Փաստ ինֆո

Նուբարաշենի խճուղում դաժան ծեծի հետևանքով սպանված 58-ամյա Եղիշե Խաչատրյանի կինը՝ լեզվաբան Փառանձեմ Մեյթիխանյանը, ամուսնու սպանությունից ամիսներ անց զանգահարել և սպառնացել է գործով մյուս տուժող Սանասար Բադալյանին: Այդ մասին այսօր՝ գործով հերթական դատական նիստի ընթացքում, հայտարարեց տուժող Բադալյանը:

Տուժող Սանասար Բադալյանի հարցաքննությունը նախորդ դատական նիստում անավարտ էր մնացել և այսօր շարունակվեց: Նրա խոսքով՝ դեպքից հետո Մեյթիխանյանը 3 անգամ զանգահարել է իրեն, երկու անգամ ցանկացել է իրեն տեսնել և շնորհակալություն հայտնել, որին ի պատասխան՝ Բադալյանն ասել, որ համարի՝ հայտնել է: Մեկ անգամ էլ զանգահարել է և սպառնացել. «Հաթաթա էր տալիս, թե դու դեռ քո հալը կտեսնես դատարանում»:

Ըստ Բադալյանի՝ Մեյթիխանյանն արագ-արագ խոսել է, ինքն էլ փորձել է հասկանալ, թե ինչ է ասում, սակայն սպառնացել է ու հեռախոսն անջատել, իսկ երբ ինքը հետ է զանգել, Մեյթիխանյանը հեռախոսազանգին չի պատասխանել:

Բացի հեռախոսազանգերը, ըստ տուժողի, մեկ անգամ էլ Մեյթիխանյանն իրենց տուն է գնացել՝ իրեն տեսնելու նպատակով, սակայն ինքը տանը չի եղել:

Ի դեպ, հեռախոսազանգերի վերաբերյալ Մեյթիխանյանը հայտարարությամբ հանդես եկավ և չհերքեց, որ զանգահարել է, սակայն նշեց, թե զանգահարելու նպատակը եղել է շնորհակալություն հայտնել:

Տուժող Բադալյանը նաև նշեց, որ նախորդ դատական նիստից հետո՝ Մեյթիխանյանը կտրուկ մոտեցել է իրեն, սակայն իրենց մեջտեղում կանգնել է մի ոստիկան և թույլ չի տվել, որ Մեյթիխանյանը մոտենա, այդ ընթացքում վերջինս ինչ-որ բան է ասել, որը ինքը չի լսել:

Թե ինչ նպատակով է Մեյթիխանյանը ցանկացել իրեն մոտենալ, ինքը չգիտի: Ամբաստանյալ Խաչիկ Կոսյանի պաշտպան Վաչագան Քոսյանը նշեց, որ Մեյթիխանյանն ակնհայտ ագրեսիվ էր այդ պահին:

Հիշեցնենք, որ տուժողը նախորդ դատական նիստում ցուցմունք տալիս հայտնել է, որ դեպքի օրը գնացել է ավտոսպասարկման կետ, որտեղ գտնվել է իր որդին, որպեսզի որդուն վերցնի և տուն գնան:

Նուբարաշենի խճուղ վրա տեսել է «Ֆորդ» մակնիշի ավտոմեքենա, 3 տղամարդու, մի տարեց կնոջ և երիտասարդ աղջկա, մտածել է, թե վթար է տեղի ունեցել, մոտենալով կանգնեցրել է ավտոմեքենան, սակայն հայհոյանքներ է լսել, ինքն էլ ավտոմեքենայի ապակին իջեցրել է ու ասել. «Արա՛, թարգը տվեք, էս ի՞նչ եք անում, մեծ կին կա կանգնած»:

Այդ ասելուց հետո մի տղամարդ եկել է իր ուղղությամբ, սակայն ինքն անմիջապես քշել է ավտոմեքենան ու հեռացել: Հասնելով ավտոմեքենաների սպասարկման կետին՝ իրեն ուղղված արտահայտությունից, թե՝ «էտ ում արա ասեցիր», պտտվել է ու տեսել է ամբաստանյալ Արարատ Նիկողոսյանին և ևս մեկ անձնավորության, ով եղել է ծաղկավոր վերնաշապկով ու քաշել է Արարատի ձեռքից:

Ըստ տուժողի՝ իրեն չեն հարվածել, այլապես կզգար, ավտոսպասարկման աշխատակիցները միջամտել են վիճաբանությանը և հարթել, ինչից հետո ինքը որդու հետ հեռացել է այդտեղից:

Սահմանված ապացույցների հաջորդականության համաձայն՝ հաջորդ դատական նիստին կհարցաքննվեն վկաները:

Աղբյուր` Փաստինֆո