Փաստ ինֆո

Մի կողմում դրված է հայրենիքի կործանում, մյուս կողմում դրված է հայրենիքի վերականգնում։ Այս մասին այսօր հանրահավաքի ժամանակ ասաց «Հայրենիքի փրկության շարժման» վարչապետի միասնական թեկնածու Վազգեն Մանուկյանը։

«Մինչև այսօր ես ամաչում էի։ Ամաչում էի, որ մինչև հիմա դուրս չենք գցել այդ մարդուն։ Ամաչում էի ինքս ինձ համար, ամաչում էի մեր ժողովրդի, մեր պետության համար, որովհետև ես այս պետության հիմնադիրներից մեկն եմ եղել և ինձ վրա պատասխանատվություն էի զգում, որ այսպիսի մարդու բերեցինք ու հենց պարտությունից հետո նույն գիշերը չշպրտեցինք դուրս։ Այսօր նայում եմ ձեր աչքերին և հպարտ եմ։ Նորից տեսնում եմ մեր այն ժողորդին, որ տարիներ առաջ հպարտ նայում էր դեպի ապագան։ Ունեինք դժգոհություններ, ունեինք թերություններ, կային գող-ավազակներ, հրեշտակներ, կային հերոսներ, բայց մենք մի հասարակություն էինք»,-ասաց Վազգեն Մանուկյանը՝ նկատելով, որ այն, ինչ այժմ մեզ հետ կատարվեց, սարսափելի է։

Վազգեն Մանուկյանը նշեց՝ ոչ միայն կվերականգնենք անցյալը, այլ կուղղենք այն, կկառուցենք այն պետությունը, որի մասին երազում էինք․ «Մի՛ մտածեք, որ որևիցե կառավարություն կառուցելու է Հայաստանը։ Հայաստան կառուցում է իր ժողովուրդը։ Քարը փեշներիցդ գցեք։ Ում եք սիրում, ում չեք սիրում կարևոր չէ։ Հիմա մեր բոլորի և մեր երեխաների, թոռների ապագայի հարցն է լուծվում։ Հետո մենք իրար մեջ կպարզենք՝ ով է ճիշտ, ով սխալ, բայց հիմա մենք բոլորս միասին պետք է լինենք»,-ասաց Վազգեն Մանուկյանը՝ ընդգծելով, որ հիմա պատերազմ է ապագայի համար։

Աղբյուր` Փաստինֆո