Փաստ ինֆո

Վարդենիսը մարտի 7-ին վերջապես համայնքապետ կունենա: Համայնքում վստահ են՝ եթե ՔՊ-ն չխոչընդոտի, ապա ընդդիմության թեկնածուն՝ Ահարոն Խաչատրյանը, կընտրվի համայնքի ղեկավար:

Հիշեցնենք, որ դեկտեմբերի 5-ի ՏԻՄ ընտրություններից մինչ օրս Վարդենիսը համայնքապետ չունի:

Ճիշտ է՝ ընդդիմությունն այստեղ ունի մեծամասնություն. «Քաղաքացիական պայմանագիր»-ը ստացել էր 13 մանդատ, «Ահարոն Խաչատրյան» դաշինքը՝ 10, «Միասնական Վարդենիս»-ը՝ 4 մանդատ։ Ընդդիմադիր ուժերն ընտրություններից հետո կոալիցիա կազմելու հուշագիր էին ստորագրել, եւ մանդատների քանակն արդեն բավարարում էր համայնքապետ ընտրելու համար, սակայն ՔՊ-ն տապալում է համայնքի կառավարումը։

Վարդենիսի ավագանու դեկտեմբերի 30-ի նիստում ընդդիմադիր «Ահարոն Խաչատրյան» և «Միասնական Վարդենիս» խմբակցությունները համայնքապետ էին ընտրել Ահարոն Խաչատրյանին, իսկ ՔՊ-ն շտապեց դիմել դատարան՝պահանջելով չեղյալ համարել ավագանու անդրանիկ նիստը, որի ժամանակ համայնքապետ էր ընտրվել ընդդիմության թեկնածուն: Դատարանը մասնակի բավարարել էր ՔՊ-ի հայցը՝ անվավեր ճանաչելով Վարդենիս համայնքի ղեկավար ընտրելու որոշումը, իսկ ընտրությունների արդյունքները թողել անփոփոխ։

Գեղամասար համայնքի ղեկավար Հակոբ Ավետյանը «Փաստինֆո»-ին հայտնեց, որ արդեն այսօր՝ մարտի 4-ին, ուժի մեջ է մտնում Վարդենիսի ավագանու առաջին նիստի արդյունքներն անվավեր ճանաչելու դատարանի որոշումը, իսկ մարտի 7-ին տեղի կունենա ավագանու հաջորդ նիստը, որի ընթացքում ավագանին համայնքապետ կընտրի:

Հակոբ Ավետյանը վստահ է, եթե կառավարությունը և ոստիկանությունը չմիջամտեն, նիստը նորմալ ընթանա, Վարդենիսը մարտի 7-ին համայնքապետ կունենա:

Մրցակցությունն ընթանալու է «Ահարոն Խաչատրյան» և «Միասնական Վարդենիս» դաշինքների թեկնածու Ահարոն Խաչատրյանի և «Քաղաքացիական պայմանագրի» թեկնածու Արամ Մելքոնյանի միջև:

Ընդ որում՝ Ավետյանը մեզ հետ զրույցում վստահություն հայտնեց, որ եթե ՔՊ-ն չխոչընդոտի, ապա իրենց թեկնածուն՝ Ահարոն Խաչատրյանը կհաղթի, քանի որ ընդդիմության ձայները 1-ով առավել են ՔՊ-ից՝ 14/13 հարաբերակցությամբ.

«Մինչև հիմա ՔՊ-ն փորձել է տապալել ավագանու նիստը, ուժ կիրառեցին, սադրանքների դիմեցին, հիմա կարծում եմ մի քիչ բարոյականություն կունենան և հաշվի կառնեն, որ որոշողը ժողովուրդն է, կարծում եմ, նորմալ պետք է ամեն ինչ անցնի»,-ասաց նա:

Դեկտեմբերի 5-ի ՏԻՄ ընտրությունների հետո մինչ օրս Վարդենիսում անորոշ վիճակը պահպանվում է, պարալիզացված վիճակ է, համայնքապետ չկա, ավագանին չի կարողանում իր որևէ գործառույթ կատարել, ինչի հետևանքով, Ավետյանի փոխանցմամբ, Վարդենիսը մեծ վնասներ է կրել.

«Բյուջեն հաստատված չէ, սոցիալական շատ խնդիրներ են առաջացել, գազի, լույսի գումարը չեն կարողանում վճարել, մեր բնակիչներին սոցիալական օգնություն չենք կարողանում տրամադրել, առհասարակ՝ ֆինանսական շարժ չենք կարողանում իրականացնել»:

Աղբյուր` Փաստինֆո