Փաստ ինֆո

Ռազմաքաղաքական հարցերի օպերատիվ կառավարման շտաբի ստեղծման գաղափարը վաղուց հասունացած է։ Պատերազմական գործողություններից սկսվելուց ի վեր շատերն էին խորհուրդ տալիս, որ իշխանությունները փորձեն աշխատանքներում ներգրավել երկրի որոշ  նախկին ղեկավարների՝ ՀՀ և ԱՀ նախագահներին, վարչապետներին և այլ նախկին պաշտոնյաների, անկախ նրանից, թե ինչ հարաբերություններ կան թե՛ քաղաքական, թե՛ մարդկային։ Այս մասին «Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը։

Հիշեցնենք, որ արտախորհրդարանական քաղաքական ուժերն այսօր հայտարարությամբ են հանդես եկել՝ առաջարկելով  կառավարությանը ստեղծել ռազմաքաղաքական հարցերի օպերատիվ կառավարման շտաբ-պետական հատուկ մարմին՝ օժտելով նրան որոշումներ ընդունելու, օպերատիվ գործողություններ ծրագրելու և համակարգելու իրավասություններով, հայրենիքի պաշտպանությունն արդյունավետ կազմակերպելու համար ներգրավել Հայաստանի և Արցախի Հանրապետությունների նախկին և գործող նախագահներին, վարչապետներին, պաշտպանության և արտաքին գործերի նախարարներին, ռազմական և քաղաքական փորձառություն ունեցող այլ անձանց։

Հակոբյանի խոսքով՝ բոլորը բավականին փորձված են, բոլորը փաստացի կամ անցել են  պատերազմի բովով, կամ արտակարգ իրավիճակներում տնտեսություն են ղեկավարել և նման ռեսուրսների միաձուլումը, կոնսոլիդացիան կարող է միայն օգուտ տալ։ Բացի այդ, դա իր մեջ նաև բարոյահոգեբանական իմպուլս-մեսիջ է պարունակում, հասարակությունը պետք է մի կողմ դնի բոլոր տարաձայնությունները, որոնք կան, և լծվի մեկ կետին խփելուն։  Քաղտեխնոլոգը հիշեցրեց, որ Արցախյան ազատամարտի ժամանակ ստեղծվել է Պաշտպանության պետական կոմիտե, որը կոորդինացնում էր ամբողջ աշխատանքը՝ պաշտպանության կազմակերպման և այլն, թեպետ այն ժամանակ էլ կային պետական կառավարման մարմիններ։ Այս նախաձեռնությամբ ևս առաջարկվում է ստեղծել պետական մարմին, որը կզբաղվի պետական պաշտպանության ֆունկցիաներով՝ ոչ միայն ռազմական առումով, այլև՝ հատուկ դրության պայմաններում տնտեսությունը կառավարելու, քաղաքացիական պաշտպանությունը կազմակերպելու։

Քաղտեխնոլոգը նկատեց, որ պատերազմական գործողությունների առաջին իսկ օրվանից նման գաղափարներ արդեն կային՝ գոնե  սոցիալական ցանցերում, փորձագետների վերլուծություններում և այլն։ Այսինքն՝ դա հասունացած գաղափար է։ Բանախոսը նաեւ  հիշեցրեց, որ Արցախում՝ ռազմական և քաղաքական ղեկավարությունը  նախկին իշխանության ներկայացուցիչներին, հատկապես՝ ռազմական գործիչներին ներգրավվեցին ռազմական գործողությունների, գուցե,  պլանավորման գործընթացին, ինչը բավականին լավ ընկալվեց հանրության կողմից։ Նրա խոսքով՝ յուրաքանչյուր մարդ, յուրաքանչյուր պաշտոնյա՝ սկսած Լևոն Տեր-Պետրոսյանից և վերջացրած Սերժ Սարգսյանով, ոչ միայն փորձառու են և գիտելիքների են տիրապետում, այլև՝ հսկայական կապեր, հնարավորություններ ունեն և յուրաքանչյուրը կարող է մեծ օգուտ տալ ընդհանուր գործին՝ օգտագործելով բոլոր ռեսուրսները՝ սկսած ռազմական ոլորտից, վերջացրած՝ քաղաքական, դիվանագիտական, տնտեսական ոլորտներով։

 Հակոբյանը գտնում է, որ իշխանությունը պետք է այդ ռեսուրսն օգտագործի։

Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։ Թեև հոկտեմբերի 10-ին՝ ժամը 12-ից հումանիտար հրադադար հայտարարելու մասին Մոսկվայում Հայաստանի, Ռուսաստանի ու Ադրբեջանի արտգործնախարարների ձեռք բերած պայմանավորվածությանը, Ադրբեջանը շարունակում է խախտել  հրադադարը:

Հեղինակ՝ Իզաբել Սահակյան

Աղբյուր` Փաստինֆո