առևտուր է անում քաղաքական ուժերի հետ՝ հանդիպում է բոլորին, լսում է բոլորի դիրքորոշումները և փորձում է սեփական անձի համար ճիշտ կողմնորոշում գտնել, այնինչ, առաջին տեղում երկրի նախագահի համար պետության շահը պետք է լիներ: Այսինքն, ըստ էության, նախագահ Արմեն Սարգսյանի մոտ ոչինչ չի փոխվել»,- «Փաստինֆո»-ի հետ զրույցում ասել է քաղաքագետ Հրանտ Մելիք- Շահնազարյանը:

Անդրադառնալով ստեղծված իրավիճակում ՀՀ ԶՈւ Գլխավոր շտաբի պետ Օնիկ Գասպարյանի գործողություններին՝ քաղաքագետը նկատել է՝ պաշտպանության ոլորտի գեներալների տարածած հաղորդագրության առաջին իսկ օրվանից տեսակետ է հայտնել, որ հասարակությունն ու քաղաքական ուժերը պետք է անեն հնարավոր ամեն ինչ, որպեսզի բանակը ստիպված չլինի երկրի ներսում ռազմական ճանապարհով որևէ խնդիր լուծել. «Ես հասկանում եմ, որ զորք մտցնելը ծայրահեղ որոշում կարող է լինել բանակի համար, սակայն, այդպիսի զարգացումները չեմ բացառում: Կարծում եմ, Զինված ուժերն, իսկապես, նման որոշում կայացնելու հիմքեր ունեն, որովհետև պարզ տեսնում են, որ պետությունը կառավարվում է դավաճանական ուժի կողմից, ըստ էության՝ տանելով այն վերջնական կործանման: Այսքանով հանդերձ, ես լիահույս եմ, որ քաղաքական ուժերն իրենց մեջ կգտնեն այն ներուժը, որով կկարողանան օգնության ձեռք մեկնել բանակին, որպեսզի Զինված ուժերը ստիպված չլինեն նման քայլերի գնալ»,- ասում է Հրանտ Մելիք- Շահնազարյանը:

Կկրակի՞ արդյոք իշխանությունը Բաղրամյան պողոտայում հավաքված խաղաղ ցուցարարի վրա, թե՞ Ազգային ժողով բերված դիպուկահարները ընդդիմության շարքերում ցուցադրական նպատակով վախ և խուճապ առաջացնելու համար են, քաղաքագետը պատասխանում է՝ չի բացառում, որ իշխանությունը կարող է նաև կրակ բացել ցուցարարի վրա. «Չմոռանանք, որ այս իշխանությունը մեր թշնամի երկրի ղեկավարին կիրթ մարդ է համարում, նա գործարքների մեջ է մտել թշնամու հետ, ինչի արդյունքում մենք կորցրել ենք մեր հայրենիքի մի զգալի մասը, ավելի քան 5000 զոհ ենք տվել, ունենք հազարավոր վիրավոր և, դեռևս, անհայտ թվով գերեվարված ու անհետ կորած տղաներ: Այս իշխանությունը կրակի տակ է հանել մեր շատ ու շատ հայրենակիցների, օրինակ նրանց, ովքեր ցանկանում են Գորիսից հասնել Կապան, հետևաբար, խիստ օրինաչափ է, որ նրանք կրակի տակ են պահում նաև Երևանի կենտրոնում հավաքված խաղաղ ցուցարարներին և ահնրաժեշտության դեպքում, ընդունակ են նաև կրակ բացել նրանց ուղղությամբ: Այս իշխանությունն իր ձեռագիրը չի փոխել և երբեք չի փոխելու, հետևաբար, այս առումով կարող ենք սին հույսեր չունենալ»,- ասում է քաղաքագետը:

Հատկանշական է, որ վերջին օրերին ակտիվություն է սկսել ցուցաբերել նաեւ Սասնա ծռերը, իշխանությունները, կարծես՝ ի դեմ զինված հարձակումներով առանձնացած Սասնա ծռերի, փորձում է հակակշիռ ստեղծել Հայրենիքի փրկության շարժմանը։ Ինչ վտանգավոր հետեւանքներով է դա հղի՝ հարցին ի պատասխան քաղաքագետ Հրանտ Մելիք - Շահնազարյանը նկատել է՝ գործ ունենք ահաբեկչական բանդայի հետ, որի անդամների մի մասը դատապարտվել են, մյուս մասն էլ՝ դեռ պետք է ստանան իրենց արժանի պատիժը և, չգիտես ինչու, այսքանից հետո, նրանք քաղաքի փողոցներով ազատ քայլելու և հավաքներ անելու իրավունք ունեն: Այս ամենն, ըստ վերջինիս, հերթական անգամ ապացուցում է, որ երկրը ղեկավարվում է դավաճան իշխանության կողմից. «Ինձ համար այս իշխանության և այդ ահաբեկչական խմբավորման մեջ որևէ տարբերություն չկա: Կարծում եմ, որ նրանք նույնիսկ շատ հանգիստ կերպով կարող են իրար հետ համագործակցել, իրար վրա կրակել, հետո ժողովրդի վրա կրակել և այլն: Դրանք ամեն ինչ ընդունակ մարդկանց մի խումբ են, ովքեր ժամանակին գործել ու հիմա էլ շարունակում են գործել մեր պետության դեմ»,- ասել է քաղաքագետ Հրանտ Մելիք - Շահնազարյանը:

Հեղինակ՝ Նվարդ Մանվելյան

Աղբյուր` Փաստինֆո