Փաստ ինֆո

Որակապես և բարոյապես թե՛ Սահմանադրական դատարանը, թե՛ Վճռաբեկ դատարանը մաշվել են։ Այս ինստիտուտներն իրենց առաքելությանը հավատարիմ չեն կարողանում ոտքի կանգնել և իրականացնել այնպիսի արդարադատություն, որը համահունչ կլինի ժողովրդավարական զարգացած երկրներին և կարտահայտի հանրության իրական տրամադրությունները։ Այս մասին «Փաստինֆո»-ի հետ զրույցում ասաց փաստաբան Նորայր Նորիկյանը՝ անդրադառնալով Սահմանադրական և Վճռաբեկ դատարանների միավորման և Գերագույն դատարանի ստեղծման վերաբերյալ նախագծին։

«Այսինքն՝ գործ ունենք իրենց բնույթով, էությամբ և անցած ճանապարհով հեղինակազրկված ինստիտուտների հետ։ Անհրաժեշտ է վիրահատական միջամտություն, որպեսզի հնարավոր լինի փոխել այս մարմինների նկատմամբ հանրության ընկալումը։ Փտած ծառը հնարավոր չէ վերականգնել, փտած ծառը միշտ տալու է անորակ բերք, հետևաբար, փտած ծառը պետք է հանել, շպրտել և տեղը նոր տնկի տնկել »,- ասաց Նորիկյանը՝ ընդգծելով, որ կոնցեպտուալ առումով կողմնակից է՝ որակապես նոր սահմանադրական արդարադատություն իրականացնող մարմնի ձևավորմանը։

Նորիկյանը նշեց, որ կարևորում է դատական իշխանության ձևավորումը։ Փաստաբանը գտնում է, որ Գերագույն դատարանի ստեղծումը կարող է ճանապարհ, ուղի լինել, որի ձևավորման միջոցով կդրվի որակապես նոր դատական իշխանություն ստեղծելու հիմքերը, սակայն արձանագրեց, որ քանի դեռ սահմանադրական բարեփոխումների հանձնաժողովը չի հրապարակել հայեցակարգը կամ դետալիզացված չի ներկայացրել, թե կոնկրետ ինչ է իրենց ներկայացնելու Գերագույն դատարանը, որ սահմանադրական մարմիններն են ձևավորելու Գերագույն դատարանը, ինչ իրավասություններով և լիազորություններով է օժտված լինելու, որ պալատը կամ ինչ մեխանիզմներով է իրականացվելու սահմանադրական արդարադատությունը, չի կարող վերջնական դիրքորոշում հայտնել։ Փաստաբանը մտահոգություն հայտնեց, որ վերջնական արդյունքում հնարավոր է, որ հոնքն ուղղելու փոխարեն աչքն էլ հանեն, բայց կարծում է, որ այդ փոփոխությունը կարող է ճանապարհ լինել դատական համակարգի հեղինակությունը փրկելու համար։

«Կապրենք կտեսնենք, թե մասնագիտական հանձնաժողովն ինչ հայեցակարգ կներկայացնի»,- ասաց նա։

Դիտարկմանը, որ դատարանակազմական փոփոխություններ նախկինում էլ եղել են, բայց դատական համակարգի նկատմամբ հանրային վստահությունը, դատարանների հեղինակությունը չի ավելացել, Նորիկյանն արձագանքեց՝ նշելով. «Համաձայն եմ մտավախության հետ։ Ընդամենն ասում եմ, որ այդ փոփոխությունը տեսնում եմ որպես հնարավորություն, պատուհան, բայց հանրային ընկալումը դատական իշխանության նկատմամբ, արդարադատության իրականացման նկատմամբ չփոխելու դեպքում, եթե հենց դատական իշխանության ներսում չփոխվի ընկալումն իրենց առաքելության նկատմամբ, թող չփոխենք, թող մնա նույնը, բայց այս ինստիտուտները՝ թե՛ Վճռաբեկ դատարանը, թե՛ Սահմանադրական դատարանը որակապես, բարոյապես այնքան են մաշվել, որ անգամ այդ ինստիտուտներում այս պահին աշխատող բարեխիղճ անձինք՝ դատավորները, իրենց գործունեությամբ չեն կարող փրկել այդ ինստիտուտների հեղինակությունը։

Որքան էլ գործող իրավակարգավորումների համատեքստում այդ ինստիտուտներում տանենք ամենաիդեալական մասնագետներին նշանակենք դատավորներ, միևնույն է, հանրային ընկալումն այնքան ցածր է այդ ինստիտուտների նկատմամբ, որ այդ մարդիկ ի վիճակի չեն լինելու իրենց դեմքով փոխել հանրային ընկալումը։ Ուստի ՝ այս ինստիտուտները մաշվել են, եկեք փորձ անենք որակապես նոր մարմնի միջոցով ստեղծել որակապես նոր հեղինակություն՝ դատական իշխանության։ Իհարկե, հնարավոր է, որ դա էլ արդյունք չտա, բայց դա կլինի մեր պատճառով։ Եթե մենք իսկապես չփոխենք մեր մտայնությունը, եթե իսկապես առաջնորդվենք այն չափանիշներով, որոնցով հիմա ենք առաջնորդվում, համաձայն եմ՝ եկեք ոչինչ էլ չփոխենք, թողենք, թող այսպես մնա »։

Հեղինակ՝ Իզաբել Սահակյան

Աղբյուր` Փաստինֆո