Փաստ ինֆո

Եթե ամեն ինչ հարթ ընթանա, արդեն մարտի սկզբին Վարդենիսը վերջապես համայնքապետ կունենա: «Փաստինֆո»-ին այս մասին հայտնեց Գեղամասար համայնքի ղեկավար Հակոբ Ավետյանը:

Հիշեցնենք, որ դեկտեմբերի 5-ի ՏԻՄ ընտրություններից մինչ օրս Վարդենիսը համայնքապետ չունի:

Վարդենիսի ավագանու դեկտեմբերի 30-ի նիստում ընդդիմադիր «Ահարոն Խաչատրյան» և «Միասնական Վարդենիս» խմբակցությունները համայնքապետ էին ընտրել Ահարոն Խաչատրյանին, սակայն ՔՊ-ն դիմել էր դատարան՝պահանջելով չեղյալ համարել ավագանու անդրանիկ նիստը, որի ժամանակ համայնքապետ էր ընտրվել ընդդիմության թեկնածուն: Դատարանը մասնակի բավարարել էր ՔՊ-ի հայցը՝ անվավեր ճանաչելով Վարդենիս համայնքի ղեկավար ընտրելու որոշումը:

«Փաստինֆո»-ին Հակոբ Ավետյանը հայտնեց, որ արդեն մատի 2-ին ուժի մեջ կմտնի դատարանի որոշումը, ընդդիմությունը չի բողոքարկելու դատարանի վճիռը, որպեսզի հնարավոր լինի մարտի սկզբին ավագանու նոր նիստ հրավիրել և համայնքապետ ընտրել:

Հակոբ Ավետյանը վստահ է, ընդդիմության թեկնածուն՝ Ահարոն Խաչատրյանը կընտրվի, քանի որ ընդդիմադիր խմբակցությունների ձայները գերակշռում են ՔՊ-ին։

«14/ 13 հարաբերակցությամբ մեր ձայները գերակշռում են, բայց մեր կառավարությանը շատ լավ գիտենք, կարող է ապօրինի մեր ավագանուց երկուսին կալանավորեն, որպեսզի անհավասարություն ապահովեն, մեր ավագանին դառնա 12 ու էլի մեր ուզածը չի լինի: Կառավարության, հիմնականում ՏԿԵ նախարար Գնել Սանոսյանի ուզածն այն է, որ այս ընտրությունները չեղյալ համարեն, մի քանի ամիս ձգձգեն, հետո նոր ընտրություններ անցկացնեն, բայց այդպես մեզ պետք չէ: Մեր կառավարությանը շատ լավ գիտենք, որ կարող է ապօրինի մի երկուսին կալանավորեն, մեր ավագանին դառնա 12-ը, այդ մարդիկ չեն ուզում իրենց պարտության հետ հաշտվել»,-ասաց Ավետյանը:

Հիշեցնենք նաև, որ Վարդենիսի նախկին համայնքապետ Արամ Մելքոնյանը նորընտիր համայնքապետ Ահարոն Խաչատրյանին տևական ժամանակ չէր վերադարձնում համայնքապետարանի բանալին և կնիքը, ինչի հետևանքով համայնքապետը մինչ օրս չի կարողանում անցնել իր աշխատանքային պարտականությունների կատարմանը, ավագանին չէր կարողանում որևէ գործառույթ կատարել, ողջ Վարդենիսը պարալիզացված էր:

Հակոբ Ավետյանի հաղորդմամբ՝ համայնքապետարանի բանալին և կնիքը վերցրել են նախկին համայնքապետ Արամ Մելքոնյանի մոտից, սակայն դեռ չեն փոխանցել Ահարոն Խաչատրյանին, համայնքապետարանի աշխատակազմի ղեկավարի մոտ է դեռ.

«Ընդունենք, բանալին տվեցին, կնիքը տվեցին, բայց կառավարությունը չի ընդունում մեր համայնքապետին, ինքը չի կարողանալու թուղթ ստորագրի, ոչինչ չի կարողանալու անի, պետք է, որ կառավարությունն ընդունի և ճանաչի նրան որպես համայնքի ղեկավար»,-ասաց նա:

Զրուցակցի հաղորդմամբ՝ Վարդենիսում անորոշ իրավիճակը պահպանվում է.

«Մեր ամբողջ համայնքը պարալիզացված է, շատ վատ վիճակ է, ոչ մի գործարք դեռ չենք կարողանում անել, օրինակ՝ սուբվենցիոն ծրագրերով գործարքներ ենք արել, բայց չենք կարողանում շինարարների գումարները փոխանցել, քանի որ իրավունք չունենք, որոշումներ կայացնել ֆինանսական շարժ ապահովել չեն կարողանում: Այս ամենը շատ վատ հատևանքներ է ունենալու, եթե մենք կարողանանք մարտին համայնքապետ ընտրել, դա կլինի չարյաց փոքրագույնը, իսկ եթե հանկարծ նոր ընտրություններ լինեն, իսկական խառնաշփոթ է դառնալու »,-ասաց Հակոբ Ավետյանը:

Աղբյուր` Փաստինֆո