Փաստ ինֆո

«Ոչ մեկի համար այլևս գաղտնիք չէ, որ Ադրբեջանը, Թուրքիայի հետ միասին, լծվել է պանթյուրքիզմի գաղափարի իրականացման գործին: Խնդիրը նրանում է, որ այդ ծրագրի իրականացման համար իրենց հարկավոր է Սյունիքն՝ ամբողջությամբ, որպեսզի կարողանան անարգել ելումուտ անել Ադրբեջան – Նախիջևան ուղղությամբ: Հետևաբար, Մեղրիով դեպի Նախիջևան ձգվող մայրուղու մասին բոլոր խոսակցություններն ընդամենը ինքնախաբեություն են: Նորից եմ կրկնում՝ թուրք ադրբեջանական դաշինքին պետք է Սյունիքը, որի գրավման համար նրանք անում են հնարավոր ամեն ինչ՝ ընդհուպ մինչև Սյունիքի ամբողջական հայաթափումը, որ արդեն իսկ մեկնարկել է՝ սահմանին կպած գյուղերի ուղղությամբ այսօրինակ միջադեպերի կամ GPS սահմանազատումների տեսքով», - «Փաստինֆո»-ի հետ զրույցում ասել է անվտանգային հարցերով մասնագետ Արմեն Մանվելյանը` անդրադառնալով վերջին օրերին Սյունիքում՝ Ադրբեջանի հետ սահմանին հնչած կրակոցներին:

Արմեն Մանվելյանը նկատում է՝ Արցախի զավթումից հետո, Ադրբեջանն անցել է Սյունիքին, որի իրականացմանը, ցավոք սրտի, ամբողջովին նպաստում են մեր իշխանությունները, թույլ տալով, որպեսզի Ադրբեջանն իր զորքերն ընդհուպ մոտեցնի մինչև մեր սահմանին. «Հիմա, հատկապես, սահմանամերձ 13 գյուղերի հայաթափման ակտիվ գործընթաց է գնում, որից հետո հերթը կհասնի Կապանին և այդպես շարունակ՝ ողջ Սյունիքը: Սրան ադրբեջանական կողմը հասնում է մշտական լարվածություն ստեղծելով, որի արդյունքում, զուտ անվտանգության հարցերից ելնելով, մարդիկ կարող են թողնեն իրենց տներն ու հեռանան: Ասեմ ավելին՝ Արցախի հանձնումից հետո այս գործընթացը և´ կանխատեսելի, և´ սպասելի էր, սա ընդամենը՝ ժամանակի հարց էր: Եթե մենք, գոնե, նորմալ Գլխավոր Շտաբի պետ ունենայինք, ով թույլ չէր տա դիրքերի նահանջ՝ ընդհուպ մինչև հայկական գյուղեր, գուցե այսպիսի աղետալի վիճաում չհայտնվեինք: Բայց, մենք նույնիսկ արժանապատիվ զինվորական ղեկավարություն չուենենք: Նրանք զբաղված են միայն իշխանությունների անօրինական հրամաններն ի կատար ածելով, որի համար վաղ թե ուշ նրանք պատասխան են տալու՝ այն մարդկանց, որոնց ահռելի նյութական կորուստների և անմարդկային զրկանքների առաջ են կանգնեցրել, ինչն, ի դեպ, Սահմանադրությամբ ՀՀ քաղաքացիների անվտանգության պաշտպանության առումով կոպիտ խախտում է»,- ասում է Արմեն Մանվելյանը:

Քանի դեռ պետության ղեկն այս անողնաշար իշխանությունների ձեռքին է, Հայաստանը գնալու է կործանման ճանապարհով, ասում է անվտանգային հարցերով մասնագետը և հավելում՝ պետական ապարատը կաթվածահար վիճակում է, իրավապահ համակարգը, բացառապես, մի խնդիր է լուծում՝ ապահովում է հողատու վարչապետի անվտանգության հետ կապված հարցերը և ձերբակալում նրան ընդդիմացող ցանկացած զանգվածի: Այլ կերպ ասած, ստացվում է, որ մենք հայտնվել ենք արագ կործանման ընթացքի մեջ. «Այս ամենը շատ լավ հասկանում են նաև Բաքվում՝ շարունակաբար առաջ տանելով իրենց քաղաքական գիծը: Թուրքիան մեր քթի տակ, Ադրբեջանի հետ միասին նոր զորավարժություններ է անցկացնում և, բոլորովին չի բացառվում, որ թիրախում նաև Հայաստանն ու Ռուսաստանն են, ընդ որում՝ Գյումրում գտնվող ռուսական ռազմաբազան՝ առաջին հրթին: Չմոռանանք, որ Գյումրու ռուսական ռազմաբազան ընդամենը մի քանի կիլոմետրի վրա է գտնվում Կարսից, որտեղ, արդեն իսկ, մեկնարկել են հերթական զորավարժությունները:

Այս իմաստով պատահական չէ, որ Ռուսաստանը գրեթե նոր ռազմաբազա է տեղադրել նաև Սյունքիում, իսկ Սյունիքն, այսօրվա դրությամբ, մեր ամենախոցելի հատվածն է: Միաժամանակ, խիստ ակտիվացել է նաև Իրանը, ով իր զորքերն ու զորամիավորումներն է մոտեցրել Ջաբրաիլի և Նախիջևանի ուղղությամբ: Ինչի՞ մասին է խոսում այս ամենը՝ այն , որ տարածաշրջանում լուրջ և լայնամասշտաբ ռազմական բախումների իրական վտանգ կա: Եվ ամենացավալին այս ամենում այն է, որ ոչ մեկ բանի տեղ չի դնում հայկական կողմին, որովհետև բոլորի համար պարզ է՝ այստեղ չկա կոմպետենետ և հուսալի իշխանություն, որի վրա կարելի է հույս դնել, ստեղծված իրավիճակում, հաշվի նստելով նաև Հայաստանի շահերի հետ»,- եզրափակելով զրույցն, ասել է անվտանգային հարցերով մասնագետ Արմեն Մանվելյանը:

Հեղինակ՝ Նվարդ Մանվելյան

Աղբյուր` Փաստինֆո