Փաստ ինֆո

ՀԱՊԿ գագաթնաժողովում բոլոր կողմերին հետաքրքրող հարցերը քննարկվեցին, բացի՝ Հայաստանից, մեր վերաբերյալ որևէ որոշում կամ հայտարարություն այդպես էլ չընդունվեց: «Փաստինֆո»-ի հետ զրույցում արձանագրել է «Հայրենիք» կուսակցության խորհրդի անդամ Խաչիկ Գալստյանը՝ ամփոփելով չորեքշաբթի Երևանում կայացած ՀԱՊԿ գագաթնաժողովի արդյունքները:

Խաչիկ Գալսստյանը հիշեցնում է՝ Հայաստանն առաջին անգամ ՀԱՊԿ պայմանագրի 4-րդ կետով էր դիմել կազմակերպությանը՝ ագրեսիայի դեպքում անհապաղ օգնություն ցուցաբերելու համար, սակայն Հայաստանի խնդրանքն այդպես էլ չբավարարվեց:

Հայաստանն ակնկալում էր նաև, որ գագաթնաժողովի ժամանակ համատեղ հայտարարությունը կընդունվի, որտեղ ագրեսիա և նման ձևակերպումներ կլինեն, սակայն այս սպասումները ևս չարդարացան.

«Ես, որպես ՀՀ քաղաքացի, արդարացված չեմ համարում սա, ես կարող եմ ավելին պահանջել, բայց մյուս տեսանկյունից կարևոր է՝թե ով է այդ հարցերը բարձրացնում, կամ քո իշխանությունները որքա՞նով են ազնիվ իրենց գործընկերների հետ: Ես զգում եմ որ կա վստահության լուրջ դեֆիցիտ միմյանց նկապտամբ: Հայաստանի իշխանությունների գործողությունները կարելի է մեկնաբանել որպես «քաղաքական ավանտյուրա», որով փորձում են կողմերին ներքաշել կոնֆլիկտի մեջ: Եթե դու անձամբ չես պատրաստվում քո ինքնիշխանությանը պաշտպանել, ադրբեջանցիներին չես կարողանում քո սահմաններից դուրս հանել, բոլորին բացեիբաց հայտարարում ես, թե էս սարի համար, էս ձնի համար ես չեմ պատրաստվում պատերազմել, ապա ի՞նչ ակնկալիքով ես ուրիշներից պահանջում, որ գան ու քո փոխարեն կռվեն, այդպես չի լինում, բոլորն այս ավանտյուրան լավ հասկանում են, դրա համար էլ ՀԱՊԿ բոլոր պետություններն իրենց բավականին սառը պահեցին »,-հավելեց փորձագետը:

Նիկոլ Փաշինյանը հրաժարվել էր ստորագրել Հայաստանին օգնություն ցուցաբերելու համատեղ միջոցառումների մասին ՀԱՊԿ փաստաթուղթը, պարզաբանելով որ այն թերի է և լրամշակման կարիք կա: Ինչպես պարզաբանել էր ԱԺ նախագահ Ալեն Սիմոնյանը՝ հայտարարության մեջ հստակ քաղաքական գնահատական չի տրվել ադրբեջանական ագրեսիային, դրա համար էլ փաստաթուղթը չի ստորագրվել:

Հարցին՝ եթե իսկապես այդ փաստաթղթում բացակայել է քաղաքական գնահատականը, ապա այս դեպքում արդարացված չէ՞ Փաշինյանի՝ փաստաթուղթը չստորագելու որոշումը, Խաչիկ Գալստյանն ասաց.

«Ես չեմ ուզում նրա փաստաբանի կարգավիճակում հանդես գալ, բայց մեծ կարևորություն ունի՝ ով է Հայաստանի շահերը ներկայացնում միջազգային հարթակներում, Հայաստանի այսօրվա իշխանություններին որևէ մեկը լուրջ չի վերաբերվում, նրանց մոտենում են ջահելի կարգավիճակով: Միայն Լուկաշենկոյի վերաբերմունքը՝ ՀՀ վարչապետի նկատմամբ բավական է, որ նման ղեկավար Հայաստանը չունենա»:

Դիտարկմանը, ստացվում է որ մի կողմից Հայաստանն ունի հարևան, որն իր թշնամին է, մյուս կողմից էլ՝ բարեկամ, որը, սակայն հրաժարվում է ագրեսիայի ժամանակ օգնություն ցուցաբերել իրեն՝ Խաչիկ Գալստյանն ասաց, որ կիսում է այս տեսակետը, միևնույն ժամանակ շեշտեց, որ պետք է հաշվի առնել՝ կա՞ արդյոք այլընտրանք.

«Այընտրանքը քո անվտանգության հիմնական սպառնալիք հանդիսացող պետության վասալը դառնալն է: Թուրքիան և Ադրբեջանն են քո հիմնական սպառնալիքները: Եթե դու չունես այլընտրանքային անվտանգային մոդել, մերժում ես ռուսական մոդելը, ապա ինքնաբերաբար հայտնվում ես քո թշնամու անվտանգային անձրևանոցի տակ:Այսօրվա իշխանություններն իրենց քաղաքական հանճարեղ ստրատեգիայով որոշել են, որ այդպես պետք է լինի,սա նշանակում է՝ քաղաքական հավկուրություն և ազգային նոր ցեղասպանության առաջ կանգնեցնել»,-եզրափակեց Խաչիկ Գալստյանը:

Աղբյուր` Փաստինֆո