Փաստ ինֆո

Լավագույն ոլորտը, որը կարող է ֆինանսների արագ ներհոսք ապահովել մեր տնտեսություն դա հանքագործության ոլորտն է։ Այս մասին տնտեսագետների հետ «Պատիվ ունեմ» դաշինքի քննարկման ժամանակ ասաց ՀՀ ֆինանսների նախկին նախարար Վարդան Արամյանը՝ նկատելով, որ միաժամանակ պետք է կարողանալ բալանսավորել շրջակա միջավայրի խնդիրները և տնտեսական շահերը։

Նրա խոսքով մեր երկիրն ունի հնարավորություններ, որոնք պետք է ճիշտ օգտագործել։

«Կան գործող ընկերություններ, որոնց պոտենցիալը պետք է ճիշտ օգտագործել, որպեսզի կարողանանք տնտեսական ակտիվությունն արագ վերականգնենք։ Ե՛վ արժույթի միջազգային հիմնադրամը, և՛ համաշխարհային բանկը բազմաթիվ գործիքակազմեր դրեցին սեղանի վրա որպես օգնություն, բայց ցավոք մեր երկիրը թերացավ այդ գործիքներից արդյունավետ ու արագ կերպով օգտվելու հարցում»,-նշեց Վարդան Արամյանը։

Նրա արձանագրմամբ՝ ընտրություններից հետո նոր կառավարությունը նախեւառաջ պետք է կարգի բերի  կայունության 4 հենասյուներից երեքին, որոնք այսօր բացակայում են։

Դրանք են՝ հարկաբյուջետային կայունություն, դրամավարկային եւ ֆինանսական քաղաքական կայունություն եւ անվտանգություն. «Միջազգային փորձը ցույց է տալիս, որ դրանցից ամենակարեւորը անվտանգությունն է. եթե անվտանգային միջավայրն ապահովված չէ, մենք պետք է տնտեսական զարգացման կամ արագ ներդրումային ներհոսքի մասին մոռանանք: Սա կարեւորագույն խնդիր է:

Տնտեսական հիմնասյուները եւս կարեւոր են. Տարբեր տնտեսագետներ բազմիցս խոսել են հարկաբյուջետային կանոնների խախտման մասին, որն ունի իր օբյեկտիվ եւ սուբյեկտիվ պատճառները»,- նշել է նա:

Արամյանի խոսքով, օբյեկտիվը տնտեսական ճգնաժամն է, երբ շատ երկրներ պարտադրված եղան բարձր դեֆիցիտներ ունենալ. «Մեր պրոբլեմն այն է, որ 2018-2019 թվականներին կառավարությունը շատ պահային որոշումներ է կայացրել՝ առանց հեռակետին նայելու: Այսինքն գայթակղվեց հարկերի հավաքագրման բարձր մակարդակով եւ չափից շատ ընթացիկ ծախսերի գծով պարտավորություններ ստանձնեց, որի հնարավորությունը չուներ:

Մենք պարտադրված ենք ապրել մի իրողության մեջ, որտեղ 2021 թվականի բյուջեն նախագծված է 342 մլրդ դրամ պակասորդով, որից ընդամենը 215 մլրդն ենք մենք ուղղում կապիտալ ծախսերին, իսկ մնացածը պարտքային միջոցները մենք վերաուղղում ենք մեր ընթացիկ ծախսերի ֆինանսավորմանը, սա լուրջ խնդիր է, խորը վերլուծական աշխատանք է պետք»,- նշել է  նախկին նախարարը:

Նա կարեւորել է  ճգնաժամից հետո շատ արագ միջոցների մոբիլիզացնումը։ «Լավագույն ոլորտը, որ կարող է ապահովել մեծ արտարժութային ներհոսք, դա հանքագործությունն է:  Այստեղ պետք է ուշադրություն դարձնել շրջակա միջավայրի խնդիրներն ու տնտեսական շահերը բալանսավորելուն: Կան գործող ընկերություններ, որոնց ներուժը պետք է ճիշտ օգտագործել:

Կարծում եմ՝ մի բան եւս, որ միշտ բացակայել է, միջազգային կառույցների գործիքների եւ հնարավորությունների ճիշտ օգտագործումն է: Ցավոք, մեր երկիրը թերացավ միջազգային կառույցների կողմից տրամադրվող գործիքակազմերից օգտվելուց»- նշել է նա:

Աղբյուր` Փաստինֆո