Փաստ ինֆո

ՀԱՕԿ նախագահ Գագիկ Ծառուկյանի թիկնազորի նախկին պետ, այժմ ԱԺ պատգամավոր Էդուարդ Բաբայանի գործով հենց առաջին նիստում ի հայտ եկան հակասություններ. հարցաքննված վկայի  դատաքննական ցուցմունքը չէր համապատասխանում իր իսկ կողմից նախկինում տրված նախաքննական ցուցմունքին։

Խոսքը «Օլիմպավան» մարզական համալիրի անվտանգության աշխատակից, ՀՀ ոստիկանության ՊՊԳՎ Կոտայքի բաժնի ավագ ոստիկան Միքայել Գասպարյանի ցուցմունքների մասին է։ Միքայել Գասպարյանը ճանաչեց մեղադրյալ Էդուարդ Բաբայանին եւ տուժող Վյաչեսլավ Հարությունովին. «Տուժողին «Օլիմպավան»-ում այդ օրը տեսել եմ, Բաբայանին չեմ տեսել, իսկ դեպքի մասին համացանցում կարդալով եմ իմացել: Ես այդ դահլիճ մտնելու իրավունք չունեմ, ես դուրսը անվտանգությունն եմ ապահովում, տարին տասներկու ամիս այնտեղ ժողովներ են»: Գասպարյանի խոսքով` ինքն այս գործով հարցաքննվել է, հարցաքննությունը տեւել է ժամեր. «Ես ՀՔԾ եմ գնացել երեկոյան 9-10-ին մոտ ու այնտեղից դուրս եմ եկել լուսադեմին` 4-5-ի կողմերը: Հարցաքննվել եմ երկու քննիչի կողմից»,- դատարանում ասաց վկան:

Այստեղ էր, որ առաջացավ առաջին հակասությունը, որի վերաբերյալ էլ մեղադրող դատախազ Սարգսյանը միջնորդեց հրապարակել վկայի նախաքննական ցուցմունքը։ «Իմ գնահատմամբ` առկա է էական հակասություն նախաքննական եւ դատաքննական ցուցմունքների միջեւ: Այն վերաբերում է Էդուարդ Բաբայանին. իմ հարցերին ի պատասխան` վկան նշեց, որ Բաբայանին չի տեսել, մյուս կողմի հարցերին պատասխանելով` ասաց, որ չի հիշում, պատասխան չունի»,- նշեց դատախազը: Պաշտպանական կողմը առարկեց` պնդելով, որ հակասությունն  էական չէ, սակայն դատարանը բավարարեց:

Արդյունքում` հրապարակվեցին Գասպարյանի` նախաքննական մարմնին տված ցուցմունքները, որոնցից պարզ դարձավ, որ նախ հարցաքննությունը սկսվել է ժ. 02:15-ին եւ ավարտվել 03:40-ին, որի ժամանակ վկան մի քանի անգամ նշել է` «ՀԱՕԿ նախագահ Գագիկ Ծառուկյանը համալիր է եկել  իր անվտանգության աշխատակիցների եւ թիկնազորի պետ Էդոյի ուղեկցությամբ»: Այսինքն` նախաքննական ցուցմունքներում վկան փաստել է, որ Էդուարդ Բաբայանը այդ օրը ներկա է եղել, եւ ինքն անձամբ տեսել է Բաբայանի գալը, մինչդեռ դատարանում ցուցմունք տալիս ասում է, որ Բաբայանին չի տեսել կամ որ լավ չի հիշում: Պատասխանելով դատախազի այն հարցին, թե որ ցուցմունքն է առավել արժանահավատ` վկան ասաց. «Բնականաբար` առաջինը, որովհետեւ այդ ժամանակ ավելի լավ եմ հիշել»:

Երկրորդ հակասությունը վերաբերում էր սեփական ցուցմունքը կարդալուն: Միքայել Գասպարյանը, ունենալով միջնակարգ կրթություն, դժվարացել է իր ձեռքով ցուցմունք գրել եւ տվել է համաձայնություն ցուցմունքը համակարգչով արձանագրելու համար. «Ես ասում էի, քննիչը գրում էր: Մտածել եմ` ինչ ասել եմ, դա էլ գրել է»: Ի պատասխան հարցին` արդյո՞ք ավարտելուց հետո նա կարդացել է իր ցուցմունքը, Գասպարյանը նշեց. «Քանի որ վարժ կարդալ չեմ կարողանում, եւ ժամն էլ ուշ էր, որոշել եմ առանց կարդալու ստորագրել եւ վերադառնալ տուն»: Ցուցմունքում, սակայն, նշված է, որ նա ստորագրել է անձամբ կարդալուց հետո միայն:

Գասպարյանն իր հերթին որոշակի անհամաձայնություններ ուներ` կապված սեփական ցուցմունքի հետ. «Երբ ես ասել եմ, որ տեսել եմ Բաբայանին Ծառուկյանի հետ գալիս, նկատի չունեի, թե հենց իրար հետ եմ տեսել, բոլորով եկել են, բայց դա չի նշանակում, թե նրանք երկուսով իրար հետ են շենք մտել»: Մյուս հակասությունը վերաբերում էր տեսագրություններին. «Ես տեղյակ եմ եղել, որ համալիրի տարածքում տեղադրված տեսանկարահանող սարքերը աշխատելիս են եղել ամիսներ առաջ, ոչ թե կոնկրետ այդ շրջանում: Այդ ժամանակ աշխատելիս են եղել թե ոչ, ես չեմ կարող ասել»:

