Փաստ ինֆո

Գեղարքունիքի մարզի ընդհանուր իրավասության դատարանի նախագահ Աղվան Պետրոսյանն իրեն առաջադրված մեղադրանքը չի ընդունում՝ կաշառք չի վերցրել և չի տվել: Այդ մասին «Փաստինֆո»-ի թղթակցի հետ զրույցում ասաց Պետրոսյանի պաշտպան Արմեն Մելքոնյանը:

Ըստ պաշտպանի՝ Աղվան Պետրոսյանը, ով ունի բազմաթիվ առողջական խնդիրներ՝ ողնաշարի ճողվածք, շաքարային դիաբետով է տառապում, զոբ, վերջին օրերին գտնվել է հիվանդանոցում և ստացիոնար բուժում է ստացել, սակայն երեկ ժամը 18:00-ին բժիշկները նրան այդ վիճակում դուրս են գրել հիվանդանոցից, իսկ ժամը 21:00-ի սահմաններում առաջին ատյանի դատարանը քննել է նրա նկատմամբ խափանման միջոց կալանավորումն ընտրելու վերաբերյալ միջնորդությունը:

Պաշտպանը նաև նշեց, որ մեծածավալ գործի նյութերին ծանոթանալու համար իրենց ընդամենը 40 րոպե ժամանակ է տրամադրվել, և իրենք ոչ միայն չեն հասցրել գործին ծանոթանալ, այլև՝ փաստաթղթեր ներկայացնել Պետրոսյանի առողջական վիճակի մասին, ինչպես նաև այն, որ նա անչափահաս երեխա ունի:

Տվյալ պարագայում պաշտպանը հարց է բարձրացնում՝ ինչի՞ց պաշտպանվեն, եթե ծանոթ չեն եղել գործի ողջ նյութերին, այդ պարագայում Պետրոսյանն օգտվել է լռելու իր իրավունքից, և պաշտպանը ևս միացել է նրան:

Արմեն Մելքոնյանը գտնում է, որ պետք է կալանավորեին՝ կալանավորեցին, այն դեպքում, երբ ենթադրյալ հանցագործություն կատարած անձին վարույթն իրականացնող մարմինը երբևէ չի հրավիրել, նա էլ չի խուսափել և փախուստի փորձ չի կատարել:

Ինչ վերաբերում է մեղադրանքին, ապա պաշտպանը նշեց, որ Պետրոսյանին մեղադրանք է առաջադրվել խմբով կաշառք վերցնելու համար այն դեպքում, երբ առաջին ատյանի դատարանը գործում է միանձնյա, որոշումներ է կայացնում միանձնյա, նա որևէ այլ դատավորի վրա չի կարող ազդել որոշումներ կայացնելու հարցում, ուստիև՝ պաշտպանը գտնում է, որ մեղադրանքը սխալ է որակված:

Աղվան Պետրոսյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2 և 3-րդ կետերով՝ երկու դրվագով:

Լուսանկարը՝ «Առավոտ»-ի

Աղբյուր` Փաստինֆո