Փաստ ինֆո

«Անկեղծ ասած, ես նույնիսկ չեմ կարծում, որ ինքը գնալու է արտահերթ ընտրությունների, ինքը դիտմամբ ուզում է դաշտը բաժանի կուսակցությունների՝ ովքեր են համաձայն, ովքեր համաձայն չեն»,- այս մասին ասաց «Հայրենիքի փրկության միասնական» շարժման վարչապետի միասնական թեկնածու Վազգեն Մանուկյանը՝ անդրադառնալով արտահերթ ընտրություններ կազմակերպելու մասին վարչապետի հայտարարությանը։

«Սովորական տրյուկ է՝ հին-նոր, սև-սպիտակ, էլիտա-ժողովուրդ, կուսակցություններ, որ ուզում են գնալ արտահերթ ընտրությունների, մյուսները՝ ոչ։ Մենք ասել ենք՝ ոչ մի ընտրություն Նիկոլ Փաշինյանի ղեկավարությամբ չի կարող լինել Հայաստանում»։

Մանուկյանը նշեց, որ նախ պետք է հեռանա Փաշինյանը, ձևավորվի կառավարություն՝ մեկ տարով, բանակի մարտունակությունը բարձրացվի, սահմանների մասին բանակցությունների գնան՝ կամ եռակողմ, կամ Ադրբեջանի հետ։

«Նույնիսկ կոմունիստների ժամանակ ամեն մի թիզ հողի համար մեր կենտկոմն ու իրենց կենտկոմը իրար հետ կռվում էին, իսկ այսօր առանց բանակցությունների, միջազգային իրավունքի տրվում են սահմանները»,- ասաց Վազգեն Մանուկյանը։

Վարչապետի միասնական թեկնածուն նշեց, որ մեկ կամ երկու ամիս հետո ընտրություններ՝ նշանակում է նորից տրոհել Հայաստանը, որովհետև ընտրություն՝ նշանակում է պայքար։

«Այս վիճակում իմաստ ունի՞։ Մինչև ուշքի չգանք, չի կարելի նման բան անել»։ Վազգեն Մանուկյանը հայտարարեց, որ չեն թողնի՝ հայտարարվի արտահերթ ընտրություն, մինչև Փաշինյանը չգնա։ Ըստ նրա, ամեն օր են անհնազանդության ակցիաներ լինելու։

«Մինչև Փաշինյանը չհեռանա, քաղաքը ամեն օր է այս վիճակում լինելու, որովհետև այն,  ինչ արեց նա՝ ներել չի լինելու և այն,  ինչը  շարունակվում է ամեն օր, կործանարար է Հայաստանի համար»,- եզրափակեց Վազգեն Մանուկյանը։

Աղբյուր` Փաստինֆո