Փաստ ինֆո

Ազատ գյուղի զորամասի զինվորական կացարանում հրդեհի գործով քննություն չի իրականացվել` պարզելու Եղիշե Հակոբյանի հնարավոր կապն ադրբեջանցիների հետ, ինչպես նաև` չի հերքվել դիվերսիայի վարկածը: Հրավիրված մամուլի ասուլիսին տուժողների իրավահաջորդների ներկայացուցիչ Նորայր Նորիկյանը նկատեց` ծնողներն ու հասարակությունը այդպես էլ չպարզեցին, թե իրականում ինչ է տեղի ունեցել, իսկ ապաշնորհ իրավապահներն էլ ավելի մեծ կասկած սերմանեցին։ Ըստ նրա` ամեն ինչ արվում է, որ այս հանցագործությունն ամբողջությամբ չբացահայտվի, մեղավորների ողջ շրջանակը չբացահայտվի, և քարոզվի միայն իշխանությունների վարկածը։

Մասնավորապես, Նորիկյանը նշեց, որ գործով չկա որևէ փաստացի հիմնավորված ապացույց, որ իրավապահները կատարել են այնպիսի գործողություններ, որը կհերքի իրենց վարկածով առաջ քաշված գործով անցնող Եղիշե Հակոբյանի հնարավոր կապը ադրբեջանական հատուկ ծառայությունների հետ, մինչդեռ, սովորաբար նման դեպքերում մեր հետախուզական ծառայությունները ստուգումներ են անցկացնում, այնուհետև կա’մ հերքում, կա’մ հաստատում են տեղեկատվությունը։ Այդ գործողությունն այս գործով չի իրականացվել, ինչը Նորիկյանի գնահատմամբ տարօրինակ է: Բացի այդ, Նորիկյանը նկատեց, որ հիմնավոր կերպով չի հերքվել այն վարկածը, որ ողբերգությունը տեղի է ունեցել հակառակորդի դիվերսիոն գործողությունների հետևանքով:

«Չեն հերքվել նաև այլ վարկածներ, որոնք, մասնավորապես, կարող էին կապված լինել դիզվառելիքի և զինամթերքի վաճառքի, դավաճանության, հակառակորդի հետ հնարավոր շփման և այլնի հետ։ Այս տարածքը վերածվել է դիզվառելիքի իրացման շուկայի։ Որքանո՞վ կարելի է խոսել սրա մեջ ներգրավված սպաների շղթայի բացահայտման անհրաժեշտության մասին»,- նշեց Նորիկյանը` հավելելով, որ ծնողները չեն հավատում պաշտոնական վարկածին, համոզված են, որ իրենց երեխաները հրդեհից առաջ արդեն մահացած կամ առնվազն անգիտակից են եղել, իսկ հրդեհը կազմակերպվել է հետքերը թաքցնելու կամ հրդեհի փաստի վրա հասարակության ուշադրությունը շեղելու համար:

Աղբյուր` Փաստինֆո