Մյուս երկու վկաները «Արմենիա» բժշկական կենտրոնի վիրաբույժներից էին, ովքեր դեպքի օրը հերթապահել են հիվանդանոցում: Վիրաբույժ Կարեն Փափազյանը, ով դեպքի օրը հիվանդանոցում է եղել որպես հերթապահ բժիշկ, գործի կողմերից ոչ մեկին չճանաչեց` նշելով, որ շատ ժամանակ է անցել, եւ ինքը դժվարանում է մանրամասն տեղեկություններ հաղորդել. «Հիշում եմ, որ ես եւ այլ մասնագետներ գնացինք` հիվանդի վիճակը գնահատելու եւ որոշելու, թե բժշկական ինչ օգնություն է անհրաժեշտ: Առկա էր բութ տռավմայի հետեւանք. քիչ գրգռված վիճակում էր, բայց ակտիվ շփվում էր բոլորի հետ: Ես զննեցի, տեսա, որ շտապ վիրաբուժական միջամտության կարիք չկա, եւ խորհրդակցելով ռեանիմատորի հետ` նրան տեղափոխեցինք վերակենդանացման բաժանմունք: Հետագայում արդեն, երբ վիճակը կայունացավ, նա տեղափոխվեց վիրաբուժական բաժանմունք»:

Վերակենդանացման բաժանմունքում լինելու ընթացքում տուժող ճանաչված Վյաչեսլավ Հարությունովը  իրավապահ մարմինների կողմից հարցաքննվել է 4 անգամ: Վիրաբույժը չկարողացավ հիշել` արդյո՞ք ինքը` որպես հերթապահ բժիշկ, թույլատրել է իրավապահներին մուտք գործել նշված բաժանմունք եւ հարցաքննել հիվանդին. «Որքանով հիշում եմ, նրանց հետ առնչություն չեմ ունեցել, չեմ տեսել: Համենայն դեպս, երբ թույլտվություն չի տրամադրվում, գրավոր ներկայացվում է: Եթե նման տեղեկանք չկա, ուրեմն` թույլատրել ենք. հիվանդը ի վիճակի է եղել»:

Գործով հաջորդ վկա Մարինե Նիկոյանը, ով եւս «Արմենիա» բ/կ-ի հերթապահ բժիշկ է, հիշեց տուժող Վյաչեսլավ Հարությունովին` որպես հիվանդ. «Մարմնական վնասվածքները տեսնելով` ահազանգել եմ Ոստիկանություն: Թե ինչ է պատահած եղել, ես չգիտեմ, իմ այդ հարցին նա չի պատասխանել»: Նիկոյանի խոսքով` հիվանդը գիտակից է եղել, տեղափոխվել է նախ 1-ին վիրակապարան, ապա` վերակենդանացման բաժանմունք»: Թե կոնկրետ ինչ վնասվածքներ է ունեցել եւ ում ուղեկցությամբ է հիվանդը եկել հիվանդանոց, բժիշկը չկարողացավ հիշել:

Ավելի վաղ «Փաստինֆո»-ն հայտնել էր, որ Երեւանի ընդհանուր իրավասության դատարանում երեկ մեկնարկել էր Գագիկ Ծառուկյանի թիկնազորի նախկին պետ, այժմ ԱԺ պատգամավոր Էդուարդ Բաբայանի առնչությամբ գործի դատաքննությունը:

Նիստի սկզբում դատավոր Մեսրոպ Մակյանը` կողմերի հետ փոխհամաձայնությամբ, սահմանել էր ապացույցների հետազոտման կարգը: Ըստ դրա` գործը քննվելու էր հետեւյալ հաջորդականությամբ. վկաների հարցաքննություն, փաստաղթերի եւ տեսաձայնագրությունների ուսումնասիրություն, տուժողի հարցաքննություն, իրեղեն ապացույցների հետ կապված որոշում, մեղադրյալի հարցաքննություն:

Վկաների հարցաքննության ավարտից հետո տուժող եւ պաշտպանական կողմերի միջնորդությամբ եւ դատարանի որոշմամբ դռնփակ կարգով սկսվել էր տեսաձայնագրությունների հետազոտման փուլըը։ Մոտ 15 րոպե անց նիստը հետաձգվել էր եւ տեղափոխվել մարտի 29-ին:

ԲՀԿ-ական պատգամավորի գործով դատավարությունը դատարանը որոշեց շարունակել դռնփակ (լուսանկարներ)

Հիշեցնենք, որ դեպքը տեղի էր ունեցել 2018 թվականի հուլիսի 2-ին Գագիկ Ծառուկյանին պատկանող «Օլիմպավան» մարզասրահում։ Հարությունովի եւ Բաբայանի միջեւ ծագել էր վիճաբանություն, որը հետագայում վերաճել էր ծեծկռտուքի։ Դրա ետևանքով չեմպիոնի հայրը մարմնական ծանր վնասվածքներով տեղափոխվել էր հիվանդանոց:

Դեպքի առթիվ հարուցվել էր քրեական գործ, եւ ԱՕԿ նախագահի խորհրդական Էդուարդ Բաբայանին մեղադրանք էր առաջադրվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով, այն է՝ ծանր մարմնական վնասվածքի պատճառում՝ մի խումբ անձանց կողմից, որը, սակայն, հետագայում վերափոխվել էր 112 -րդ հոդվածի  1-ին մասի` ծանր մարմնական վնասվածքի պատճառում։

Նրա նկատմամբ որպես խափանման այլընտրանքային միջոց էր կիրառվել գրավը՝ 20 մլն ՀՀ դրամի չափով։

Էդուարդ Բաբայանը չի ընդունում իրեն առաջադրված մեղադրանքը (տեսանյութ)

Հեղինակ` Միլենա Խաչիկյան