Փաստ ինֆո

Տավուշի մարզի ընդհանուր իրավասության առաջին ատյանի դատարանը՝ նախագահությամբ դատավոր Զ. Զաքինյանի, մայիսի 27-ին  Սասուն Խաչիկյանին արդարացրել է  ՀՀ քրեական օրենսգրքի 242-րդ  հոդվածի 2-րդ մասով առաջադրված մեղադրանքում (ճանապարհային երթևեկության  և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ)` նրա արարքում հանցակազմի բացակայության պատճառով:  Սասուն Խաչիկյանի  նկատմամբ քրեական հետապնդումը դադարեցվել է,  «ստորագրություն չհեռանալու մասին»  խափանման միջոցը՝  վերացվել:

Ի դեպ, Սասուն Խաչիկյանը առաջին ատյանի դատարանի արդեն երկրորդ դատավճռով է արդարացվում.  նույն դատարանը՝  նախագահությամբ դատավոր Ռաֆիկ Մելքոնյանի,  04.07.2013թ.   կայացրել էր արդարացման դատավճիռ, որը    Տավուշի մարզի դատախազի վերաքննիչ բողոքի հիման վրա  ՀՀ վերաքննիչ քրեական դատարանը 17.10.2013թ. որոշմամբ բեկանել էր  և գործն ուղարկել նույն դատարան` այլ կազմով նոր քննության:

Այսպես, ՀՀ ոստիկանության քննչական գլխավոր վարչության Նոյեմբերյանի քննչական բաժանմունքի կողմից 25.04.2012թ. ՀՀ քրեական օրենսգրքի 242-րդ  հոդվածի 2-րդ մասով հարուցվել էր  քրեական գործ, իսկ 18.09.2012թ.  Սասուն  Խաչիկյանը նույն հոդվածով ներգրավվել էր  որպես մեղադրյալ:

Ըստ մեղադրանքի, նա, 2012թ.-ի ապրիլի 25-ին, ժամը 10:30-ի սահմաններում, միջպետական ավտոճանապարհի Իջևան-Նոյեմբերյան 46-րդ կմ-ում` Տավուշի մարզի Ջուջևան գյուղի տարածքում, իրեն պատկանող «Վազ-2102»  մակնիշի ավտոմեքենայով դեպի Նոյեմբերյան քաղաքի ուղղությամբ երթևեկելիս, առանց հաշվի առնելու առկա ճանապարհային պայմանները, իսկ արագությունը չի ապահովել ավտոմոբիլի լիարժեք կառավարումը, թույլ է տվել ՃԵԿ-ի 65 և 66 կետերի ու  «Ճանապարհային երթևեկության անվտանգության ապահովման մասին»  ՀՀ օրենքի 23 հոդվածի 3-րդ կետի պահանջին հակասող գործողություններ, տեխնիակական տեսակետից ստեղծել վթարային իրադրություն, դրանով իսկ պայմանավորել տվյալ ընդհարման առաջացումն` ինքն իրեն զրկելով այն կանխելու տեխնիկական հնարավորությունից, ձախ կիսաշրջադարձով ընթանալու ժամանակ դուրս է եկել երթևեկելի գոտուց դեպի աջ, բախվել ճամփեզրին գտնվող քարին ու շրջվել, որի հետևանքով ավտոմեքենայի առջևի աջ նստատեղում գտնվող ուղևոր Սմբատ Գուլքանյանը ստացած մարմնական վնասվածքներից վթարի վայրում մահացել է, իսկ Սասուն Խաչիկյանն ստացել է առողջության միջին ծանրության վնաս՝ առողջության տևական քայքայումով:

Դատարանը, սակայն, երկրորդ դատաքննությամբ ևս գտել է, որ Սասուն Խաչիկյանին առաջադրված մեղադրանքը հիմնավորված չէ: Մասնավորապես, դատաքննությամբ ամբաստանյալի մեղքը հիմնավորող որևէ ապացույց ձեռք չի բերվել, «ընդհակառակը` գործի փաստական հանգամանքները խոսում են այն մասին, որ վթարի պահին ավտոմեքենան վարել է տուժող Սմբատ Գուլքանյանը»:

Այսպես, Ճանապարհա-տրանսպորտային դեպքի վայրի զննության մասին արձանագրության համաձայն` Սմբատ Գուլքանյանի դիակը ստորին վերջույթների հատվածով գտնվել է ավտոմեքենայի մեջ` վարորդի հատվածում, որոնք ուղղված են եղել դեպի վեր, իսկ մարմնի վերին մասը դուրս էր եկել ավտոմեքենայի դիմապակու տեղով, կրծքավանդակից վերևի հատվածը գտնվել է տանիքի տակ` գետնին հպված:

