Փաստ ինֆո

ՀՀ վարչապետ Նիկոլ Փաշինյանը երեկ ուղիղ եթերով Արցախյան հիմնախնդրի կարգավորման վերաբերյալ ոչինչ չասաց։ Նա ոչ թե փարատեց բոլոր սթափ մտածող մարդկանց անհանգստությունները, այլ ավելի շատ անհանգստանալու առիթներ ստեղծեց։ 

Այս մասին ասել է ՀՀԿ փոխնախագահ, ԱԺ արտաքին հարաբերությունների մշտական հանձնաժողովի նախկին նախագահ Արմեն Աշոտյանը՝ ֆեյսբուքյան ուղիղ եթերից։

Ըստ Աշոտյանի, Նիկոլ Փաշինյանը չի տիրապետում Արցախյան կարգավորման ողջ փաթեթին։ «Այն մեծամտությունը, որով նա լծվել է Արցախյան կարգավորման բանակցություններին, այն անկայունությունը, անլրջությունը, որով նա վերաբերում է սեփական արտաբերումներին, խոսքին եւ որով նա ամեն անգամ ստիպում է ԱԳ նախարարին մաքրել իր հետեւից, դրա վկայություններից մեկն է»,-ասաց Արմեն Աշոտյանը։

Աշոտյանը շեշտեց, որ Նիկոլ Փաշինյանը մանիպուլյատիվ ընտրությամբ անդրադարձավ այն հարցերին, որոնք իբրեւ թե հետաքրքրում են հանրությանը։ Ըստ Աշոտյանի հանրությանը առավելապես հետաքրքրում է թե ինչու աշխատանքից հեռացավ անվտանգության ԱԱԾ պետական պահպանության ծառայության պետ Գրիգորի Հայրապետովը, այլ այն հարցը, թե ինչ են այսօր քննարկում ՀՀ իշխանությունները Արցախի խնդրի լուծման շուրջ։ «Որեւէ կոնկրետ մոտեցում, որեւէ հստակություն, կոնկրետ մոտեցում ՀՀ նոր կառավարության կարծիքների, դիրքերի մասին Արցախյան հարցում չհնչեց։ Սա ամենամեծ բացթողումն է, վստահ եմ ,որ արվել է դիտավորյալ, որովհետեւ այն համատարած մանիպուլյացիաները, որ անում է Նիկոլ Փաշինյանը տարբեր հարցերի շուրջ, ցավոք չի շրջանցել նաեւ Ղարաբաղը»։

Աշոտյանը նկատեց, որ Փաշինյանը ցանկացած լրահոսի հետեւում տեսնում է նախկինների ականջները եւ ըստ նրա, վարչապետի ֆոբիաները անհիմն են, քանի որ այսօր հանրային դժգոհության տարափի մեջ այլ ձայներ են լսվում եւ պետք է առերեսվել հանրային դժգոհության ալիքի հետ։

Աշոտյանը շեշտեց, որ Փաշինյանը կրկնեց իր անհաջող բանաձեւը որ հարցի լուծումը պետք է բավարարի 3 ժողովուրդներին։ «Այս ընթացքում Ադրբեջանի ղեկավարությունը շատ ագրեսիվ, շատ ինտենսիվ անդրադարձել է ՀՀ-ին եւ Արցախին։ Բան ասե՞ց երեկ Նիկոլ Փաշինյանը՝ դրան ի պատասխան։ Դուք չե՞ք զարմանում, որ մեր երկրի վարչապետի պաշտոնը զբաղեցրած մարդը Արցախյան հարցում հակադարձում է բացառապես մեզ ՝ ինձ, իմ ընկերներին, այլ մտահոգ մարդկանց, քան Ադրբեջանին, շատ տարօրինակ է, որ անպատասխան թողնելով Ալիեւի զառանցանքները Հայաստանի, Զանգեզուրի, Ղարաբաղի մասին, նա իր եթերով խոսում է ինչ-որ բամբասանքների մասին՝ փորձելով տպավորություն ստեղծել, որ Բաղդադում, այսպես ասած, ամեն ինչ հանգիստ է»,-շեշտեց Աշոտյանն ու դիմեց Փաշինյանին.

