Փաստ ինֆո

ԲՀԿ առաջնորդ Գագիկ Ծառուկյանի ենթադրյալ մասնակցությամբ խմբակային բռնաբարության քրեական գործի դատավճիռը հրապարակելով իշխանությունը փորձել է ընդդիմադիր այս ուժին, մասնավորապես քաղաքական այս ուժի ղեկավարին զերծ պահել քաղաքական ակտիվ գործողություններից։ «Փաստինֆո»-ի հետ զրույցում նման կարծիք հայտնեց քաղտեխնոլոգ Վիգեն Հակոբյանը։ 

Հիշեցնենք, որ ԲՀԿ առաջնորդ Գագիկ Ծառուկյանը հունիսի 5-ին քաղխորհրդի նիստում հայտարարեց, որ կառավարությունը 100 տոկոսով պետք է փոխվի։ Նրա այդ հայտարարությանը հաջորդեց ԱԺ «Իմ քայլը» խմբակցության պատգամավոր Հրաչյա Հակոբյանի ֆեյսբուքյան գրառումը, որով ակնարկում էր բռնաբարության քրեական գործի մասին, որից 3 օր անց վարչապետի ընտանիքին պատկանող լրատվամիջոցը հրապարակեց այդ քրեական գործի դատավճիռը։

Քաղտեխնոլոգը գտնում է, որ սա բավականին ռիսկային քայլ է, քանի որ այդ պատմությունը բավական հայտնի է և ժամանակ առ ժամանակ այն օգտագործվել է, մասնավորապես նախընտրական և քաղաքական սուր շրջաններում. «Հիմա քարոզչական պատերազմ է գնում, և այդ քարոզչական պատերազմում ամեն մեկն օգտագործում է այն, ինչ իր ձեռքի տակ կարող է լինել կամ ինչ նպատակահարմար է գտնում։ Դա նաև ցույց է տալիս այս կամ այն կողմի մտավախության աստիճանը։ Տվյալ դեպքում իշխանության տագնապը, որովհետև բավականին ծանր արտիլերիա են միացրել» ,-ասաց Վիգեն Հակոբյանը՝ նկատելով, որ երբ քաղաքական մրցակցին դարձնում ես թշնամի, այրում ես նաև բանակցությունների կամուրջները։ Քաղաքական մրցակիցը, որը դառնում է թշնամի, ինչ-որ բանի շուրջ կոմպրոմիսի հետաքրքրությունը կորցնում է։

Դիտարկմանը՝ արդյոք այս քայլով իշխանություններն ի դեմս ԲՀԿ-ի ձեռք բերեցին թշնամի, Վիգեն Հակոբյանը կարծում է ՝ քաղաքական մրցակցից վերաբերմունքն ըստ էության դարձավ թշնամական, քանի որ նմանատիպ նյութ տպելով՝ քաղտեխնոլոգի խոսքով պատին ես դեմ տալիս մարդուն և պայքարն ավելի կատաղի է դառնում։

Անդրադառնալով հարցին, թե ինչու հենց անձնական տեղեկատվություն հրապարակվեց, Վիգեն Հակոբյանն ասաց, որ այսկերպ փորձ եղավ տվյալ գործչին քաղաքական դաշտից տեղափոխել իմիջային դաշտ, այսինքն` ոչ թե քաղաքական վնաս հասցնել, այլ՝ իմիջային, որպեսզի թուլացնեն տվյալ գործչի դիրքերը, նրա նկատմամբ մարդկանց ունեցած վստահությունը. «Այստեղ շատ պարզ PR տեխնոլոգիա է օգտագործվել. Իմիջը փչացնելու միջոցով փորձել արժեզրկել նաև իր քաղաքական կշիռը, քաղաքական հետագա գործողությունները։ Պարզ է, որ եթե լիներ տնտեսական ինչ-որ հարց, փողերի լվացումներ և այլն, նման մեծ աղմուկ չէր լինի։ Կտպեին ու հաջորդ օրը կմոռացվեր այդ ամենը։ Ցավոք դա այսօրվա Հայաստանում առօրյա է դարձել։ Իսկ էմոցիոնալ տեսակետից սա մի քիչ ավելի երկար կյանք ունի»,-ասաց Վիգեն Հակոբյանը՝ հավելելով, որ հավանաբար այսկերպ փորձել են իմիջային մեծ վնաս տալ, որին կհետևեն նաև քաղաքական ինչ-որ գործընթացներ։ Իսկ թե ինչ կհաջորդի այս ամենին, կախված է ԲՀԿ առաջնորդի ռեակցիայից, որն ըստ քաղտեխնոլոգի՝ այդքան էլ չի ուշանա. «Երկու տարբերակ կա. Կա՛մ հետ քաշվել, կա՛մ էլ մրցակցից թշնամու վերածվելու պրոցեսում կարող է համար, որ կորցնելու բան չունի և ավելի կատաղի պայքար սկսվի։ Դժվարանում եմ այս պահին ասել, բայց կարծում եմ՝ 1-2 օրվա ընթացքում ինչ-որ ռեակցիա պետք է լինի»,-նշեց քաղտեխնոլոգը։

Ինչ վերաբերում է Գագիկ Ծառուկյանի հայտարարությանը և դրան հաջորդած ԲՀԿ անդամների հայտարարություններին, որի ժամանակ նշում են, որ վարչապետի հրաժարականը չեն պահանջելու, Վիգեն Հակոբյանն ասաց, որ նրանք բոլորն էլ իրենց ելույթներում ասում են՝ Գագիկ Ծառուկյանն անձամբ կպատասխանի հարցին. «Եթե Գագիկ Ծառուկյանն ասեր, որ կառավարության 99 տոկոսը պետք է փոխվի, կենթադրեի, որ գուցե դա վարչապետին չի վերաբերում, բայց եթե ասում է 100 տոկոսով, հասկանում ենք, որ վարչապետը ևս պետք է հրաժարական տա։ Դժվար է դա այլ կերպ ընկալել»,-ասաց քաղտեխնոլոգը։

ԲՀԿ-ի և արտախորհրդարանական ուժերի հանդիպումների արդյունքը Վիգեն Հակոբյանի կարծիքով պայմանավորված է նրանով, թե յուրաքանչյուր քաղաքական ուժ որքանով իր մեջ ուժ կգտնի դիմակայել իշխանության կողմից որոշակի ճնշումների։

Հեղինակ՝ Հասմիկ Կոշկարյան

Աղբյուր` Փաստինֆո