Փաստ ինֆո

Գեղարքունիքի մարզի ընդհանուր իրավասության դատարանում՝ դատավոր Վարդան Հարությունյանի նախագահությամբ, ընթանում է Ազատ գյուղի զորամասի զինվորական կացարանում 15 զինծառայողի կյանք խլած հրդեհի գործով դատական նիստը՝ բավականին լարված մթնոլորտում։

Դատարանում այսօր պետք է շարունակվեր տուժող Գարուշ Սարգսյանի հարցաքննությունը, որը բավականին հակասական ցուցմունքներ է տվել և տուժող կողմն ու հանրային մեղադրողը կասկածներ ունեն՝ նրա նկատմամբ կիրառված որոշակի ճնշումների մասին։ Թե՛ հանրային մեղադրող Արշակ Մարտիրոսյանը, թե՛ տուժողների իրավահաջորդների ներկայացուցիչ Նորայր Նորիկյանը պահանջեցին դատարանից՝ հարկադրանք կիրառել Գարուշ Սարգսյանի նկատմամբ՝ դատական նիստին նրա ներկայությունն ապահովելու համար։ Ավելին, ծնողները պահանջեցին հենց այսօր ապահովել նրա ներկայությունը, սակայն նախագահողը պարզաբանեց, որ դրա համար պետք է որոշում կայացվի՝ «փաստաթղթով», որ կարողանան բերման ենթարկել, ըստ այդմ, նրան հարկադրաբար կներկայացնեն դատարան, սակայն՝ ոչ այսօր։

Հաջորդիվ, քննարկման առարկա դարձվեց մեղադրյալ Եղիշե Հակոբյանի խափանման միջոցի հարցը։ Հանրային մեղադրող Արշակ Մարտիրոսյանը նշեց, որ այս պահին շարունակում են առկա լինել ռիսիկերը և պետք է ևս երեք ամսով երկարացնել կալանքի ժամկետը։ Տուժողների ներկայացուցիչ Նորայր Նորիկյանը համաձայնեց դատախազի պնդման հետ՝ նշելով, որ Հակոբյանի խափանման միջոցը չպետք է փոխվի, սակայն կասկածահարույց համարեց, որ գործով անցնող մյուս անձանց նկատմամբ այլ խափանման միջոցներ են կիրառվել։ Ըստ Նորիկյանի՝ նրանք ևս պետք է կալանավորվեն։ Եղիշե Հակոբյանի պաշտպան Հովսեփ Սարգսյանը չառարկեց, միայն միջնորդեց, որ հնարավորություն տրվի Եղիշե Հակոբյանի՝ հարազատների հետ տեսակցությունների արգելքը վերացնել։ Դատարանը որոշեց ևս երեք ամսով երկարացնել երեք ամսով կալանավորման ժամկետը, սակայն տեսակցությունների արգելքը և մյուս սահմանափակումները՝ չվերացվեցին։ Զոհված զինծառայողների ծնողները վրդովվեցին՝ կա՛մ բոլորին թող կալանավորեն, կա՛մ բոլորին ազատեն, պետք է բոլորը կալանավորված լինեն, ազատության մեջ գտնվող անձինք շատ բան գիտեն․ «Հիմնական մեղավորներն ազատության մեջ են, երկրորդայինները՝ կալանավորված»։ Մեղադրյալ Մառլեն Սարգսյանի պաշտպանը ևս ուշադրություն հրավիրեց այն հանգամանքին, որ հիմնական պատասխանատուների նկատմամբ որպես խափանման միջոց է կիրառված բացակայելու արգելքը, իսկ մյուսների նկատմամբ կալանքը, ինչը, ըստ փաստաբանի, ոչ թե մյուսների խափանման միջոցի փոփոխման հիմք է, այլ՝ բացարկի։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո