Փաստ ինֆո

«Արցախի Պաշտպանության բանակի լուծարման մասին լուրերն, առայժմ ընկալում եմ զուտ ասեկոսեների մակարդակով, ոչ ավելին: Իհարկե, հատկապես, վերջին մի քանի ամիսների ընթացքում մենք անընդհատ ինչ – որ սենսացիոն լուրեր ենք լսում, որոնք մասամբ նաև իրականանում են, բայց ինչ վերաբերում է Արցախի ՊԲ-ն լուծարելու մասին լուրերին՝ չեմ կարծում, թե դա հնարավոր կլինի անել»,- «Փաստինֆո»-ի հետ զրույցում ասել է Արցախի Ազգային Ժողովի «Արդարություն» խմբակցության պատգամավոր Մետաքսե Հակոբյանը՝ անդրադառնալով երեկ Սուրբ Աթոռում նախկին դեսպան Միքայել Մինասյանի հայտարարությանն առ այն, որ Նիկոլ Փաշինյանը Պաշտպանության նախարար աշխատող Վաղարշակ Հարությունյանի հետ պայմանավորվածության են եկել մոտ ապագայում կազմալուծել Արցախի Պաշտպանության բանակը:

Մետաքսե Հակոբյանն ընդգծում է՝ ինքն ունի հստակ պատկերացումներ այն մասին, թե ի՞նչ կարող է պատահել, նույնիսկ, եթե Արցախի Պաշտպանության բանակը լուծարվի. «Մենք մեր աչքի առաջ վերադասավորվելու հեռանկարներ ունենք, եթե անգամ, Արցախի բանակի լուծարման այդ ծրագիրն իրականանա: Դեռևս ամիսներ առաջ, մեր քաղաքական ուժը՝ Վիտալի Բալասանյանի գլխավորությամբ, հայտարարել էր, որ ոչ միայն Արցախում, այլ նաև Հայաստանում անհրաժեշտ է զարկ տալ աշխարհազորի կայացման աշխատանքներին: «Ազգ - բանակ» ծրագիրը, որը մեծ իմաստով նաև գաղափար է, հենց դա էր նախատեսում, որտեղ յուրաքանչյուր քաղաքացի՝ անկախ իր զբաղեցրած դիրքից, պետք է այդ բանակի զինվորը լինի: Մենք, նույնիսկ, հստակ ծրագիրն ենք մշակել, թե ինչ կերպ դա պետք կյանքի կոչել, այլ կերպ ասած, ինչպիսին պետք է լինի մշտապես պատերազմի մեջ գտնվող երկրի բանակի կարգավիճակը»:

Արցախի պատգամավորը նկատում է՝ վերջին անկազմակերպ պատերազմի արդյունքը մեկ անգամ ևս հաստատեց աշխարհազորի անհրաժեշտության կարիքը: Մետաքսե Հակոբյանը վստահ է՝ ինչ -որ առումով դա արդյունք էր նրա, որ մենք չունեինք «Ազգ – բանակ» կուռ ծրագիրը, որի վրա հենվելով, կարող էինք խուսափել շատ արհավիրքներից, որ բերեց այդ պատերազմը:

ԱԺ պատգամավորը հավելում է՝ Արցախի Ազգային Ժողովը, հենց պատերազմի օրերին, աշխարհազորի մասին օրենքում փոփոխություններ է կատարել, հիմա էլ, կարծես, նման աշխատանքներ տարվում են, որպեսզի «Ազգ – բանակ» ծրագիրը վերջնական տեսքով պատրաստ լինի. «Խոսքս հավասարապես վերաբերում է նաև Հայաստանին: Մենք գիտենք, որ երեկվանից Կարսում մեկնարկել են թուրք – ադրբեջանական հերթական մեծամասշտաբ զորավարժությունները: Թշնամական երկրների կողմից նախաձեռնված ցանկացած նման գործողություն մեզ համար լրջագույն և վտանգավոր ազդակ պետք է լինի: Մենք տարիներ շարունակ լուրջ չենք վերաբերվել այն իրողությանը, որ մեր թշնամին, մեր իսկ քթի տակ անդադար զինվում և կատարելագործում էր իր բանակը:

Մենք լուրջ չվերաբերվեցինք նաև ամռանը Նախիջևանում տեղի ունեցած լայնամասշտաբ զորավարժությանը, որի արդյունքն ազգովի տեսանք, թե ինչ եղավ: Գիտե՞ք, օգոստոսին նախիջևանյան զորավարժությունների ժամանակ, մեր խմբակցությունն Ազգայի Ժողովի նիստերի դահլիճում, հարց ու պատասխանի ժամանակ բարձրացրեց այդ հարցը՝ իսկ ինչո՞ւ մենք ևս չենք պատրաստվում պատերազմի, ինչո՞ւ մենք ևս կարգի չենք հրավիրում մեր բանակը, ինչո՞ւ չենք ստուգում բանակի մարտունակությունը և այլն: Չեք հավատա, բայց ԱԺ իշխող խմբակցությունից մեզ պատասխանեցին, որ կորոնավիրուսային վարակի պայմաններում մենք մեծամասշտաբ զորավարժություններ անել չենք կարող: Բայց չէ՞ որ Ադրբեջանում և Թուրքիայում նույնպես կորոնավիրուսային համավարակ էր, ինչպե՞ս նրանք կարողացան ոչ միայն լայնածավալ զորավարժություններ անել, այլ նաև պատերազմ հրահրել և հաղթել… Ահա սա է իրականությունը, որի դառը պտուղները մենք քաղեցինք, բայց ինչպես հասկանում եմ, դեռ խելքի չենք եկել, կամ ոմանց ձեռնտու չէ խելքի գալը…»,- եզրափակելով զրույցն, ասում է Արցախի Ազգային Ժողովի «Արդարություն» խմբակցության պատգամավոր Մետաքսե Հակոբյանը:

Հեղինակ՝ Նվարդ Մանվելյան

Աղբյուր` Փաստինֆո