Փաստ ինֆո

Վարդենիսի համայնքապետարանում այսօր՝ փետրվարի 8-ին, ավագանին նիստ էր հրավիրել։ Նիստին ներկա էին միայն ընդդիմադիր «Ահարոն Խաչատրյան» և «Միասնական Վարդենիս» խմբակցությունները, սակայն ՔՊ-ն չէր ներկայացել նիստին, թեև ծանուցված էն դրա մասին:

30 րոպե սպասելուց հետո ավագանին սկսեց նիստը՝ առանց ՔՊ-ականների: Նիստի օրակարգում ընդամենը մեկ հարց էր՝ համայնքի ղեկավարին կից խորհրդակցական մարմինների ձևավորման և գործունեության կարգի սահմանումը:

Համայնքապետի ՔՊ-ական թեկնածու Արամ Մելքոնյանը, լրագրողների հետ զրույցում հայտարարել էր, որ իրենք որոշել են չմասնակցել նիստին:

Նորընտիր համայնքապետ Ահարոն Խաչատրյանն էլ հայտարարեց, թե իրեն չի հետաքրքրում՝ Արամ Մելքոնյանը ինչ է հայտարարել.
«Մենք կես ժամ կսպասենք, կգան, միասին կշարունակենք նիստը, չեն գա, մենք միայնակ մեր նիստը կշարունակենք»-ասաց նա և հավելեց, ոչ ավագանու այսօրվա նիստն իրավազոր է համարում, քանի որ դատարանը մասամբ է բավարարել ՔՊ-ի հայցը, իսկ դատարանի որոշումն ուժի մեջ է մտնելու 30 օր հետո, ուստի ինքը լիարժեք կարող է շարունակել իր աշխատանքը:

Ահարոն Խաչատրյանը նաև հայտնեց, որ ինքն այս ընթացքում եղել է համայնքի տարբեր բնակավայրերում, ծանոթացել է մարդկանց խնդիրներին, սակայն չի կարողացել իր գործառույթները կատարել, քանի որ չի կարողացել իր աշխատասենյակ մտնել և կնիք էլ չի ունեցել:

Նրա խոսքով՝ ամբողջ Վարդենիս համայնքը պարալիզացված է:
Ահարոն Խաչատրյանի հաղորդմամբ՝ մարզպետարանից եկել, կապարակնքել են համայնքապետի աշխատասենյակը, նախկին ղեկավարությունից վերցրել են բանալիները:

Հարցին՝ ի վերջո ու՞մ մոտ էին համայնքապետի աշխատասենյակի բանալիները և կնիքը, Ահարոն Խաչատրյանն ասաց, որ ինքն էլ չգիտի.

«Երբ ես ամբողջությամբ անցա իմ պաշտոնական լիազորություններին, այդ ժամանակ բոլորը կպարզեմ»,- ասաց նա:

Աղբյուր` Փաստինֆո