Փաստ ինֆո

Գեղարքունիքում ադրբեջանական ԶՈՒ-երի ներխուժումից հետո հողատարածքների կորստի համար բնակիչներին փոխհատուցումներ դեռ չեն տրվել, ավելին՝ գործընթացը նույնպես չի սկսվել եւ հայտնի չէ, համայնքները ե՞րբ կկարողանան գրություններն ուղարկել։ Պատճառը Վարդենիսում համայնքապետի ընտրություններից հետո ստեղծված իրավիճակն է։

Ավելի վաղ հայտնել էինք, որ ռազմավարական նշանակության տարածքները ՀՀ իշխանությունների կողմից հակառակորդի հսկողությանը հանձնելուց հետո Սյունիք ու Գեղարքունիքի մի շարք բնակավայրերի բնակիչներ զրկվել են արոտավայրերից, այգիներից, դաշտերից եւ ավելի քան մեկ տարի անց կառավարությունը որոշել է փոխհատուցել 1հա-ի դիմաց 200 հազար դրամ, բայց դրա համար պետք է կատարվեն չափագրումներ, անհատականացվեն յուրաքանչյուր գյուղացու կրած վնասները։

Սակայն Գեղարքունիքում գործընթացը չի սկսվել. ադրբեջանական ԶՈՒ-երի անօրինական ներխուժումից հետո ապրուստի խնդիր ունեցող բնակիչների վիճակը ավելի է բարդացել է Վարդենիսում կայացած ընտրություններից հետո։ Նախկին համայնքապետը ընտրված նոր ղեկավարին չի հանձնում կնիքն ու բանալիները։

Գեղամասար համայնքում, օրինակ, պլանավորում են փոխհատուցում ստանալու համար դիմել համայնքապետարան, սակայն խոշորացված Վարդենիսն այժմ պարալիզացված է, գործընթացներ չեն կարող ընթանալ։ Գեղամասար համայնքի աշխատակազմի քարտուղար Կարեն Աբրահամյանը «Փաստինֆո»-ի հետ զրույցում հայտնեց, որ այս պահին տրված է միայն հողի հարկերի մասով փոխհատուցում։

«Գեղամասար համայնքում՝ Սոթք, Կութ, Ազատ, Նորաբակ բնակավայրերին տրամադրվել է հողի հարկերի մասով փոխհատուցում։ Բոլոր սեփականատերերին հողի հարկի մասով գումարը ըստ ելակետային թվի փոխանցվում է ու ըստ դրա մեր մոտ բաշխումն արվում է՝ ըստ բնակավայրերի և ըստ սեփականատերերի։ Դա այս պահին տրված է՝ ըստ ելակետային թվերի»։

Հարցին՝ ադրբեջանական կողմի տեղակայման հետևանքով տուժած քաղաքացիների փոխհատուցումներ ստանալու համար ի՞նչ քայլեր են արվում, Անդրեասյանը նշեց, որ այս պահի դրությամբ, հունվարի երեքից պարալիզացված վիճակ է, հետևաբար փաստաթղթաշարժ որպես այդպիսին չէր էլ կարող լինել։ Փորձում են հասկանալ՝ ինչ ավարտ է ունենալու Վարդենիսում զարգացող իրադարձությունները, բայց վստահեցրեց՝ գործընթաց արել են։

«Այդ մասով պրոցես արել ենք, բայց դեկտեմբերի 3-ից հետո ՝ մի փոքր պարալիզացված է, այդ պրոցեսների մասով որևէ ընթացակարգ չէր կարող լինել, քանի որ այս պահին որպես այդպիսին գործառույթ իրականացնող համայնքի ղեկավար, ցավոք, չունենք։ Գրություն ուղարկվելու համար պետք է ուղարկվի Վարդենիս խոշորացված համայնքի միջոցով արդեն, բայց ամբողջ հանրապետությունն է տեղյակ մեր մոտ առկա վիճակից»,- եզրափակեց Անդրեասյանը։

Ավելի վաղ հայտնել էինք, որ Վարդենիսի նորընտիր ղեկավար Ահարոն Խաչատրյանը չի կարողանում կատարել գործառույթները։ Նախկին համայնքապետը թաքցրել է համայնքապետի աշխատասենյակի բանալին ու կնիքը։ Համայնքի ղեկավարման համար անհրաժեշտ է, որ համայնքի ղեկավարը ստանձնի իր լիազորությունները, համայնքի աշխատակազմ ձեւավորվի, իսկ այս պահի դրությամբ համայնքների նախկին ղեկավարների լիազորությունները կասեցված են, ստացվում է՝ Վարդենիս խոշորացված համայնքին միացված նախկին բոլոր համայնքներում գործառություներն իրականացնողներ չկան՝ վարչական շրջանների պատասխանատուներ դեռ չեն նշանակվել, եւ բնականոն աշխատանքը խաթարվել է։

Հիշեցնենք, որ ՀՀ ինքնիշխան տարածքում ադրբեջանական զինված ծառայողների անօրինական ներկայության պատճառով Գեղարքունիքի մարզի Վերին Շորժա, Ներքին Շորժա, Նորաբակ, Կութ, Ազատ գյուղերում սահմանային բնակիչների իրավունքները խախտվել են։ Կութ գյուղում, օրինակ՝ ադրբեջանական զինվորականները շարունակում են տեղակայված լինել գյուղի անմիջական հարևանությամբ, որի պատճառով արոտավայրերի ընդամենը փոքր հատված են կարողանում օգտագործել։ Իսկ գյուղը գտնվում է նշանառության ներքո: Ադրբեջանական զինվորականների ակնհայտ ապօրինի տիրապետության տակ է հայտնվել նաև Գեղամասար համայնքի Նորաբակ գյուղի անասնագոմը, և բնակիչները զրկվել են այն օգտագործելու հնարավորությունից։ Այստեղ նաև ադրբեջանական ագրեսիայի հետևանքով 2022-ը սկսվեց կրակոցներով ու կորուստներով։

Սահմանամերձ դարձած բնակավայրերում արոտավայրերը, խոտհարքները, մյուս նշանակության հողատարածքներն օգտագործել հնարավոր չէ, քանի որ՝ այդ տարածքները գտնվում են ադրբեջանական զինված ուժերի ծառայողների ուղիղ նշանառության տակ:

Գյուղերի բնակիչների համար ներկայում առավել ևս հրատապ է այս հողատարածքներն օգտագործելու անհրաժեշտությունը՝ պայմանավորված սեզոնային պահանջներով: Շուտով պետք է սկսվի գարնանացանը, սակայն գյուղացիները հայտնվել են լուրջ խնդիրների առաջ: Սա էլ կարող է հանգեցնել անասնագլխաքանակի կտրուկ նվազման, քանի որ առկա չեն բավարար պայմաններ անասնապահությամբ զբաղվելու համար։ Այս ամենն էլ ավելի է խորացնելու սոցիալական խնդիրները:

Աղբյուր` Փաստինֆո