Փաստ ինֆո

Նիկոլ Փաշինյանի Տավուշի մարզում տեղի ունեցած հանդիպումից հետո բնակիչների շրջանում մտահոգություններն ավելի են սրվել, իսկ սահմանամերձ վարչական շրջանների ղեկավարները՝ հիասթափվել։

Նրանց մինչ այդ իշխանությունները վստահեցրել էին, թե ոչինչ չեն զիջելու ու խոսակցությունները մտացածին են, ԶԼՄ-ներին վստահել չի կարելի։ Իսկ երեկ արդեն համոզվեցին, որ իշխանություններն են ստել։

Փաշինյանի հետ հանդիպումից հետո գյուղացիները շարունակել են քննարկումները։ Համացանցում տարածված տեսանյութերից պարդ է դառնում, որ մտադիր են դիմել ակտիվ գործողությունների, փակել ճանապարհը, դիմել ինքնապաշտպանության։

«Փաստինֆոն» փորձեց խոսել Ոսկեպարի գյուղապետ Իշխան Աղբալյանի հետ, պարզելու վարչական շրջանում տրամադրությունը ու կրկին հետաքրքրվելու, թե արդյո՞ք այսօր ևս կարծում է, որ անկլավների մասին նախկինում քննարկվածը միայն խոսակցություններն են։

Նշենք, որ միայն օրեր առաջ, երբ Բաքուն խոսեց 4 գյուղն իրեն անհապաղ հանձնելու մասին, Աղբալյանը «Փաստինֆո»-ին ասել էր, թե դրանք միայն խոսակցություններ են, իրենք «դուխով» ապրում են ու այդ հայտարարությունները հաշվի առնող չկա։

«Ադրբեջանը Ոսկեպարը չի կարող ուզել։ Ոսկեպարը հայկական տարածք է, հայկական հող է 100-ավոր տարիների պատմություն ունի, 7-րդ դարի եկեղեցին Ադրբեջանը ո՞նց կարող է ուզել»,- մարտի 11-ին «Փաստինֆո»-ին ասել էր Իշխան Աղբալյանը, ինչից մեկ շաբաթ հետո արդեն Նիկոլ Փաշինյանը գնացել էր Ոսկեպար ու համոզում, որ տարածքների հանձնումը անհրաժեշտ է, թե չէ պատրեզամ կլինի։

Արդյոք հիմա եւս այդ հայտարարությունը հաշվի չեն առնում՝ «Փաստինֆո»-ն փորձեց պարզել Աղբալյանից, բայց այս անգամ պարզվեց նա սգո սրահում էր ու խոսելու տրամադրություն չուներ։

Փաշինյանի հետ հանդիպմանն ամենաակտիվ հարց տվողներից էր

Ոսկեպարի նախկին գյուղապետ Սերոբ Մախսուդյանը։ Նրա հետ զրույցը ևս չափազանց կարճ էր։ Մախսուդյանն առայժմ անելիքների մասին խոսել չցանկացավ, նրա խոսքի տոնից միայն հասկացվում էր , որ բնակիչը ծայրահեղ մտահոգ է ու խոսելու աննպատրատ՝ անորոշության հետևանքով։

Աղբյուր` Փաստինֆո