Դեպքից անմիջապես հետո տվյալ վայրում գտնվող, գործով ականատես վկա, Վաղինակ Պետրոսյանը Սասուն Խաչիկյանին դուրս է բերել ավտոմեքենայի առջևի աջ կողմի նստատեղից, այնուհետև նկատել է, որ մյուս կողմում` վարորդի նստատեղին, այլ մարդ էլ կա: Փորձել է նրան էլ մեքենայից հանել, սակայն նա եղել է խորքում` կծկված, դեպի այգու ցանկապատի կողմը, և նրան հանել չի հաջողվել:

Դեպքի վայր ժամանած փրկարարները տուժող Սմբատ Գուլքանյանի մարմինը դուրս են բերել ավտոմեքենայի առջևի ձախ` վարորդի նստատեղից` տեխնիկական միջոցների գործադրմամբ, քանի որ ավտոմեքենան շրջված է եղել տանիքի վրա և տուժողի մարմինը, որովայնից վերև, գտնվել է ավտոմեքենայի տանիքի տակ, գլխի մի մասը դիմապակուց դուրս, իսկ ոտքերը գտնվել են ավտոմեքենայի սեղմակների մոտ:

Ավտոմեքենայի դիմապակու առջևի ստորին մասից` առջևի ուղևորի դիմացի հատվածից, առգրավված դիմապակու կտորների և դիմապակու աջ կողմում փակցված ԱՊՊԱ կտրոնի վրա հայտնաբերվել են արյան հետքեր, որոնք ըստ փորձագետի եզրակացության` կարող էին առաջանալ արյան Օ խումբ ունեցող որևէ անձից, այդ թվում` ինչպես Սմբատ Գուլքանյանից, այնպես էլ` Սասուն Խաչիկյանից: Սմբատ Գուլքանյանը մարմնի որևէ մասում բաց վերքեր չի ունեցել, իսկ Սասուն Խաչիկյանը ճակատային շրջանում ունեցել է գանգամաշկված վերք:

Դատաավտոտեխնիկական, դատահետքաբանական և դատաբժշկական համալիր սկզբնական և կրկնակի փորձաքննությունների եզրակացությունների համաձայն` դրանցից առաջինում փորձագիտական հանձնաժողովը գտել է, որ վթարի առաջացման տվյալ մեխանիզմի պարագաներում «ՎԱԶ-2102»  մակնիշի ավտոմոբիլի վարորդի նստատեղում գտնվել է Ս. Խաչիկյանը, երկրորդում նշվել է, որ առավել հավանական է վթարին նախորդող պահին վարորդի նստատեղին գտնվեր Ս. Գուլքանյանը, իսկ երրորդ` դատահետքաբանական և դատաբժշկական կրկնակի փորձաքննության եզրակացությամբ, նշվել է, որ ավտոմեքենայի վարորդի նստատեղին հնարավոր է, որ գտնվել է Ս. Խաչիկյանը, սակայն փորձաքննության առաջադրված հարցերին հստակ հնարավոր կլիներ պատասխանել նախաձեռնողի կողմից փորձագիտական հանձնաժողովին դեպքի պահին Ս. Գուլքանյանի և Ս. Խաչիկյանի հագին եղած հագուստների տրամադրման պարագայում:

Այսինքն` փորձաքննությունների եզրակացություններով ևս հստակ չի նշվել, որ վթարի պահին ավտոմեքենան վարել է ամբաստանյալ Սասուն Խաչիկյանը: Փորձագետները միայն հնարավոր են համարել այս կամ այն տարբերակը, որը պետք է գնահատվի դատաքննությամբ ձեռք բերված ապացույցների ամբողջության մեջ:

Գործով մի շարք վկաներ`Հայկ Բաբաջանյանը, Վոլոդյա Խաչիկյանը, Բաղիշ Աբովյանը, ցուցմունք են տվել այն մասին, որ դեպքին նախորդող րոպեներին տեսել են, որ ավտոմեքենան վարում է տուժող Սմբատ Գուլքանյանը:

«Հետևաբար` հաշվի առնելով քրեադատավարական այն նորմը, որ հանցանք գործելու մեջ անձի մեղավորության մասին հետևությունը չի կարող հիմնվել ենթադրությունների վրա, այլ այն պետք է հաստատվի գործին վերաբերող փոխկապակցված հավաստի ապացույցների բավարար ամբողջությամբ, և մեղադրանքն ապացուցված լինելու վերաբերյալ չփարատված բոլոր կասկածները պետք է մեկնաբանվեն հօգուտ ամբաստանյալի, դատարանը եկավ այն համոզման, որ սույն գործով ամբաստանյալ Սասուն Խաչիկյանի մեղքը հավաստի և բավարար ապացույցներով հիմնավորված չէ, ուստի նրա նկատմամբ պետք է կայացնել արդարացման դատավճիռ», - եզրահանգել է դատարանը: