Փաստ ինֆո

Հետպատերազմական իրավիճակում գտնվող երկրի համար կարևոր խնդիրը ռազմագերիների, անհետ կորածների հարցն է և եթե երկրի ղեկավարը գնում է Մոսկվա ու այդ հարցը չի քննարկում, ապա ինչի՞ համար է ընդհանրապես գնում։ «Փաստինֆո»-ի հետ զրույցում այս մասին ասաց անվտանգության հարցերի փորձագետ Արմեն Մանվելյանը։

Փորձագետը հունվարի 11-ին Մոսկվայում ստորագրված փաստաթղթում հայկական կողմի համար շահեկան ոչինչ չի տեսնում, քանի որ տրանսպորտային հաղորդակցության բացումը Հայաստանի համար չաշխատող տարբերակ է․ «Ադրբեջանական և թուրքական կողմի համար սա կաշխատի, որովհետև նրանց պետք է Մեղրիով ինչ-որ ճանապարհ վերցնել և կապ հաստատել միմյանց հետ։ Հայկական կողմի համար այդ համակարգը երբեք չի աշխատի, որովհետև այն միշտ աշխատել է, երբ Հայաստանն ու Ադրբեջանը եղել են նույն համակարգում, լինի դա Ցարական Ռուսաստան կամ Սովետական միություն։ Այդ համակարգերից դուրս հաղորդակցության համակարգերը չեն աշխատելու, հետևաբար դրանց շուրջ ինչ-որ պայմանավորվածությունների գալն անիմաստ ժամանակի վատնում է եղել»,-նշեց փորձագետը։
Վերջինս ընդգծեց՝ ադրբեջանական կողմը ճանապարհ է ունենալու դեպի Նախիջևան, ինչը լրջագույն ռազմաքաղաքական և ռազմավարական հաղթանակ է նրանց համար։ Արմեն Մանվելյանի խոսքով մենք աստիճանաբար զրկվում ենք հարավից։

Անդրադառնալով իշխանական ներկայացուցիչների մեկնաբանություններին, Արմեն Մանվելյանը նկատեց՝ նրանք, ովքեր նշում են, թե իբր հայկական կողմի համար հաջողություն կա կա՛մ հիմարներ են, կա՛մ դավաճաններ․ «Ո՞նց ենք պատկերացնում՝ այդ համակարգերն աշխատեն հետպատերազմյան աղետալի վիճակում գտնվելով։ Ի՞նչ առևտրի մասին է խոսքը։ Դա ցինիկ հայտարարություն է, որ իբր թե հաջողություն է սա»,-ասաց փորձագետը։

Հարցին՝ ինչո՞ւ վարչապետը համաձայնեց ստորագրել փաստաթուղթը, եթե գերիների հարցն անգամ չի քննարկվել՝ Արմեն Մանվելյանը նշեց, որ վարչապետի աթոռին նստած անձը պարտված է, որին չեն ընդունում ո՛չ մեր թշնամիները՝ հանձինս Ադրբեջանի, ո՛չ էլ մեր ռազմավարական դաշնակիցները՝ հանձինս Ռուսաստանի․ «Այդ մարդուն լուրջ չեն ընկալում։ Տպավորություն է, որ նրան կանչել էին Մոսկվա միայն այդ թուղթը ստորագրելու համար և նրա կարծիքը հաշվի էլ չեն առել»,-ասաց փորձագետը։

Նա նկատեց՝ երբ Կրեմլում հրապարակվեց մոսկովյան հանդիպման օրակարգը, այնտեղ գերիների հարցը չկար․ «Պաշտոնական Երևանն ի սկզբանե գիտեր, որ օրակարգում գերիների հարցը չի եղել։ Ադրբեջանը հաջող կերպով օրակարգից հանել է դա։ Այդ դեպքում ինչու՞ էր գնում Մոսկվա, եթե գերիների հարցն օրակարգում չկա։ Այսինքն` գնում էր նախօրոք պատրաստված փաստաթուղթը ստորագրելո՞ւ»,-ասաց Արմեն Մանվելյանը։

Դիտարկմանը՝ արդյոք սա նշանակում է, որ վարչապետը կարող է բանակցություններին չմասնակցել և միայն իր ստորագրությունն ուղարկելով սահմանափակվել, փորձագետը նշեց, որ շատ բաներ չգիտենք, այդ թվում չգիտենք՝ կարող գնալ, թե ոչ․ «Կարող է չէր կարող չգնալ, որովհետև անձնական ինչ-որ կախվածություն ունի՝ սկսած լրատվամիջոցներում տարածված 5 մլրդի պատմությունից վերջացրած շատ այլ բաներով, ինչը նրան ստիպում է ամեն անգամ վազելով գնալ ու խայտառակ փաստաթղթի տակ ստորագրել»,-ասաց Արմեն Մանվելյանը։

Վերջինս ընդգծեց, որ տարածաշրջանում այսօր վտանգավոր գործընթացներ են ընթանում։ Նրա խոսքով Թուրքիան մեծ թվով ՝40-ից ավելի ռազմական ինքնաթիռ է իջեցրել Ադրբեջան ու մեծ զենք-զինամթերք տեղափոխել․ «Հնարավոր է ՝ իրավիճակը վաղը մյուս օրը պայթի, որում մենք էլ կներքաշվենք»,-ամփոփեց փորձագետը։

Աղբյուր` Փաստինֆո