Փաստ ինֆո

«Տպավորություն էր, թե երեկ Մոսկվայում տեղի ունեցած եռակողմ հանդիպման ընթացքում, Հայաստանի Հանրապետությունը ներկայացնող անձը զուտ ներկայացուցչական, այսինքն, պարզապես համաձայնություն տվողի առաքելությամբ էր այնտեղ: Ցավոք, սա վերջին ամիսների ընթացքում նմանօրինակ առաջին տպավորությունը չէ, նույն պատկերը մենք տեսանք նաև նոյեմբերի 10-ին՝ կապիտուլյացիայի ակտի ստորագրման օրը: Հետևաբար, քանի դեռ Հայաստանի շահերը ներկայացնող անձը Նիկոլ Փաշինյանն է, այս ամենը շարունակական բնույթ է ունենալու, որովհետև, կարծում եմ, այդ մարդն ի զորու չէ որպես երկրի ղեկավար, Հայաստանի համար բարենպաստ որոշումներ կայացնել, - «Փաստինֆո»-ի հետ զրույցում ասել է Արցախի նախկին վարչապետ Անուշավան Դանիելյանը՝ վերլուծելով երեկ Մոսկվայում կայացած եռակողմ հանդիպման արդյունքները։

Նրա արձանագրմամբ՝ Փաշինյանն արդեն իսկ պարտված ղեկավար է, նրա կարգավիճակը, նույնիսկ այստեղ՝ Հայաստանում արդեն անէական է դարձել: Ակնհայտ է, որ մեր երկրի ներսում որևէ լուրջ կառույց՝ կլինի քաղաքական, հասարակական, թե հոգևոր բնույթի, այդ թվում նաև իշխանական՝ ի դեմս գործող նախագահի, չեն ցանկանում հաշվի նստել խայտառակ կերպով պարտված և կապիտուլյացիայի ակտ ստորագրած ղեկավարի հետ: Հետևաբար, նույնը պետք էր սպասել նաև երկրից դուրս հանդիպումների արդյունքում, ինչին էլ երեկ ականատես եղանք: Դժվար թե նա այսքանից հետո իր մեջ ուժ գտներ՝ թշնամու հետ բանակցության ընթացքում արժանապատիվ կերպով ներկայացնելու մեր երկրի շահերը, ինչն էլ սպասելի էր:

Հարցին՝ ինչո՞ւ Փաշինյանն, այնուամենայնիվ, որոշում կայացրեց մասնակցել Մոսկվայում կայանալիք հանդիպմանը, փոխարենը՝ վայր դնելու իր լիազորություններն ու կարևոր այդ բանակցություններին առավել կոմպետենտ քաղաքական գործիչ գործուղելու՝ Անուշավան Դանիելյանը պատասխանել է՝ ըստ էության, գործ ունենք նույն իրավիճակի հետ, ինչ տեղի է ունեցել նոյեմբերի 10-ին՝ Փաշինյանից պահանջել էին, որպեսզի կապիտուլյացիայի ակտի տակ թողնի իր ստորագրությունը և նա անվերապահ կերպով կատարել է պահանջը: Հիմա նույնպես, նրա առաջ պահանջ է դրվել՝ ներկայանալու մոսկովյան հանդիպմանը և նա պարզապես ներկայացել է.«Եվ Ադրբեջանին, և Ռուսաստանի Դաշնությանը ամբողջովին ձեռնտու էր այն փաստաթուղթը, որ ստորագրվեց երեկ Մոսկվայում, հետևաբար, Փաշինյանը հերթական անգամ կատարեց այն, ինչ իրենից պահանջեցին բանակցող կողմն ու հաղթող պետության ղեկավարը: Թե ինչո՞ւ Փաշինյանն այդպես էլ վայր չդրեց իր լիազորությունները, ըստ էության, շարունակելով պարտության տանել երկիրն՝ այս անգամ արդեն դիվանագիտական սեղանի շուրջ, որովհետև նման քայլ անելու համար, մարդ նախ և առաջ պետք է կամքի ուժ և բարոյական համապատասխան նկարագիր ունենա, ինչից, կարծում եմ, Փաշինյանը զուրկ է: Երկրորդ հերթին, կարծում եմ, նա ուղղակի վախեր ունի՝ լիազորությունները վայր դնելուց հետո իրեն սպասվելիք քրեական դատավարությունների հեռանկարից»:

Անդրադառնալով բանակցությունների ընթացքում գերեվարվածների և անհետ կորածների տապալված խնդրին, Արցախի նախկին վարչապետը նկատել է՝ Փաշինյանն ի զորու չի եղել՝ որպես երկրի ղեկավար, անհրաժեշտ կամք դրսևորել, սեղանին դնելու և առաջ տանելու մեր հասարակության ներսում հրադադարից հետո թերևս ամենազգայուն խնդիրը. «Բանակցության հենց սկզբից նա պարտավոր էր ի սկզբանե հայտարարել այն մասին, որ Մոսկվա է ժամանել, նախ և առաջ, գերեվարվածների և անհետ կորածների հարցին լուծում տալու համար, որից հետո միայն կարող են քննարկվել օրակարգի մնացյալ կետերը: Ընդ որում, նա դա պետք է աներ առանց նահանջի տեղ թողնելու, սակայն նրա պարտվողական կեցվածքն ու կամքի բացակայությունը, հավանաբար, իրեն թույլ չտվեցին անել դա: Արդյունքում, հստակ տեսնելով և գիտակցելով, որ հակառակ կողմում ուղղակի բացարձակ անիշխանություն է, ինչպես վերջերս ամեն օր, այնպես էլ երեկ՝ Ադրբեջանը պահանջեց և ստացավ իր համար բարենպաստ ձեռքբերումների հերթական փաթեթը»:

Հեղինակ՝ Նվարդ Մանվելյան

Աղբյուր` Փաստինֆո