Փաստ ինֆո

«Եթե Ազգային ժողովի շենքում դիպուկահարներ են տեղադրվել, ուրեմն նրանց խնդիրն ինչ - որ պահին կրակելն է, որովհետև դիպուկահարը կրակելու համար է: Դա կարող է լինել այն պահին, եթե այնտեղ հավաքված ժողովուրդն, օրինակ, որոշի մտնել Ազգային ժողովի շենք»,- «Փաստինֆո»-ի հետ զրույցում ասել է քաղաքագետ Ստեփան Դանիելյանը:

Հիշեցնենք՝ այսօր Ազգային ժողովի շենքում դիպուկահարներ էին տեղակայվել, ԱԺ բակում՝ լուսաձայնային նռնակներ տեղադրվել՝ ի տես բոլորի։

Քաղաքագետը նկատում է՝ քանի – որ Ազգային ժողովը պատրաստվում է կարևոր որոշումներ ընդունել, հետևաբար, այնտեղ հավաքված ցուցարարների թիրախում է հայտնվել. «Ակնհայտ է, որ ներքաղաքական զարգացումները պատային իրավիճակի են բախվել: Այս պահի դրությամբ, ոչ մի կողմ հստակ քայլեր իրականացնելու միտում չունի: Այսքանով հանդերձ, ակնհայտ է, որ այս իշխանությունը չի կարող երկար մնալ, որքան նա համառում է, այնքան իր հիմքերը թուլանում են, պետությունն էլ՝ ավելի ծանր իրավիճակում է հայտնվում: Մյուս կողմից, գործող սահմանադրության պայմաններում համապատասխան լուծումներ չկան»:

Քաղաքագետը հավելում է՝ սեփական վերլուծությամբ՝ միակ հնարավոր լուծումը խորհրդարանական ընդդիմադիր խմբակցությունների մանդատների վայր դնելն է, այսպիսով՝ ներխորհրդարանական ճգնաժամ ստեղծելն ու արտահերթ ընտրությունների գնալը. «Եթե Ազգային ժողովի ընդդիմադիր ֆրակցիաները պատրաստ չեն գնալ այդ քայլին, ապա թող բացատրեն՝ ինչո՞ւ, ի՞նչ պատճառաբանությամբ վայր չեն դնում մանդատները, ինչպես նաև՝ ներկայացնեն ստեղծված իրավիճակից դուրս գալու իրենց տարբերակները: Ի վերջո, խորհրդարանը չի կարող գործել մեկ խմբակցությամբ, սա աշխարհում աննախադեպ բան է»,- ասում է Ստեփան Դանիելյանը:

Պատասխանելով հարցին՝ ստեղծված իրավիճակում ի՞նչ քայլեր պետք է ձեռնարկի ՀՀ ԶՈւ Գլխավոր շտաբն ու դրա պետը, քաղաքագետ Ստեփան Դանիելյանը պատասխանում է՝ Գլխավոր շտաբն, արդեն իսկ, արել է այն, ինչ պետք է աներ. «Այդ կառույցն արդեն հայտնել է, որ պետության անվտանգությունը վտանգված է, իսկ օրվա իշխանություններն ի վիճակի չեն լուծելու երկրի առջև ծառացած խնդիրները և պետք է հրաժարական տան: Միաժամանակ, Գլխավոր շտաբը տեղեկացրել է նաև, որ, եթե հանկարծ, իշխանության կողմից հանրության նկատմամբ բռնություններ կիրառվեն, իրենք դա թույլ չեն տա: Ինչպես տեսնում ենք՝ Գլխավոր շտաբը դեռևս իր կատարած հայտարարության տիրույթներում է: Միգուցե, այսօր ստեղծված պատային իրավիճակը հենց սրանով է պայմանավորված, այսինքն, իշխանությունը չի կարողանում ուժ կիրառել, որովհետև գիտի՝ հաջորդ քայլով բանակը քաղաք կմտնի: Ամեն տեսակի զարգացումների պարագայում, իհարկե, նախընտրելի է ներքաղաքական ճգնաժամը հանգուցալուծել առանց բախումների և բիրտ ուժի կիրառման»,- ասում է քաղաքագետը:

Ամփոփելով զրույցը, Ստեփան Դանիելյանը նկատում է, մի բան պարզ է՝ իշխանությունն իր առաջ խնդիր է դրել՝ հասնելու Գլխավոր շտաբի պետի հրաժարականին, ինչո՞ւ չէ՝ նաև բանակի ողջ վերնախավի փոփոխությանը, ինչի արդյունքում, կարող ենք հանգիստ կերպով արձանագրել, որ մենք այլևս բանակ չունենք: Արդյո՞ք այս իշխանությունը պատրաստ է այդպիսի գին վճարել՝ նպատակին հասնելու համար, ցույց կտա ժամանակը: Քաղաքագետը վստահ է՝ իշխանության ղեկին հայտնված Նիկոլ Փաշինյանն ադեկվատ վարքագծի հետ կապված ակնհայտ խնդիրներ ունի, հետևաբար, առաջիկա օրերին ցանկացած տեսակի ներքաղաքական զարգացումներ հնարավոր են:

Հիշեցնենք, որ այսօր ՀՀ մարդու իրավունքների պաշտպանի աշխատակազմը ահազանգեր էր ստացել այն մասին, որ Ազգային ժողովի պատուհաններից՝ Բաղրամյան պողոտայում տեղի ունեցող հավաքի ուղղությամբ բացահայտ դիպուկահարներ են երևում:

Օմբուդսմեն Արման Թաթոյանն իր ֆեյսբուքյան էջում գրել էր, որ պաշտպանի աշխատակազմը դիտարկում է իրականացնում լրատվամիջոցներով և հավաքի վայրում, որտեղ առկա են նաև երեխաներ ու տարեցներ. «ՀՀ Ազգային ժողովի շենքի պատուհաններից հրազենի բացահայտ ցուցադրությունը, այդ թվում՝ զինվորական համազգեստով դիպուկահարների ցուցադրական ներկայությունը խաղաղ հավաքին պետության կողմից գործադրված անվտանգության անհամարժեք միջոց է այս պահին Բաղրամյան պողոտայում առկա իրավիճակում», - գրել էր Մարդու իրավունքների պաշտպանը:

Հեղինակ՝ Նվարդ Մանվելյան

Աղբյուր` Փաստինֆո