«Պարոն Փաշինյան, ինչո՞ւ չես անդրադառնում Ալիեւի հայտարարություններին, ոչ դու ոչ քո ԱԳ նախարարը պատշաճ կերպով չեն հետեւել հատկապես վերջին ամիսներին ադրբեջանական ագրեսիվ քարոզչությանը եւ պատշաճ կերպով չեն հակադարձել։ Երեկ դու քո եթերի 36 րոպեն նվիրեցիր քեզ քննադատող հայաստանյան շրջանակներին եւ որեւէ ծպտուն չհանեցիր Ադրբեջանի վարվող ագրեսիվ քաղաքականությանը, մե՞նք ենք սպառնալիք, թե Ալիեւն է, ինչո՞վ է պայմանավորված այս հարգանքը Ադրբեջանի իշխանությունների նկատմամբ եւ ագրեսիան ՀՀ ներսում քեզ քննադատող քաղաքական շրջանակների նկատմամբ»։

Աշոտյանն անդրադարձավ նաեւ Փաշինյանի հայտարարությանը, թե երբեք շփման գծում այսքան հանգիստ չի եղել եւ նշեց, որ Ապրիլյան պատերազմից հետո Ադրբեջանը շատ երկար ժամանակ «սսկված էր» եւ դա նույնպես մանիպուլյատիվ հայտարարություն է՝ վերագրել դա իրեն կամ Դուշանբեի ուղիղ կապին։

Անդրադառնալով Հայաստանի եւ Արցախի իշխանությունների միջեւ տարաձայնություններ չլինելու հայտարարությանը, Աշոտյանը հիշեցրեց, որ Արցախի հարցում հենց Փաշինյանն էր մշտապես փորձում սեպ խրել Արցախի եւ ՀՀ իշխանությունների միջեւ եւ, որ նրա իշխանությունն է հանդուրժում Արցախի նախագահի գլուխը «քարով բացելու» հայտարարությունները, որոնց հեղինակները որեւէ պատժի չարժանացան, Փաշինյանն էր ժխտում Անկախության տոնակատարության բեմին, երբ ինչ-որ մեկը Արցախի նախագահին դիմեց որպես մարզպետի։

Արմեն Աշոտյանը նաեւ հիշեցրեց, որ ամիսներ առաջ Փաշինյանը հայտարարեց, որ Արցախյան հիմնախնդրի կարգավորման բանակցությունները սեփական կետից է ուզում շարունակել։ Նա հիշեցրեց Արցախը բանակցային սեղան վերադարձնելու վարչապետի հայտարարությունները եւ նկատեց, որ այսօր ամեն կերպ Փաշինյանը խուսափում է այդ խոստման վերաբերյալ հաշվետվություն տալուց. «Ասա, որ չի ստացվում կամ ասա՝ ի՞նչ ես արել, որ ստացվի»։

Աշոտյանը ֆիկցիա որակեց հիմնախնդիրը հօգուտ 3 ժողովուդների լուծելու հայտարարությունը եւ նշեց, որ Ալիեւը այդ հնարքին չի տրվում։ «Դու քանդել ես Սերժ Սարգսյանի թողած բանակցային խրամատը, փորձել ես կառուցել քոնը, չի ստացվում եւ հիմա այնպիսի իրավիճակ է, որ Հայաստանի բանակցային առաջնահերթությունների մասին, բացի ԱԳ նախարարի կողմից հորինված եւ քո կողմից օգտագործվող «կարգավիճակ եւ անվտանգություն» շատ առաձգական ու բազմաշերտ հայտարարության մասին ուրիշ ոչինչ չկա։ Դուք չեք խոսում Արցախի ինքնորոշման իրավունքի մասին»,-շեշտեց նա՝ հարցնելով.«Ինչումն է պրոբլեմը, ո՞ւր եք տարել բանակցությունները, ի՞նչ է բանակցային սեղանին, այս հարցի պատասխանը տվեք։ Ի՞նչ է նշանակում հանրաքվե կանենք՝ այդ թվում Հայաստանում կամ համազգային։ Եթե դա պոպուլիզմ է՝ վտանգավոր է, եթե գիտակցված հայտարարություն է՝ բացատրեք հասարակությանը, ի՞նչ իրավաքաղաքական քայլերով է գալու այդ հանրաքվեի կազմակերպման հիմնավորումը»։

Աշոտյանը շեշտեց՝ եթե բանակցային գործընթացում կա դինամիկա, ապա այն բացասական է, որովհետև միջազգային հանրության կողմից Հայաստանի որեւէ նախաձեռնություն հավանության չի արժանացել։

Աղբյուր` Փաստինֆո